Da Isola Vicentina (VI)

Profumo de primavera

Sédase ani gnancora conpìi mi…

Ancora ’desso, dopo tanti ani, me li cuno sti bei mominti e pensando a chel mondo che ga conpagnà la nostra zovinessa, a sto lì, chieto, volendo gustar fin ’n fondo la so dolcessa.
La xe stà come na svanpà de gioia chel’abrasso de Sarocheto (Parrocchia di San Rocco), che ne ga donà la piasseta piena de soe e, anca se tuto xe sbrissià via so ’n supion, la tenarèssa xe stà granda, tanto da conservarla ancora so ’a memoria.
A volte a saro i oci e li vedo davanti sti viseti, amissi de tanti zughi che ga ’ncolorìo de rosa la me tènara età: Graziano, Rosinbo, Tonin, Renso e Renato... e le grassiose tosatèe, l’Alverina, la Irma, la Roseta e la Gema... Quanto zugare insieme, ’torno chéa misteriosa figura che jera chel santo foresto.
I gera lunghi e fridi i inverni de chel tenpo; cossì neve e giasso ne faséa bàtare i denti par misi, anca se, co na vecia slita, so i montesèi drìo casa se se divertìa fin quando, moji sbonbi, co i diàvoi so i déi de pìe e man, sercàvimo rifujo vissin ’a stua de ’a mama a scaldarse anca ’l sgossarin.
Ma quéo che me ’ncantava pi de tuto jera la caliverna picà via so ’e siése e vece ramà, quando dopo na note de nibia so ’n matin pien de soe, co ’a fantasìa, se podéa ’mirar on fantàstico mondo fiabesco fato de Dame e Cavalieri, cavài infiochetà a tirar carosse, castèi e tori merlà e tanto altro, fin quando ’l calor del soe tuto desfava.
E finalmente, dopo ’l fredo spunciante de i “dì de ’a merla” (ultimi tri dì de genaro), se podéa scoltare ’l tepido canto de ’a primavera, el resto lo faséa la caressa del vento che, so ’a verde radura de i montesèi, faséa spuntar mace de viole e fioriti de ogni sorta.
Jera quéo ’l tenpo del “Brusamarso”, tanto caro a nantri deventà ormai tosati. Se fasévimo in quatro pa’ costruir na alta “crosara”: la sarìa stà come on gran pajaro co ’l so meale in meso e ’torno se ghe posava fassine de cane de sorgo, una sora l’altra fin a sinque, siè metri de altessa, tegnéndoe ligà co ’l fil de fero.
Chéa sera, soto ’n celo stelà, in conpagnìa de na luna curiusa, quanta jente ’torno, có se ghe daséa fogo a la canara! L’urlo de Tarzan daséa el via al zugo pi beo del mondo… e, fra ’n sbèco e ’n canto, a se sentìa sigare: “El Bibò, el Bibò-marso, el Bibòòò” e, drioman che ’l fogo se sbassava, a se vedéa ste longhe lengoe de fumo e fogo che, smissiàndose, le se sparpanava verso ’a ceseta de Sarocheto, come a volerla caressare.

Quìndase ani ela…

Dopo tanto sbecar, el fogo chietava el so àrdare; ’lora scumissiava i salti, pa’ rivar al de là del mucio de stissi fumanti e de sènare boénte, fin a no aver pi fià.
Ricordi distanti che vien inamente, s-ciantinèe de contentessa fin a quando, so che l’ultima volta de Brusamarso, lassàndome guidare dal core inamorà, a far el “Bibò” so’ ’ndà co ’a contrà de Canova... El fato jera che sta contrà, par nantri de San Rocco, la jera considerà el nemico nùmaro uno de ogni zugo che se naséa contro.
Chéa sera, so ’a verta canpagna, a l’apuntamento co quéi de Canova go catà anca ’n puchi de ’a me contrà; a gnente xe servìo dirghe el parché de sta me decision. ’Lora xe scapà paròe grosse come “Traditore” e anca calcossa d’altro.
Ma ’l belo ghéa ’ncora da vignere parché, na volta finìo sto giro de “Bibò”, i tri cugini de ela i ga dito de nare a bagnarse el bèco dal zio Gidio Brun, che ’l staséa so na gran fatorìa in meso i canpi.
’Pena semo nà rento in cusina, paron Gidio ga tirà fora ’l fiasco e po’, ciapà in man na sestela, el ga fato ’n anton de nose e nosèe sora ’a tola.
Mi però, che gera la prima volta che naséa rento sta casa, go scumissià vardarme ’torno come a sercar calcossa, cossi, có la xe vegnesta fora dal tinèo insieme a so mama, no go vudo oci che par ela.
Xe stà ’lora che ’l filibustiere de so cusin Cesare el ga sigà “Zia Melia, ècolo qua el toso che ve porta via la fióla.”
Sùito go pensà de ’nfilar la porta e nar scóndarme so ’l scuro de ’a canpagna, ma po’, alsà ’l viso, me so’ incontrà so i oci de ela e... no go pi vudo paura, me so’ sentìo forte, pronto a bataliar co tuti quéi che da ’n ano, e co ogni sorta, gavéa sercà de separarne.
Sédase ani gnancora conpìi mi, quìndase ani ela.
Có ghe penso, sento ancora el profumo de ’a primavera.

[torna sopra]