|
Dal Basso Piave (VE)
I “Vitelloni” de Musil
 | | La piassa de Musil ne i ani ’30. |
Coreva ’torno i ani ’30. Come al dì de ancùo no fa scàndaeo l’uso del “suv” par aparir… cussì la miseria de ’a prima metà del sècoeo passà scoréa guaiva su ’a magioransa del pòpoeo, co soferensa abitudinaria, ma senpre soferensa. El modo de vìvar el jera, par forsa de abitudine, pi sènplice par scarsessa del streto necessario par vìvar.
In ’sta maniera de vìvar, bastéa poc pa’ straviarse e, magari, trovar na s-cianta de divertimento.
Fata ’sta premessa, par caearse nel tenpo, e ne l’anbiente che alora coréa, eco qualche esenpio de come na “ganga” de amissi del paese inventa qualche maniera pa’ straviarse.
Un fià de nomi posse ancora ricordarli.
Pacèe el caporion par inissiative schersoze da conbinar, Gino, el so fedeìssimo senpre tacà, Cuita, el Gat, el Poaret, ’Nesto,’Ntenòre, Miro canpion de naso, Bùtoea, e a ncora qualche altro.
La disocupassion la jera el mal de abitudine de i ani Trenta. Coréa, infati, la batùa scherzosa che l’inpiegato de l’uficio de colocamento, persona sinpàtica, el ga butà a quei che spetéa un lavoro: “Tosati, voèo ’ndar a lavorar in spiaja a ligar sabion co ’e strope?” El spirito no ’l manchéa, malgrado tuto. E, purtropo, restéa tenpo in abondansa par qualche aventura scherzosa da conbinar.
Pacèe el véa convinto el bon Pàroco Don Giovanni Tisato a ospitar sul teatrin na rècita a regìa de un çerto Travaglin de Cesanova o Passarella de San Donà, un tipo “studià”. El spetàcoeo l’è deventà comedia co licenza de interpretassion da parte de i “atori” in proporsion a i fiaschi che se svodéa (ma de vin), secondo el cànone del “dare da bere agli assetati”.
Na roba seria, inveçe, la lagnansa del bon Pàroco espressa a la guardia comunal (bon omo, serio, de maniere contegnùe, papà de ’Nesto, (Ernesto D’Andrea, zòvane esuberante, fusià nel ’45 da i fassisti, fra i 13 Martiri de Ca’ Giustinian). Dato che la ganga de “Vitelloni” se trategnéa in piassa a ore tardive… (fra ’e 10 e le 11 de sera), a bacajar co toni alti che disturbava i casainghi, Don Tisato l’à pregà la guardia de individuar i disturbatori de ’a quiete noturna. ’Nesto, el fiol de la guardia, sentì in fameja l’incarico riçevù dal pare, l’à informà el Pacèe che l’à fat sta tràpoea. Ciapando na sera che jera de turno par istrussion i fiòi de ’a associassion catòica, la guardia à fermà e identificà na conbrìcoea de scavezzi che coréa fora da ’a canònica, aegri e rumorosi.
Conprensìbie la amara sorpresa del bon Pàroco, vignendo informà che i colpévoi de “schiamazzi notturni” jera i so bravi ragassi…
Ma el clan prova a interessarse anca co l’arte… monumental.
Sul lato nord de ’a piassa, de fassa ’a cesa, frontegiava ancora un cancel de vila padronal (in seguito sparì, vioentando ’a piassa co ’a brutura de ’a costrussion ancora in pie), tronegiava un pissatojo: ricorde ’a marca: Umberto Renzi-Torino, specialista in vespasiani. Da rente stansiava un musset de propietà de do soci particoeari: el Muriol, figura de satrapo de indefinìbie età, voçe de tonaità cavernosa che, a l’aqua par lavarse, preferìa i quarti de vin da bévar. L’altro socio, Gaindo, de paroea sgaja, ma par zonta, szot de na ganba dura che sbandéa de szanca come speaszando un passagio del baeòn. De mistier, al so dir: “mediator de paja e fen”, come se podéa védar da ’a fajoea picada su la siarpa che ghe féa da çintura. El musset el jera el bene comun de i do soci, usà par tirar un caretin co tàtare varie, come anca ingurie, secondo staejon.
El Pacèe, secondo na pensada artistica… l’à fat métar el musset sora el vespasiano rivolto verso ’a cesa.
L’avenimento l’è deventà storico data ’a sorpresa e el scàndaeo patìo da ’e pòare vece che, ancora col scuro, le ’ndéa a messa prima dove, de abitùdine, ’e finìa par piocar dal sono su i banchi.
Quanto a fantasia, qualchedun véa antiçipà, salvo el nome, un genere de conportamento, che un çerto Federico Fellini, deçine de ani dopo, à sfornà un film ciamà “I Vitelloni”.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
No stemo lamentarse almanco a Nadale
Disocupazion, euro in crisi, borsa in calo, aziende che falisse, licenziamenti, proteste violente, amortizatori sociali, manca i schei par far balare l’orso… Ma che Nadale saralo?
de Mario Klein
Memoria viva
I tran de ’na volta a Padova
El bel servissio che faseva i tran a elètrico da gran parte de la sità fin a i borghi e anca verso i Coli Euganei.
I treni de la “Veneta” portava i clienti fin a i confini de la provincia e più in là
de Gigi Vasoin
Da Rovigo
La Storia granda e quela pìcola
de Gianni Sparapan
Da Verona
El miracolo del “campo 60”
de Wanda Girardi Castellani
|
