Memoria viva

I tran de ’na volta a Padova
El bel servissio che faseva i tran a elètrico da gran parte de la sità fin a i borghi e anca verso i Coli Euganei. I treni de la “Veneta” portava i clienti fin a i confini de la provincia e più in là

La partensa da Piassa Garibaldi de ’l tran che ’traverso via Altinate e via Belzoni ’ndava a Ognissanti.

Naturalmente parlo de prima de l’ultima guera. I me conta che tanto tenpo fà, che mi no’ me ricordo, ghe gera solo un tran tirà da cavài che faseva servissio da la Stassion al Bassanelo, co’ varie fermate; la più inportante gera quea davanti al Pedrocchi. Mi me ricordo invesse i tran a elètrico che, par ’na sità alora come Padova, gera tanti.
El più inportante gera senpre queo che portava da la Stassion in Paltana, fermàndose su ’l Ponte de ’l Corso, Piassa Garibaldi, Canton de ’l Galo, Torricelle, Prà de la Vale nord e sud, Piassa Santa Croce, ponte su’l canale e arivo.
Un secondo tran partiva da la parte orientale de Piassa Garibaldi, passava soto la Porta, faseva tuta via Altinate, Santa Sofia, via Belzoni, Portello, via Ognissanti. Alora no’ ghe gera ancora el conplesso de ’l BI-RI. A Ognissanti ghe gera la “Infanzia abbandonata” e el presidente e più forte sostenitore gera me Zio, av. Luigi. Le fermade gera a l’altessa de via Rinaldo Rinaldi, a Santa Sofia, a metà de via Belzoni, al Portello po’ a la fine. La strada che faseva ’sto tran gera piena de bei palassi e palasseti fin al 1841, quando che xe stà fata la ferovìa fra Mestre e Venezia; tanti òmini de afari e professionisti che gaveva raporti co’ la sità lagunare, se ga fato le case su ’ste strade e in via San Massimo par èssare còmodi de andarghe co ’l “Burchiello” che partiva da Porta Portello. El borgo de ’l Portello gaveva fin al 1841 ’na granda inportansa economica, parché ghe gera boteghe, cafè, magazini; dopo xe tuto sconparso.
El terso tran, manco inportante, partiva dal scominsio de via San Fermo, da la parte de Piassa Garibaldi, passava par Ponte Molino, Piassa Petrarca, Mazzini e Codalunga, sora el ponte de la ferovìa, par tuta l’Arcella fin a Pontevigodarzere. No’ posso dire quale che gera le fermade, parché quel tran lo go tolto solo poche volte che, co’ i amissi de scola e me fradèo, andàvimo a zogare el balon in te ’l spassio par dadrìo del Canpo del Littorio. Serto che ’l gera còmodo pa’ le tante persone che vigneva in sità par lavorare da Vigodarzere e da Cadoneghe.

La fermada in Corso del Popolo de ’l tran che ’ndava da la Stassion in Paltana.

