|
Robe de Ciósa
El ziògo ne l’800 a Ciósa
 | | Pescaori che ziòghe a carte in ostarìa (inizi ’900) (foto da: “Museo Naz. delle Arti e tradizioni popolari: Le marinerie adriatiche tra ’800 e ’900”, a cura de P. Izzo, Roma, 1989) |
La passion de ziògo a Ciósa pare tut’altro che tramontà. Basta osservare d’istà in spiagia davanti a le capane de dopopranso quanti muceti de òmeni o de done, a l’ombra de l’ombrelon, ziòghe a carte o a tómbola. Se podarìa dire, usando el linguagio sportivo, che i ziòghe “in trasferta”, spostàndose da la cusina de casa o da i bar, tradissionali “campi de ziògo” invernài, a quei a l’aria verta, in spiagia. Forse l’istinto (se cossì a se pòle ciamare) del ziògo a Ciósa a ze “innato”, stando anche a le cronache locali passà. Quasi secolare. Avemo notissie documentàe de ziòghi praticà in spessie da i òmeni ne le ostarìe, dete ’na volta “bàcari”, dove i pescaori se trovèva non solo per ziogare a carte, ma anche per farse de le bone bevùe de “foresto” a base de “ombre” o de le magnàe de canoce, che se concludeva co le imancabili cantàe in coro (el pi cantà gera “L’inno a San Marco”, originario de Venessia e che riportémo più avanti). Se zioghèva, oviamente, d’inverno a l’interno de le ostarìe e d’istà su i tavolini sistemà fòra del locale. Parlemo sempre de l’Otosènto.
L’ostarìa gera el liògo pi frequentà non solo da pensionati, ma da zente che lavorèva, come pescaori, scaricatori de porto, pìcoli comercianti… opure da pescaori che aspetèva de imbarcarse, opure da veci “lupi de mare”.
Se consumèva, come za dito, vin e anca liquori e quando che entrava in ostarìa amissi o conossenti gera “d’òbligo” ofrirghe la classica “ombreta” e magari anche ’a magnà…
I ziòghi pi praticà ne l’Otosènto a Ciósa gera quei co le antiche carte venete (quele da brìscola) e le partìe serviva anche per scaricare tension psicologiche e, serte volte, anche… fisiche e nervose. No manchèva i ziòghi d’azardo o de provocassion, come la “sachinéta” (= zecchinetta), un ziògo che gera severamente proibìo da la Republica.
Ziòghi de carte mondo praticà gera: brìscola, meneghèla (vinsèva chi conservava fin a la fine el dó de spade), panfin, tressete, pampalungo (perdeva chi che restèva col fante de spade), cunsina (= coroncina, una specie di scopa) e altri.
A proposito de ostarìe, no ze che le fosse tante ne la prima metà de l’Otosènto a Ciósa, come se credarìa (le gera sirca ’na venténa). Ma nel corso del secolo le ze aumentà sempre de pi fin a rivare quasi a ’na setanténa. La cosideta borghesia o “ceto medio”, invesse, preferiva frequentare i “casini” o i “caffè”, stanse in afito, dove se conversèva e se zioghèva (anche a schèi).
Insoma a Ciósa se zioghèva (e se ziòga) forte, ma se pratichèva anche i ziòghi o, mègio, i esercissi fisici che tendeva a fortificare el corpo, come el tiro co la balestra. Questi ultimi se fazèva a i Saloni (dove adesso xe restà ’na parte del porto comerciale), alora isola, e per andarghe bisognava traversare el canal Lombardo in barca. I balestrieri, come tuti, i passava per ’na cale per ciapare la barca in riva, da le parte de Vigo, e per sto motivo la cale ze sta ciamà “calle Larga Bersaglio”.
Tornando al ziògo d’azardo, sucedeva che qualchedun rovinava le so sostanse (come che càpite anche adesso), motivo per cui a gera un ziògo proibìo dal governo de la Serenissima.
A l’aria vèrta i zóvani pratichèva el ziògo de le “tanéte” o del “tanon”, che consisteva nel sercare de butare ’na bala de marmo drento de le buse scavà nel teren, indove ghe gera la posta in ziògo patuìa da i ziogadori. Anche el “biliardin” gera praticà da numerosi grupi de òmeni, nel campo che adesso se ciama “Campo Marconi”, de fronte a la sede del Museo, alora libero e in tera batùa, spèssie de doménega.
Altro ziògo gera quelo del “madi”: el ziogatore doveva colpire da una serta distansa ’na pièra, ciamà “sussì” indove posà sora ghe gera la posta in schèi che ghe spetava al vinsitore. Altro ziògo praticà ne l’Otosènto (e anche adesso) gera quelo de le boce: ghe gera sìnque campi da boce in cinque ostarìe de la sità.
Ma anche le done no gera da manco: sicome no le podèva a chéi tempi entrare ne le ostarìe, le ziogava in casa: ziògo abituale gera quelo de la tómbola, ma no mancava pure el ziògo de le carte, spèssie quelo del “sète e mezo”. No parlemo po’ del ziògo del loto, che avemo tratà in un capitolo a parte qualche mese fà.
INNO A SAN MARCO
Viva el Doge, viva el mar!
Viva el Doge, viva el mar.
Viva el Doge, viva el mar.
Al grido di guerra,
San Marco risponde:
il nostro vessillo
vogliamo sui mari,
il nostro vessillo
vogliamo sui mar!
Si fa silensio
nei suoi canali:
udiamo la voce
del suo gondolier
che spinge la barca,
vogando sul remo,
cantando con voce
la mesta canzon.
Mia cara Venezia,
mia patria diletta,
tu fosti regina
possente sui mari.
Tu fosti regina
possente sui mari,
sei cinta di glorie,
speranze ed amor.
Viva Venezia!
Viva San Marco!
Evviva le glorie
del nostro Leon,
viva le glorie
del nostro Leon!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
L’inportanza de i noni
Cossa saréssela la vita se no ghe fusse i noni! Chi xe che viziarìa i nevodi, ma soratuto chi xe che ghe farìa conóssare tuto chel mondo, in parte vèro in parte inventà, che ga bisogno de costruirse drento, on poco a la volta, chi sgnaoleti gnancora slatà?
de Mario Klein
Da Verona
Na storia in tenpo de guera
de Lucia Beltrame Menini
|
