Da S. Stèfano de Zimela (VR)

Emilio Salgàri

Ritrato de Emilio Salgàri fato da el me amico, el prof. Giuseppe Zuccante.

’Sto ano a ricóre i zento ani da la morte de el scritore Emilio Salgàri. In tanti in te un modo o in te chel’altro i lo ga ricordà, anca qua su Q.C., ma mi a vui farlo come se parlasse de lu come de un vecio zio, de quei che i te sentava su i so zenoci e i te contava le so storie tremende davanti al fogolaro inpizzà che el faséa le onbrìe su par i muri che a te vegnéa anca un poca de tremarela e calche sgrisolon.
A go scuminzià a lèzare i so libri che a jera ancora in quinta elementare che a go ancora un quaderneto indóe che a go scrito el me primo romanzo de aventure! I jera i tenpi che i so libri no i jera mia ben visti da i insegnanti, da la critica e anca da tanti sapientoni, che i diséa che el jera diseducativo, che ’l scrivéa mal in talian, che ghe jera massa violenza e tante falsità storiche e geografiche, che calche intaresse a i ga da ’ver ’vù par avérghela cussita tanto con lu.
Me poro popà e me pora mama però i jera pi ’vanti de do generazion e inveze de proibirme la so letura i me incorajava a farlo. Anzi i me diséa che ghe jera tanta roba da inparare in te i so libri e che de violenza a gh’in jera stà bastanza in te la guera che la jera finìa da pochi ani.
De istà a me sentava fóra in corte soto l’onbra de un figaro che co’ la me fantasia el deventava un àlbaro de la giungla nera. De sera invezze a me metéa a tola mentrechè me fradeleti i faséa i cònpiti, me mama la giustava le robe e me popà el faséa le parole crociate. Vizin a gavéa un bel atlante geografico e el vocabolario enciclopedico Il nuovissimo Melzi e me piaséa a controlare indóe che ghe jera i paesi, i mari, i fiumi e le cità e anca i nomi de le tribù o de le armi o de le piante e de i animài che a lezéa.
E senpre de pi a me convinzéa che le notizie de tuti i tipi che Emilio Salgàri el ghe metéa in te i so romanzi a le jera vere e dopo a go savù che el frequentava le biblioteche par tirarse zo quanta pi roba el podéa. Zerto che el lo faséa par slongare un pochetin le pagine, ma el servéa anca par farte laorare la fantasia e imaginarte i posti, i usi e i costumi e la storia e imedesimarte co’ i personagi che el li descrivéa tanto ben sia par come che i jera vestìi, ma pi de tuto par fàrteli conóssare in te le so carateristiche fisiche e morali, che a te paréa de averli lì vizìn vivi e vègeti.

Schizzo “salgariano” fato par el me amico Antonio Guida da el disegnator Mario Fantoni.

I so protagonisti no i gavéa mia mezze misure: o eroi o viliachi, fedeli fin a la morte o traditori, boni o cativi: e Sandokan, Yanez, el Corsaro Nero e tuti i altri eroi boni i jera forti, leali, coragiosi e generosi, proprio come che insegnava un bel giornalin che a lezéa senpre, il Vittorioso. Me dispiaséa e me rabiava quando i me protagonisti preferiti i le ciapava e i vegnéa sconfiti o mazzà da i cativi, ma cussita a go inparà che in te la vita no la pol mia nare senpre ben e che ga da èssarghe un saco par le robe bele e uno par chele brute.

[torna sopra]