|
Da Verona
Na storia in tenpo de guera
 | | Eco la foto del 1938 co’ Umberto, so mama e so sorela. |
El se la ricorda ben la so infanzia UMBERTO PELLINI e ’l ghe ne parla ’desso, a distanza de tenpo, co’ comozion. El ne conta che l’è nato el 6 de genaro del 1933 a Verona, a la vecia Maternità de via Moschini, fiol de Vittorio e de Elena Benetti. Da butin, l’è stà de casa in centro cità, in via Antonio Provolo; ’desso inveze el sta in Borgo Milano.
Nel 1942, in tenpo de guera, Umberto el gavéa nove ani. So mama la faséa la bilietara su le filovìe SAER (Soc. Anonima Servizi Rotabili); so papà inveze l’era inpiegà a i magazini centrali militari. Naturalmente l’andava a scola e so mama, inpegnà a laorar come che l’era, la dovéa conbinare el so laoro co’ la fameja; purtropo, quando Umberto el vegnéa a casa da scola, el dovéa rangiarse a tornar a casa da solo. Però so mama la ghe dava on orario: sicome la faséa servizio su la linia n. 1 de la filovìa, ne la trata da Porta Vescovo a Verona Porta Nova, la lo avisava:
“Guarda che passo da Castelvecio a chel’ora lì.”
Cussì so mama, par poder badare al fiol, la lo faséa montare su la filovìa, la ghe dava on bilieto e la lo faséa sentar vizin a ela. Na volta rivè in fondo a la corsa, la metéa al so posto el bilieto, cussì Umberto el viajava a gratis. A olte la ghe dava la possibilità de fermarse in stazion a Porta Nova e la ghe diséa:
“’Desso ti te smonti al primo binario, ma sta’ ’tento... Mi fao nantro giro, cussì dopo te porto a casa.”
Cussì continuava la so vita. Lu se ricorda ancora che quando Mussolini, el 26 setenbre 1938, l’è vegnù in Arena par inaugurar el canpo de aviazion de Boscomantico, ghè stà na gran riunion co tanto de discorso del Duce. Subito dopo so mama l’à portà i fiói dal fotògrafo Oppi, che ’l gavéa el studio passà la curva de Castelvecio: Umberto l’è vestìo da “Figlio della Lupa” e so sorela da “Piccola Italiana”.
Po’ el se ricorda che, finìa la scola, nel 1943 – el so maestro l’era Tullio Stefani a le scole “Angelo Messedaglia” – l’è partìo par le colonie montane “Principe di Piemonte”, che ghera prima de la salita de Boscocesanova, su la destra. Lì ghera on gran fabricato color rosa come ’desso. “El me turno de colonia l’era da l’1 al 30 lujo 1943. Parto co’ on autobus, davanti a la Casa del Fassio o G.I.L. (dove ghè ’desso la Camera de Comercio, in via Locatelli) e vao sù in colonia. Me mama la m’avéa dato on po’ de moneda parché ‘No se sa mai!’, l’avéa dito. Naturalmente son partìo vestìo da balila, co’ la me valiseta con la biancarìa. Figurarse, l’era el massimo par mi... catarme de lujo al fresco, poder magnar, córare e zugare...
Ma ’riva el 25 lujo co’ la riunion de ’l Gran Consiglio che à visto la caduta de Mussolini. Noantri èrene afidè e proteti da na diretrice e da de le assistenti che le vigilava su noantri buteleti. Ma, a la caduta del Fassismo, la diretrice e le assistenti i è scapè zo par la vale e i è ’ndè via. La coga che l’era del posto no la savéa pi ’sa fare. Noantri èrene pi de 250 buteleti:
– Banbini, fin che togo provedimenti, guardè che soto, ne i scantinati, ghè le carote. Se gavì fame, magnè carote.
Mi, grazie a chei quatro schei che gavéa in scarsela, son riussìo a magnar pan e formajo, ma po’ ò dovù adatarme anca mi. Par fortuna è intervegnù el pàroco de Bosco, a dare diretive a la coga, ma par via de magnare… solo carote.
Ormai i fassisti de la G.I.L. no i vegnéa pi a torne. Ci s’à interessà de noantri l’è stà el dot. Ceschi, medico condoto de Verona. Dopo il 6 agosto 1943 è vegnù de le coriere a torne, co’ gran respiro de tuti. E qua vien el belo: mi son partìo da casa vestìo da balila e, par tornare a casa, me son vestìo par forza nel stesso modo. Nissuni à pensà de dirme: – Vèstete normale! – Concludendo: na olta rivè a Verona, smontemo davanti a la G.I.L., me ìnvio verso casa par vicolo Sorte, dove ghè l’ospedale militare, inboco la strada de i Scalzi…Al canton de vicolo Calcirelli (ormai jera le do, on caldo…), lì, sentè par tera, ghera tri buteleti de la me età, che zugava a l’onbrìa; i alza i oci, i me vede passar co’ el vestito da balila e la valisa in man; a lori no ghe paréa gnanca vera (cissà che esenpi i gavéa avù in chei giorni lì...) I m’à mirà a la testa, urlando:
– Al fassista!
Quelo che no i m’à fato... I m’à picià, destacà i botoni; perdéa le braghe… Son rivà a casa distruto, ferìo, co el naso pien de bòte, sgrafà dapartuto, su ’l colo, su la facia, su le ganbe, con on buso che sanguinava vizin a la nosela de na ganba... Par guarire m’è volù cossì tanto al punto che, quando a otobre è scominzià la scola, portava ancora i segni.”
Umberto Pellini el conclude el so raconto, disendo che tanti ani dopo, catàndose a Bolzano par lavoro, on giorno, drento in on bar par on cafè, el se inbate in uno che ghe par de conóssarlo:
“Ma ti – digo – sito quel che…”
“Propio mi – el dise sto qua – quel che t’à dato quela olta, quando te eri vestìo da balila...”
E tuto è finìo lì, co na streta de man e in bona armonìa.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
L’inportanza de i noni
Cossa saréssela la vita se no ghe fusse i noni! Chi xe che viziarìa i nevodi, ma soratuto chi xe che ghe farìa conóssare tuto chel mondo, in parte vèro in parte inventà, che ga bisogno de costruirse drento, on poco a la volta, chi sgnaoleti gnancora slatà?
de Mario Klein
Da Verona
Na storia in tenpo de guera
de Lucia Beltrame Menini
|
