|
Da Lendinara (RO)
Cuore de piera
 | | La Pierina la vendeva zigarete e tuto quelo ca ghe va drìo… |
La pianzèa el morto par ciavare el vivo e intanto, in mezo a le so lagne, la te sgnacava merce del tenpo de Noè. In te na botegheta tacà a la piaza de na citadina polesana so ’l Canalbianco, la Pierina, famosa par la so piociarìa, vendeva zigarete e tuto quelo ca ghe va drìo, ma anca profumi e robaltarìa de ogni sorte. La jera senpre ingrotolìa dal fredo parchè tacare el termo jera na spesa e la se sfregava brazi e man in continuazion. Granda come un scheo, so ’l déo mezan la gavèa on anelo che ’l pesava più de ela, quasi na scultura co’ in mezo on rubin grosso cofà on duron e na giràndola de brilantini intornovìa.
Sgionfa de schei, tacagna e senpre co ’l naso sora la boca, la Piera gavèa on spasimante. ’Delmo Tronbeta el la adorava ’ncora prima che la ’reditasse on quarto de ’l paese, fin da puteloto, quando che ’l la gavèa conossù inte ’l tabachin de so zio e indove el fasèa straje de tuto quelo ca se podèa fumare. Anca se l’amore xe orbo, ’Delmo ghe vedèa ben, però el tirava el fià par modo da dire, malà come che ’l jera de enfisema polmonare. Inte i ani ’50 jera on afare serio ’vere magagne a i polmoni, ma el dotore el gavèa lassà qualche speranza de ’ndar ’vanti solo se ’l smetèa de fumare dal dito al fato, senza tintonare gnanca on minuto de più.
“Vègna guai, ma morte mai” ghèa pensà ’Delmo; “vorìa ca me restesse el tenpo da convinzare la Piera a star co’ mi!” Par zonta, ghè da dire che la paura più granda de ’Delmo jera quela da morire stofegà, in mezo a tuto che ’l sborsegare senza rèchie. So le prime a ghe parèa da deventar mato senza el fumo e pa’ no èssare tentà no ’l ’ndava gnanca più in botega. Se ’l passava par lì el la saludava co’ la man o sinò, se ’l ghèa alzà un fià el gonbio, el se fasèa corajo e ’l ghe butava un baseto o ’l ghe disèa calche paroleta dolze co la porta in sbacio. Na matina, vegnendo fora da ’l fornaro, dove che tute le matine passava la Piera a conprarse meza rizeta de pan ben cota, el ga pistà na roba in parte al marciapiè, on tòco de fero ca slusegava. L’anelo de la Piera, lì par tera! A ghe parèa inpossìbile che ’l fusse lì e da ’verlo catà propio lu, prima de che qualcun altro lo ghesse tolto sù e pensà da conprarse na màchina o do tre camarete o portà al Monte de Pietà. Varda ti el destin!... No ’l vedèa l’ora de portàrghelo e dopo diese minuti el jera lì, intel tenpio de la tentazion. La Piera, sbasìa da la sorpresa, la ga ringrazià e senza tante cerimonie la volèa destrigarse del dèbito come ca fa la zente par ben. Ma ’Delmo jera on omo senza tante greste: cossa darghe? La ga pensà sù na s-cianta e quasi de scondon la ga messo in man on sacheto de nailon co’ drento do steche de Nazionali co ’l filtro (a ghe parèa destranio dàrghele senza). Lu ga tirà sto paco, a testa bassa. Ogni roba ca vignèa da la Piera la ghe parèa benedìa da la Madona in persona, però in chel momento el ga sentìo tanti sponcioni da soto a sora, par tuto el so corpo da sardelon. Anca se ’l jera on omo a la man, ca se contentava de chela spiera de sole ca ghe vigneva anca a lu, senza domandarla in carità, in chel momento ghe parèa de ’ver perso anca l’unico dirito ca ghe jera restà al mondo. A zena no l’è stà bon da mandar zo gnanca na frégola, ma ’l ga dà la colpa al fredo. El s’à colegà inte ’l leto co’ i so do cussini drìo la vita e cussì lo ga catà el vizin de casa ca jera ’ndà a portarghe tre fritele, do dì dopo.
El belo xe che ’Delmo no l’è morto sfissià, come ca se podèa spetarse, el ga tolto el disturbo senza far bacan, forse inte ’l mezo de on bel sogno, de sicuro senza patire massa. El bruto xe che l’è na storia vera e che, tante volte, fa manco male na spierà so ’l muso che on cuore de piera.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
On mondo senza done
Cossa sarésselo sto mondo se no ghe fusse le done? Non solo parché xe lore che continua la vita, ma anca parché la vita stessa, se no le ghe fusse, la sarìa dessavìa, insulsa e crudele. El male xe che l’omo no ’l ga gnancora capìo el valore de le done!
de Mario Klein
Da Verona
Le maestre
de Wanda Girardi Castellani
|
