Patrimonio de arte e de fede

L’Eremo dei Romiti

El Rifugio ”Eremo dei Romiti” e la ceseta de S. Giovanni Battista.

So na bea e calda doménega de inissio otobre – che a dir el vero la jera estiva a tuti i efeti! – me xe capità de far ’na bea gita in montagna co la me fameja. No savendo ben dove ’ndar, avendo paura de i matessi de i me putèi, a la fine ghemo ciapà e semo ’ndài in Cadore, parché gavèo sentìo che i gavèa restaurà da poco un antico convento, ’desso messo a rifugio de montagna.
El fato me gavèa incuriosìo, ma veramente no credèo che el fusse un posto cussì beo! Parfin me mojer e me fiòi, che de solito i bróntola quando che i porto de qua e de là, stavolta i se restài a boca verta có semo rivài sù, e i se ga desmentegà la fadiga che ghemo fato par rivarghe a piè.

La storia
L’ex “Eremo dei Romiti”, cussì se ciama sto posto, el xe la testimoniansa de un convento unico in Cadore. El xe proprio in sima al monte Froppa, so el grupo dolomitico Montanel-Cridola, in comune de Domegge di Cadore, a l’altessa de 1164 metri, da indove che se vede un panorama beo che mai pi so tuto el centro Cadore.
La storia de i “Romiti” la taca ’torno al 1720 par volontà de Giovanni Maria Pinazza da Domegge, un frate francescan de l’ordine de i Terziari e primo eremita vegnù a star là su, ciapà da un ideale de “vita ascetica”, e vivendo grassie a le oferte de un pochi de siori del Cadore de l’època. Dopo de ju xe rivà de i altri cadorini e cussì se ga formà na comunità de frati picenìna, che la vivèa de preghiera e de la coltivassion de patate, ortagi e de la produsion de miele.
Tacà a l’eremo nel 1724 xe stà costruìa la ceseta dedicada a San Giovanni Battista.
El convento xe stà sopresso nel 1810 par colpa de i decreti napoleonici e tuto quanto xe stà abandonà. Nel 1992 l’architeto A. Costantini el ghe ga regalà tuta la proprietà al comune de Domegge che se ga messo a restaurarlo dal 2007 al 2008.
’Desso xe stài finansiài i lavori de restauro e de recùpero de la ceseta che xe tacà a l’eremo e che ’desso no la xe visitabile, parché la xe pericolante, ma apunto pararìa che a breve anca questa la vegnarà restaurà e verta al pùblico. Sta cesa picenina la jera inportante par ’sti paesi, parché el 24 giugno, festa proprio de San Giovanni Battista, par na vecia tradision la parochia de Domegge la celebra na messa nel pìcolo capitelo, tuto afrescà, che xe soto a l’eremo, a la fine de la Via Crucis, un ripido del bosco che va sù a rota de colo, se pol dir, a l’eremo de i Romiti.

El pìcolo capitelo, tuto afrescà, che xe soto a l’eremo.

Indicassion
L’eremo, restaurà ben che mai, mantegnendo el profumo antico, el xe ’desso un bel rifugio de montagna de proprietà del Comune de Domegge, gestìo da la fameja de Livio De Bernardo (tel. 0435/520010).
El rifugio el xe senpre verto nel periodo estivo e anca ne i fine setimana drio tuto l’ano; tra l’altro se magna proprio ben, tanto che se ris-cia de riciapar subito queo che se ga calà ’ndando sù par la salita, ma insoma val la pena.
Par rivarghe, ricordemo che se va sù sol che a piè: se va a Domegge di Cadore, seguendo le indicassion par el lago e par el Rifugio Padova. Dal ponte sul lago de Centro Cadore, fati qualche sentener de metri dopo el ponte stesso, se cata un parchejo indove ’assar la machina, e là scominsia la stradela forestale che va sù par ben verso el monte Froppa (cartèi). Dopo la prima rampa, passà el torente, se pol decìdare se ’ndar sù par la stradela forestale opur par el ripido sentiero de la “Via Crucis”, troso che mi consilio sol che a chi che ga bone ganbe. Noaltri ghemo fato in salita la strada forestale e vegnendo zo la “Via Crucis”, e ve consilio de far altretanto.
Bona passejata a tuti so un anbiente veramente unico par la so belessa e la so pase!

[torna sopra]