|
Editoriale
Dove catare el corajo?
In sto tenpo, almanco 7 italiani su 10 se fa sta domanda e nissun xe bon de darse na risposta. Se parla, se stròlega, se promete, ma intanto ghe xe chi no ghe la fa a spetare e el decide de farla finìa
El Veneto xe la region che conta el nùmaro pi alto de inprenditori che se tole la vita, esasperà da la situazion econòmica de la so azienda che no xe pi in grado de nare ’vanti par i debiti che se ga mucià, pur vanzando i schei da privati e soratuto da Enti pùblici par lavori za fati. Né onestà, né fameja o boni principi xe in grado de vìnzare la vergogna del falimento e de l’èssare costreto a métare so na strada tanti lavoratori dipendenti.
Se no go capìo male, a fine marzo, da l’inizio de la crisi, i xe almanco 37 i suicidi de pìcoli inprenditori e artigiani nel Veneto; in tenpi de recession, la lista se slonga col resto de i pori cristi che ga preferìo la morte, davanti a na domanda de rinborso de 5mila euro da parte de l’Inps, o parché la banca no ghe inpresta mile euro par tirar ’vanti fin a fine mese, dopo che uno el ga perso el laoro.
Tute storie de grande soferenza e disperazion, che no pare avere fine, parché tra el dire “te juto” e el “dare l’ajuto” ghe xe senpre de mezo el mare de la burocrazia, de la politica, de la coruzion e de l’egoismo.
Le iniziative no manca, come no manca le denunce par le ingiustizie subìe da chi ga speso la vita pa ’l so laoro e par l’ingegno de darghe laoro a i altri: dopo el funerale de l’artigian de 59 ani de Noventa de Piave (Venezia), che se ga tolto la vita a causa de la crisi econòmica che gavéa colpìo la so atività, strozà da i “crediti non riscossi”, l’organizassion de i artigiani de San Donà de Piave ga sùbito mandà on duro comunicato al Presidente Giorgio Napolitano, al premier Mario Monti, al governatore veneto Luca Zaia, fasendo capire che no se pole far passare par “suicidio” l’ato estremo de on omo, pìcolo inpresario o solamente operaio, che no se sente tutelà ne i so diriti.
Ne i ultimi mesi, anca l’inprenditore edile padovan Giovanni Schiavon, no ’l ghe la ga fata a spetare inutilmente l’arrivo de 200mila euro che ghe serviva par no mandare in cassa integrazion i so dipendenti. Na setimana fà, altro inpresario edile de Sospirolo (BL), che se còpa, esasperà da na situazion lavorativa difìssile: el gavéa da incassare tanti schei da pùbliche aministrazion e da privati, che però no rivava mai.
A sto punto uno el se domanda quante xe le persone che ga oncora da tòrse la vita prima de métarghe rimedio a sta emergenza del sistema econòmico che va a colpire l’esistenza. E qua vien ciamà in causa Governo, Region, Banche e socetà civile.
Ma… ghe xe on ma: anca el sìngolo individuo el ga da intervegnere par tenpo nel so equilibrio interiore, el ga da inparare a conbàtare la pressia, la paura, la confusion, puntando drito al raporto co i altri, a la gioia, a l’amore, a l’armonia e a la beleza. E soratuto el ga da farse vegnere in mente tuti i pìcoli ostàcoli che ’l ga superà nel corso de la so vita: da quando el ga sporcà de inchiostro el quaderno de bela copia a righe, al giorno che ’l ga sbusà na roda de la bicicleta, senza avere drio pèza e màstice par giustarla.
“Pensa positivo” diseva el poeta Tonino Guerra, ché l’otimismo xe el profumo de la vita: “c’è sempre il sole dietro le nuvole più scure.” E parfin co la preghiera e co la fede, secondo na ricerca americana, se pol conbàtare la depression e catare el corajo necessario par superarla.
Da la Pasqua, on augurio de rinàssita par tuti e in tuti i sensi.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Dove catare el corajo?
In sto tenpo, almanco 7 italiani su 10 se fa sta domanda e nissun xe bon de darse na risposta. Se parla, se stròlega, se promete, ma intanto ghe xe chi no ghe la fa a spetare e el decide de farla finìa
de Mario Klein
Lingua, dialeto e vita
Na vera esperiensa de vita
“Il dialetto trevigiano che si parlava sotto i banchi di scuola…” Storie de stranieri ormai integrài da noaltri e del so raporto co la lingua veneta
de Daniele Marcuglia
Ciàcole visentine in lingua foresta
“Un baseto da Sandrigo”
Leonardo Carlotto da Sandrigo ga rancurà in pareci ani un stramaro de cartoline che rafigura el so paese
de Giordano Dellai
Da Verona
A proposito de medisine
de Giacinta Dall’Ora
|
