|
Rimedi de na volta
El segreto de la siola
Da qualche ano i ne spaventa a morte có vien la stajon de l’influensa; no xe pi come na volta: do aspirine, na bela scudela de late de bojo co la graspa, na bela suada, na dormìa soto la cólsara e la matina drio te si in forma come un canarin. Nò, ciò! ’Desso se parla de ”viaria”, de ”suina”, de ”H.I.V.”..., cussì, dopo ’vere speso son de miliardi pa’ i vacini e rimedi vari, passato perìcolo! Tuto da rifare, buta via i vacini che no xe stà doparà squasi da nissun e preparémose par n’altra futura epidemìa, diversa, ma senpre tanto pericolosa...
A go leto che nel 1919, quando na epidemìa de influensa ga fato morire no sò quanti milioni de persone, un mèdego che l’andava par le case a visitare i contadini malài par védare se jera possìbile darghe na man a sta pora zente, senpre el ghi ne catava tanti de morti. Rivà su na caseta sperdùa, lontan in mezo ai brècani, el xe stà meravejà de catare tuti sani, vivi e vegeti come se gnente fusse. Có ’l ga dimandà a la parona de casa come mai nissun ghesse tirà le ’ache, la fémena la ga risposto che la gheva messo par ogni càmara na siola su un piato vissin al leto. El mèdego no podeva crédare a sta storia e el se ga fato dare una de ste siole par esaminarla al microscopio... Có ’l la ga vardà soto la lente, el ga catà ne la siola el virus de l’influensa, el ga sentensià che la siola ghesse assorbìo el baterio incriminà, mantegnendo sana tuta la zente de quela casa. La siora la ga contà al mèdego de ’vere sentìo contare da so nono che lori no ciapava la polmonite e i stava ben senpre: bastava tajare na siola soto e sora, fare un buso da na parte col piron e métarla su un piato in parte del leto del malà par tuta la note. La diseva che la siola, la matina drìo, la jera tuta nera a causa de i bateri che la gheva sorbìo e el malà el stava mèjo...: la siola, marsa patoca e la persona la se sentiva ben. “Anca mi” la dise la sioreta, “a go sentìo sta storia da la paruchiera: la contava che ogni ano le so aiutanti le stava casa malà co l’influensa e cussì anca tante so clienti. L’ano passà però, la gheva messo nel negossio raquanti piati co le siole tajà e, co sorpresa, nessuna de le so aiutanti xe stà casa malà e anca tante de le so clienti.” Sto mèdego el ga fato conóssare sto fato a na so amiga dotoressa e anca ela la gheva sentìo parlare de sta proprietà de le siole. Anca altre esperiense ga dimostrà che siole e ajo semenàe par la casa, ga salvà da la epidemìa nera tanta zente ne i ani passà, dizendo che siole e ajo ga de le proprietà antibateriche e antissetiche.
La morale de la storia xe: cronpa de le siole co la scòrsa, métile su de i piati par tuta la casa, in uficio, in fàbrica o par ogni altra parte e la siola te salvarà, ti e tuti i to parenti! Che la sia cussì o nò, no ghe xe gnente da pèrdare; provémoghe, tutalpiù, garemo speso un euro par un chilo de siole!
Lesendo sta roba, a me xe vignùo in mente che i frutaròi no ciapa mai el rafredore e l’influensa. Me ricordo la Evelina che gheva la botega de fruta e verdura davanti a casa mia: d’inverno la jera senpre presente, cuerta ben co na bela maja de lana pesante fata a man, la sierpa rujà ben ’torno al colo, i guanti de lana senza déi par poder ciapare mèjo le patate e la roba, calse grosse co le papusse de pèssa, de quele che i vendeva su nel Tirolo, (i noni, come i ciamàvino). La tigneva anca na fogara co le bronse senpre inpissà; sora la ghe meteva na cógoma de aqua e la se scaldava ogni tanto le man inguselàe ( informigolàe) dal fredo. Epure, no me ricordo de ’vere mai visto la botega sarà, gnanca co la neve alta in strada, al massimo la sarava la porta. Lu invesse, Remigio, na s-cianta più deboloto e pi fredoloso, na mèsa pipeta de omo, el jera a casa piassè. La Evelina invesse, senpre in trincèa, forte come l’aséo, sensa paura e conbativa, la ramenava patate e siole a no finire, quelo che jera pi a bon marcà e che se magnava in chei tenpi a mesodì e a sena... e le siole jera quele che la tigneva sana e vispa anca col fredo.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Onore a l’Italia col canto
Na bona ocasion par rèndarghe onore a l’Italia in festa la xe saltà fora da la 22ª Rassegna Corale “Città di Padova” organizà dal Coro “La Valle” in colaborazion con l’AIDO
de Mario Klein
Confronti
La storia de le disgrassie
de Ugo Suman
Da Rovigo
On po’ de alegrìa
de Gianni Sparapan
Da Thiene (VI)
La matassa de seda
Un filo de oro che liga i ricordi de un mondo de fiaba có gero putelo
de Bepin Daecarbonare
Da Verona
E dàghela con sti pié!
de Giacinta Dall’Ora
|
