|
Da Adria (RO)
Tunpinare e cassavidi
La passion par l’orto e ’l giardin l’è na malatìa contagiosa. Se el tuo l’è belo, a vojo che ’l mio sia mèjo ancora. Cussì se se dà da fare con vanga, rastelo, sapa, e artegagni vari pur de poder mostrare a amissi e parenti un bel prà verde da i contorni pieni de fiori, i vasi in terassa co n’esplosion de colori, quìi su i balcun mèjo ancora e po’… vien l’orto! Belo anca lu, in ordine co le so vaniese ben tegnù, sensa un
filo d’erba, dando aqua quando ch’è ora, metendo i carassi a le piante ch’a ghe n’à bisogno, curàndole parchè no le se mala e fasendo in maniera che i bisi i sia grossi cofà i ravanèi, le teguline abondanti da catare tuti i dì, le suche grosse da far invidia, i fasòi, la salata, i fenoci, i pomodori tuti cussì bei che l’è un pecà magnarli.
Fin qua no s’à tegnù cunto de le bestiole ch’a pol creare dani. Da tenpo chì par volta gira de le tunpinare. Ste digrassià no te le vidi, parchè le rùmega soto tera e te t’incorzi de la so presensa quando ch’a conpare in qua e in ’à de le montagnole col buso in meso ch’le par d’i vulcani in miniatura. Vardando ben se pol notare de le strissà un tantinelo più in alto de la tera intorno: le galerìe. A sto punto bisogna far chelcossa. El mi vissin de casa, che l’à pavimentà un tocheto del so giardin co de le lastre de cimento, el s’à incorto che là soto a ga da èsserse fato el nido più de quachiduna de ste bestiole, dato che montagnole e galerìe a gh’in saltava fora. un fià in qua e un fià in là, dapartuto. Par sercare de sfantarle l’à scuminsià a doprare diversi sistemi de so invension. El primo jera el metodo del badile. El se piassava arente a una de ste busole: quando la bestiolina meteva fora la testa a spionare, zàchete! na svirgolà col badile e più de qualche volta el faseva centro. Ma ghe voleva na passiensa da frati e na velocità da formula uno. Canbia sistema: ciapa un cassavide belo lungo e tegnendo drio a la strissa che segnava la galerìa, ogni diese vinti sentìmetri pianta zo el cassavide, e anca inte sto modo qualche bestiola ghe lassava le strasse. Prova col carburo: fìcane un tocheto inte ’l buso, fràcalo ben avanti na spana e po bàgnalo in maniera che ’l fassa el gas. E insuma anca questo jutava, ma no risolveva el problema. Passà un tocheto de tenpo, busole e galerìe saltava fora ancora. Sicome che ogni tanto qualche tunpinara, scavando soto el còrdolo de cimento ch’a tien sù la rede, passava anca da la me banda, el problema l’è deventà anca mio. Mi ò lassà stare i modi del mi vissin e vedendo la publicità de ’n artegagno a luce solare, fato a posta par smarassare tute le bestiole ch’a vive soto tera: tunpinare, ponteghini de campagna, sucarole e via discorendo, me lo so’ conprà e l’ò inpiantà in giardin. Quando ch’a gh’è un bel sole, andando vissin a sto articolo, che ’l ghe someja un pocheto a ’n fungo, se sente na spece de fis-ceto: l’è propio quelo che ghe dà fastidio a le bestiole, che cussì le va in serca de posti più tranquili. Sicome el ragio de assion l’è bastansa grande anca el mi vissin gode i vantagi de l’atresso e ogni tanto el m’informa de l’emigrassion de le tunpinare, ormai cunfinà int’un cantunsin de so giardin, el più distante dal confine col giardin mio. Cussì l’à risolto el so problema!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Calcossa deve pur canbiare
No xe nostra abitùdine tratare, so ste pagine, argomenti de tipo polìtico, econòmico o inteletuale ma, davanti a la brentana de manifestazion de protesta come quele che se sta fasendo in sto periodo, no ne pare giusto far finta de gnente e girarse da chel’altra parte
de Mario Klein
|
