Ciàcole visentine in lingua foresta

“Un baseto da Sandrigo”
Leonardo Carlotto da Sandrigo ga rancurà in pareci ani un stramaro de cartoline che rafigura el so paese

El colessionista Leonardo Carlotto.

Na cartolina da Sandrigo par dirghe a i propi cari: “Vardè che so’ ’ncora vivo!”. Xe stà pareci i soldà aleati, inpegnài sul fronte talian ’nte la prima guera mondiale, a métare rento ’nte la busa de la posta na cartolina de Sandrigo, conpilà in lingua foresta, par mandare da lontan un baseto de amore a la mojere o darghe un strucon de afeto a un famejare.
L’interessante notissia vien da la colession, granda senpre e dopo ’ncora, de imàgini d’època de Sandrigo de Leonardo Carlotto, industriale pensionà co la passion par la storia, che ga rancurà anca na serie de cartoline spedìe ’nte la Grande Guera da soldài inglesi e franzesi de passajo par Sandrigo. Un vero tesoro de imàgini e de testi, catà fora ’nte i vari mercài del Trivèneto, ’ndove riva anca materiale che vien da fora Italia, e da na passiente risserca ’nte i archivi privati, tra cui el pi inportante xe queo de vila Sesso Schiavo a Sandrigo.
Sta documentassion xe vignùa bona a Carlotto par scrìvare, co ’l stòrico locale Leonardo Pianezzola, el libro “Sandrigo 1915-1918. La Grande Guerra in un paese di retrovia”, presentà in bibioteca a Sandrigo el 16 febraro scorso e in véndita a disdoto euro ’nte la Cartoleria Oliveti, ’nte l’Edìcola Centrale, a la Libreria Big Book e al Punto Contabile, senpre a Sandrigo.

Vedute de Sandrigo, de la colession Carlotto.

In tanti ani de colession Leonardo Carlotto ga rancurà quasi sinquesento imàgini d’època de Sandrigo: ghe xe anca parece copie de fotografie, ma le xe stà tirà sù istesso par un motivo o par l’altro, come par esenpio la particolare qualità del francobollo o pi spesso par el testo parecio interessante che ghe xe drio la cartolina. Sta passion ga portà Carlotto a curare anca el libro “Sandrigo. Album di famiglia”, vegnùo fora na desina de ani fà co sentenari de foto de Sandrigo da la fine de l’Otosento a la metà del Novesento.
«Le cartoline spedìe ’nte la guera – spiega Carlotto – de sòlito le xe sensa francobolo, messe rento ’nte na busta. Sicome gera proibìo par i soldài specificare el lógo de partensa de la létara, alora i soldài, volendo far capire istesso a i famejari ’ndove che i se trovava, ghe zontava na cartolina che rafigurava la località de passajo. Na pensata geniale che ciapava pa ’l sesto la censura del tenpo de guera.»
E tra sti soldài, par esenpio, ghe gera un abrussese de Sulmona che afermava de scrìvare “dagli estremi lembi d’Italia”; opure un inglese che tegneva bona so sorela co un “I am glad to say I am quite well”; o ’ncora un tènaro marìo fransese che, ’ntel pregare la so Lea de ricordarse ’ncora de lu, ghe spediva da Sandrigo “les meilleures caresses”.
«E l’istessa roba – el ne conta ’ncora el colessionista de Sandrigo – i faseva anca i militari nati a Sandrigo inpegnài a l’èstero, solo che stavolta le cartoline ga de le imàgini foreste.»

[torna sopra]