|
Da Verona
E dàghela con sti pié!
 | | Un biceroto de tisana miracolosa che la fa ben par tuto… (foto Gianmauro Mauri) |
Vao a catar de novo la me amiga par védar co i me oci come la sta co i so pié, dato che al telèfono la séita dirme che l’è messa come Cristo in croce. Va ben che i l’à operà de Quarésema, ma dopo du mesi dovaréa sonar le canpane de Pasqua anca par ela. E difati... l’è propio ela che me vèrze la porta, come na ’olta quan che la gavéa le sate funsionanti.
“Son da par mi” la me dise ela strucàndome la man, “parché el me omo l’è nà a far la spesa. Da resto, da quando mi son invalida ghe toca far lu quel che faséa mi prima de l’operassion.”
“L’è gran brao! Staolta el fa el volontario a casa sua invesse che sù e zo da le anbulanse o in mezo ai endicapati” salto fora mi che ’l conosso ben.
“A pian co i conplimenti!” la me interonpe ela, vardàndome de sbiesso. “A propòsito, fin che no ’l ghè, te conto un par de capele che ’l m’à conbinà ne sti du mesi e dopo te me savarè dir…” E la taca de boto con una de le so storie.
“Donca, i me manda a casa da l’ospedal e mi me toca star inciodà in leto. Lu el me lava, el me canbia mi tuti i dì e i nissói ogni altra matina, el fa da magnar, el va dal dotor par le inpegnative, el me mena a le medicassioni, el tien inpienìo el frigo, el lava, el destende le robe, el tien destrigà el seciar, el risponde al telèfono, el organiza le visite de i parenti…”
“Marisi!” sbroco mi. “L’è un santo no un marì!”
“Bela”, la me ribate ela de paca, “tasi e ’scolta e po’ te me savarè dir. ’Ntanto el me lava con na delicatessa che el me leva la pèle; el fa da magnar senpre le stesse robe: pastassuta con l’ojo a disnar e a la sera minestrina de dado che ghe n’ò un gòsso che metaréa in galera tuti quei che nel mondo i fàbrica dadi. Quando el va dal dotor el profita par passar dal so cìrcolo a ber un bicer e a ciaciarar, desmentegàndose de mi a casa, sola come un can. Quei giorni che ghe toca conpagnarme a l’ospedal par medicarme i pié, cavarme i ponti o desfilar i fereti, el séita dirme sù parché dòparo mal le stanpele, fao i passi curti, tegno le ganbe massa stenche. Par via del frigo, el le inpienisse prima che el se uda e perciò te ris-ci che a vèrzar la portela te casca scatolete o altre menade su i pié, senpre sperando che no i sia mia i mei. El conpra tuto quel che ghè in oferta, na ’olta parfin i omogeneizati e mi, che la me par roba za mastegà, me son ofesa dato che go tuti i me denti sani e quando el m’à domandà ’sa voléa par sena, go risposto ‘la panà’ e ghè tocà magnarla anca lu. No ghè perìcolo che el taca el fero parché, secondo lu, basta destèndar ben e se pol far de manco de stirar. Par via de i parenti – na mucia – che i vol vegner a catarme, el fa sù na confusion che no te digo: a na me sorela ghe toca ogni dì e me fradel no ’l l’à gnancora messo ne la lista de le prenotassioni. E quando i riva, tuti col so scartosseto o el masseto de fiori, lu el fa el bulo, ropetando par sercar fora i cabarè o i vasi giusti. El séita conprar spaciugoti par quando vien gente e, sicome no ghè più posto da métarli, el l’à intanbusè inte la scarpiera al posto de le me scarpe che ghe n’ò solo un par che ghe stao ancora dentro. Ma la più grossa el me l’à conbinà ieri. Donca, tanto par canbiar el ga da nar a far la spesa e mi ghe ricordo de torme la ‘tisana digestiva’ che beo senpre dopo magnà. Ghe digo el nome e la marca che lu el nota in fondo a un bilieto longo come un rodolo de carta igènica ‘a 4 veli’ e el parte. Quando el vien de ’olta, el me dise che l’à catà na tisana miracolosa, un messioto de erbe, rigolissia, rabàrbaro, fenocio, camamila, erba-sena, che le fa ben par tuto. El insiste che la funsiona par el stómego, la tien fègato e reni neti, la pansa destrigà, la calma el nervoso e la aiuta a indormensarse...”
“Dime ’sa la se ciama che me la conpro anca mi” la interonpo mi interessà.
“Bela,” la me sopia ela, “no ghe sito gnancora rivà? I è le bustine ‘Giusta Regolarità’ che le serve par nar de corpo.”
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Onore a l’Italia col canto
Na bona ocasion par rèndarghe onore a l’Italia in festa la xe saltà fora da la 22ª Rassegna Corale “Città di Padova” organizà dal Coro “La Valle” in colaborazion con l’AIDO
de Mario Klein
Confronti
La storia de le disgrassie
de Ugo Suman
Da Rovigo
On po’ de alegrìa
de Gianni Sparapan
Da Thiene (VI)
La matassa de seda
Un filo de oro che liga i ricordi de un mondo de fiaba có gero putelo
de Bepin Daecarbonare
Da Verona
E dàghela con sti pié!
de Giacinta Dall’Ora
|
