Par na ricorensa

La balansa

… vien drento in botega un pretin, el se avissina al bancon…

A go leto su un libro sto fato che me ga ’assà de stuco e che ve vojo contare, parché el me pare na bela roba da condivìdare co tuti.
Xe sucesso ani indrìo che na sioreta, vestìa anca decentemente, co’ na facia trista e pàida, va dentro in te na botega de casoin, la se presenta davanti al bancon e, vardàndose intorno, a bassa vose parché nissun la sentisse, la dimanda al paron se ’l podéa farghe credito par na s-cianta de roba da magnare. Co’ tanto riguardo e co’ gentilessa la ghe spiega che so marìo el se jera malà seriamente, che ’l gheva perso el lavoro e che casa la gheva quatro fioli da darghe da magnare.
El casolin el ghe risponde piche e el serca de mandarla fora co’ brute maniere, par no sentirla piagnucolare. Conossendo la so situassion e pensando a quele creature, sensa colpa, che la gheva a casa, la insiste:
“La prego, sior, ’pena podarò, la pagarò! No ’l dubita!”
El casolin, pi secà de prima, el ghe risponde che no ’l podeva farghe credito e che se proprio la ghin’eva de bisogno, la ’ndasse da n’altra botega pi ’vanti. Nel fratenpo vien drento in botega un pretin, el se avissina al bancon e, sensa volere, el sente quelo che sta pora dona jera drio dimandare al casolin. Sto pretin alora, inpietosìo, el ghe dise al paron de la botega de darghe a la sioreta quelo che la ghe suplicava e che dopo el gavarìa pagà lu la spesa che sta dona gheva de bisogno par sfamare la so fameja.
El casolin, senténdose giudicà e invità a dare reta a sta fémena, co un fare da sgrandesson el dise a la dona de darghe la lista de la spesa. La dona, umilià e rassegnà la xe restà sensa parole, la ga sbassà la testa e, co’ passiensa, la ga tirà fora un tòco de carta, la ga zontà calcossa, scrivendo al momento do righe, e la ga posà el folieto sul piato de la balansa, come gheva dimandà el paron. Fin che la dona posava el tòco de carta, el casolin, vardando la dona e el prete, el sentensiava che ’l gavarìa messo su la balansa tanta roba quanto pesava chel folieto. Meraveja de le meraveje, el prete e el casolin ga sbarà do oci da bo có i ga visto el piato da la balansa, dove la dona gheva posà el folieto, ’ndare zo de colpo e restare sbassà come se ghe fusse stà messo un gran peso. Alora el casolin, vardando la balansa el dise:

El nome de chel pretin el jera Karol Wojtyla…

“Xe inpossìbile!”
El pretin ghe xe vegnù da rìdare e el vardava el paron butare sù, su st’altro piato, sacheti de roba da magnare… Anca se ’l meteva roba su roba, el piato de la balansa no ’l se moestava. El casolin no ’l saveva cossa fare e el restava muto davanti a sto fato. Ciapà da la curiosità, el tole in man el folieto: no la jera na nota de la spesa, la jera invesse na preghera che la dona gheva scrito al momento sul folieto prima de métarlo su la balansa e jera scrito: “Signore, ti te cognossi la me situassion e te sè cossa che go de bisogno, me fido de ti, so’ ne le to man!...”
A sto punto el casolin, sensa dire na parola, el ga dà a la dona tuta la mercansia che ’l gheva messo su la balansa. La dona co un gran soriso de riconossensa la ga ringrassià e la xe ’ndà fora da la botega co la so sporta piena de roba da magnare. El pretin alora el ga tirà fora un bilieto da 50 disendo al paron:
“Eco, ’desso semo in do a savere cossa che pesa na preghera sincera!”
El nome de chel pretin el jera Karol Wojtyla e, sto fato el xe stà tirà fora dal libro de le so memorie par dire quanto xe forte l’efeto de na preghiera sincera e, quanto costa poco métarse ne le man del Bon Dio ne i momenti de paura e de necessità.
No volemo desmentegarse che, al 2 aprile de sete ani fà, Papa Giovanni Paolo II xe morto, lassàndone el so gran insegnamento de Fede e Amore.

[torna sopra]