’Sti tran gaveva su ’l davanti el manovratore che guidava co’ le man; tacà el gaveva, che vigneva zo da el alto, ’na corda de curame che lu tirava par farse sentire e ’na canpanela faseva un ridìcolo den-den. In te l’interno la carossa gaveva do banconi, uno a drita e l’altro a sanca, dove che se sentava la zente. La parte par dadrìo gera coverta, ma sensa veri, e gera là che me piaseva stare parché vedevo comodamente el trafico de biciclete, moto, qualche otomòbile e i tran che se incrozava.
Do altri tran partiva da Piassa de ’l Duomo; i gera precisi de i altri, ma i faseva un servissio tuto particolare, soratuto come la quantità de strada. I faseva via Tadi, dopo i ciapava la strada de i Coli Euganei fin a Tencarola. Qua uno tirava drito, se fermava a l’incrozo par la Montecchia, a Praglia, a Bresseo, a Treponti e finiva la corsa a Villa de Teolo, prima de ’l scominsio de la salita. Quando che gera za autuno e in inverno, el Papà ghe dizeva a la Mama: “Porta i tosi in tran fin a Villa e po’ fè ’na passejata. A le oto de sera se trovemo da Maccato.” Maccato gera un omo alto e grosso, co’ do grandi bafi neri che ’l pareva Vittorio Emanuele II; el gaveva ’na bona tratorìa su la sanca de ’l scominsio de la salita. El gaveva la spessialità de bei spéi de oseleti da ’l bèco gentile. Me Papà lo saveva e el prenotava. Becafighi, fiste, finchi, lugarini: i gera un piato da re, soratuto se conpagnài da fete de polenta che se frizeva in te la lecarda messa soto el spéo. El Papà ne gaveva insegnà a magnare i oseleti: lassàvimo solo el bèco e i ossi più duri.
L’altro tran, a Tencarola, svoltava su la sanca, passava per Abano e se fermava su la piassa de Torreglia Bassa. El gera el tran preferìo da i tosi e le tose che, rivà là, scominsiava de le longhe passejate verso el Rua e el Venda. Mi, in te i primi ani de ginasio, gavevo fato ’na bona amicissia co’ un me conpagno de scola, Enrico Verson, fiolo de un bravo mèdego. De inverno ’ndavo da lu a studiare in quel splendido palasso de proprietà de so papà che xe sul canton de sanca fra el Prà de la Vale e corso Vittorio Emanuele II. Ma in istà el me invitava a casa sua su i Coli. Ciapavo el tran in Piassa de ’l Duomo e smontavo a Torreglia Bassa. Qua el me mandava un birocin tirà da un cavalo e ciapàvimo la salita par Castelnuovo. Rivà al simitero de Torreglia Alta, lassàvino la strada provinciale e gìràvimo su la sanca, drìo de ’l simitero, par un sentiero che passava davanti a la cesa e ’rivàvimo a la belìssima vila in mezo a àlbari, vigne e piante, che te meteva ne le condission de védare un bel paesajo. La prima volta che so’ stà là, el dotor Verson me ga contà, fra le altre, do robe che me xe restà inpresse ne la memoria. Primo, quea bela vila un tenpo gera de el abate Barbieri, el famoso cantore de i Coli Euganei, amigo de Facciolati; el gera stà sepelìo definitivamente co’ tuti i onori in te la pìcola cesa, là tacà. Secondo, su par zo un secolo prima ghe gera stà ’na causa davanti al pretore fra la padovana Torreglia e la visentina Breganze par védare quala de le do podeva ciamarse la prima vera “creatrice” de ’l gustoso piato de ’l toresan, el colonbo selvàdego tignù al scuro in ’na tore, inpinìo de magnare, lavorà in te l’ojo e messo, co ’l pien, al spéo. La causa xe ’ndà ’vanti par mesi; xe stà scoltà valanghe de testimonianse; xe stà scomodà parfin el nome de ’l Petrarca. Xe ’ndà a finire che ’l pretore, par no’ scontentare nissun, ga deciso che tuti do i paesi gaveva el dirito.

In Piassa del Domo partiva i tran che ’ndava a Villa de Teolo e a la Piassa Bassa de Torreglia.

Ma Padova, oltre a i tran , gaveva un magnifico servissio de treni a scartamento ridoto, fati da la “Veneta”, la socetà fondà da quel grandìssimo industriale che xe stà el on. Vincenzo Stefano Breda. La Stassion centrale se ciamava Santa Sofia e la gera in mezo a le do vie Morgagni e Jappelli dove che ’desso ghe xe ’na strada co’ àlbari, piante e aiuole. Da là partiva tre treni. Uno ’ndava a Bagnoli, passando par Albignasego, Maserà, Cagnola, Cartura e Conselve. Dato che ne ’l giugno de ’l ’43 la me fameja xe sfolà a Conselve, sede notarile de ’l Papà, mi go dovudo, par tuto l’ano scolastico 1943-44, in III Liceo “Tito Livio”, alsarme a le quatro e meza de ogni matina par ciapare el treno de le sinque e tre quarti par vignere a Padova. Più de qualche volta, semo stà mitralià da ’l caciabonbardiere inglese “Pippo”. El ritorno, senpre un problema pa’ i alarmi.
Un altro treno ’ndava a Piove di Sacco co’ poche fermade. Mi quel treno lo go ciapà ’na volta solo; a Piove ghe gera ’na coincidensa senpre a scartamento ridoto par andare a Adria. Quea volta so’ ’ndà a Adria par zogare ’na partìa de balon contro ’na squadra locale.
El terso treno gera tanto inportante parché, passando par Ponte de Brenta, Stra, Fiesso d’Artico, Dolo, Mira, Oriago, ’rivava a Fusina su l’orlo de la laguna de Venezia. Inportante parché fin al ’35 Mestre gera unìa a Venezia solo da la ferovia. Quindi, andando a Fusina, te podevi ciapare el vaporeto a do piani che te portava fin a San Marco. El viajo gera splendido parché in treno te vedevi tute le belìssime vile venete, po’ se gera ’na bela giornada, el percorso in laguna deventava particolarmente atraente e sugestivo. Mi conservo un ricordo maravejoso par quee quatro, sinque volte che go fato, co’ la fameja, quel viajo.

[torna sopra]