|
Da Rovigo
La Storia granda e quela pìcola
 | | Anca Elio el ’ndaseva a fare la ginàstica… |
La Storia, quela granda ca riguarda i pòpoli del mondo, la vien presto desmentegà. E quela più pìcola, ca riguarda la zente e i fati personali, gnanca no la vien cognossesta. Epure a xe capità de i fati ca ’ndarìa ricordà a futura memoria.
Presenpio uno de Rovigo, che ’l se ciamava Gigi Belini, de fameja socialista, el me ga cuntà che al tenpo del Fassismo – lu el jera putin: so papà jera morto in guera e so mama la jera restà védova co zìnque fiòi – el partìa da casa a l’ora de mezodì, par andare co zinque scudele a torse la menestra de i poariti, ch’i la distribuiva in piaza Roma, che adesso la se ciama Piaza Merlin. E on fassista adeto a la distribuzion – el gavea la macelerìa propio in piaza Roma e a me despiase de no savere el nome che mi a lo scrivarìa volentiera – el ghe diséa “bolsevico” a sto putin, e dopo aver messo on cazolo de menestra in te ogni scudela, el ghe spuava drento so tute zìnque.
E alora Gigi, col sculiero el ghe cavava via da ogni scudela el spuazo e senza mai dire gnente, el ghe portava da magnare a so fradèi. E lu no ’l magnava, parchè el diséa de no avere fame. Mi a penso che na roba cussì la bastarìa par cavarghe la pèle a na persona, ma sicome ca bisogna darghe on tajo a la violenza, a dassemo pèrdare.
Nantro fato ca riguarda on putin, l’è quelo ca me ga cuntà la Giuliana.
A se trata de uno de i fati de violenza criminale ca xe capità al tenpo del squadrismo fassista. La note so ’l dódese aprile del ’21, a Granzete, jera stà copà el capolega socialista, Luigi Masin, in te la so càmara da leto, che na desgrazia pezo no la ghe podéa capitare a sta fameja de poariti. Una de le fiole del morto, difati, dal terore che la ghea passà chela note, dopo pochi misi la xe morta, e nantra, la Malia, che mi a go cognossesta, la ga vivesto par tuta la vita co sto pensiero de avere visto uno de Lendinara copare so papà soto i so oci. Nantro de i fiòi, Cristoforo, el jera za sposà co la Elisa Giolo e da sta dona el ga abù come fiolo Elio. Sto putin, có ’l partìa par la scola comunale el ciapava sgiarà in te ’l dedrìo da tanti ch’i ghe disea “bolsevico”, na parola che lu gnanca no ’l saeva cossa ca volesse dire, anzi el credéa che volesse dire uno ca sbolsegava par via de la tosse.
Al sabo fassista anca lu el ’ndaseva a fare la ginàstica co i altri ragaziti del paese, ma sicome che la so fameja “soversiva” no la ghe cronpava mai la camisa negra, on fassista del paese, visto che sto fioleto el jera vestìo pitosto malamente, el ga pensà de cronpàrghene una nuova, de scarsèa soa. E alora Elio l’è stà tanto contento de sto regalo e par la strada el se stimava on mucio. Ma quando che l’è rivà in corte de casa soa, so mama Elisa la gh’è corsa incontro e dopo averghe cavà la camisa, la la ga sbregà in mile tòchi, e po’ la ga dà peà in te ’l culo a Elio.
Par dire che sto putin el le ga ciapà a casa e fora casa, senza gnissuna colpa, vìtima inocente come tante altre creature del mondo de jeri e de onquò, de le matità de i grandi che no i xe boni de vìvare senza farse del male l’un co l’altro.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
No stemo lamentarse almanco a Nadale
Disocupazion, euro in crisi, borsa in calo, aziende che falisse, licenziamenti, proteste violente, amortizatori sociali, manca i schei par far balare l’orso… Ma che Nadale saralo?
de Mario Klein
Memoria viva
I tran de ’na volta a Padova
El bel servissio che faseva i tran a elètrico da gran parte de la sità fin a i borghi e anca verso i Coli Euganei.
I treni de la “Veneta” portava i clienti fin a i confini de la provincia e più in là
de Gigi Vasoin
Da Rovigo
La Storia granda e quela pìcola
de Gianni Sparapan
Da Verona
El miracolo del “campo 60”
de Wanda Girardi Castellani
|
