|
I casi de’a vita
’Na sera de agosto
Ghe xe de i periodi, ne ’a vita, ne i quai ’e robe no’ va tanto ben. Scomissia tuto co ’l fisico che ’l ghe ne risente de i ani e tuto deventa come ’na lanpadina coando che ghe xe sbalzi de corente e se continua co’ tuto el resto che ’l deventa ’na conseguenza. Ghe xe chi che se scoraja e chi, inveze, serca de tirarse sù. E xe stà proprio el caso de un me amico e de mi che se semo trovà tuti do’ so un periodo bruto.
Cossì gavemo avùo ’na idea, tanto par no pensarghe e tirarse un poco sù. Sto me amico el gaveva un metaldetector e ghe piaseva ’ndare par canpi in serca de fortruna… mai trovà gnente de inportante ma, de tanto in tanto el faseva eò stesso un giro. Quéa volta là, gavemo pensà de usare sì el metaldetector, ma in spiaja e de sera. I dì de agosto i jera incalcà de zente a gòdarse ’e ferie. Chi che podeva stava sol posto ’na setimana, quìndeze dì e chi che no podeva, partiva eà matina e tornava eà sera. Come senpre ’na gran confusion. Onbreoni uno vissin l’altro, sugamani so eà sabia co’ zente destirà de sora che parla de ’e so’ robe che, automaticamente ’e deventa de dominio pùblico parché, da eà distansa de un metro, a meno che uno no ’l sia sordo del tuto, xe inpossìbie no’ sentire.
Tositi che pianze; quei un fià pi grandi che zuga el baeon, che puntualmente el va a finire sol signor calmo che leze el giornàe e che, so’ chea ocasion el deventa ’na belva. ’Na vera e propria baraonda e no’ me xe mai stà ciaro come che se possa vìvarla, considerando che tanta zente se parte da in maeora e eà fa un saco de strada par rivare e dopo eà ghe ne fa ’naltro saco par tornare e bastarìa soeo questo par èssare stufi… Mah... misteri de ’a “psiche umana”.
Comunque sia, de sera eà spiaja eà jera tranquìa. Eà jera eà sera de Feragosto; intorno, qua e là, ghe jera soeo de ’e copie de morosi che se spissegotava. El metaldetector el sonava in continuazion, ma senpre par robe de poco conto: qualche ciapeta par i caveji persa da qualche signora, qualche euro e cossì semo ’ndà ’vanti par un paro de ore.
El me amico, a un serto punto, el ga provà a sondare in riva al mare, dove che vien a finire l’onda. Dopo pochi metri, el rilevatore el ga comissià a sonare co’ ’na serta insistenza. Go scomissià subito a scavare, so eà sabia se fa presto e no costa fadiga. Dopo du minuti e a ’na profondità de diese sentìmetri, co ’e man go sentìo calcossa: eà jera ’na pìcoea caèna de fero, eà pareva soeo quea e invesse, insieme, xe vegnùo sù anca un crocifisso de diese sentimetri par venti, no’ ancora ossidà, segno che no ’l jera stà perso da tanto. El pareva uno de quei crocifissi che de ’e volte se vede al colo de i missionari... Jèrimo contenti come che gavéssimo trovà un tesoro e questo soratuto parché gavévimo un fià de fede e se ’e robe so chel periodo no ’e ’ndava ben, quéo el pareva èssare un segno… come che qualcuno ne gavesse ’ito: “Tosi, no stè pèrdare eà fiducia!”
Sarà stà queo o no gavarà significà gnente, fato sta che dopo poco ’e robe ’e ga scomissià a ’ndare mèjo, in tuti i sensi. Chel crocifisso, dopo un periodo ghe ’o gavemo dà a un amico che el gaveva pi bisogno de noialtri, de stìmoi par ’ndare ’vanti. Oncora oncò, quando che se incontremo, sto me amico e mi, ne basta vardarse e xe come che faséssimo un longo discorso che ’l comissia cossì: “Te ricòrdito chea sera de Feragosto?”
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Valori e regole
Se pole creare, stabilire e rispetare le regole senza avere valori? E se pole avere valori senza la conossenza e el rispeto de le regole? El mondo, la socetà, la vita civile gai bisogno de valori o de regole?
de Mario Klein
Da Belun
Na storia del dì d’ancói
de Luigina Tavi
Da Thiene (VI)
El casotelo
Un posto màgico dove, via dal mondo, me popà, ’passionà de osèi e de cacia, passava el so tenpo lìbaro
de Bepin Daecarbonare
Da Verona
Un museo par Nino Pozzo
A trent’ani da la so sconparsa
de Lucia Cozzolino Masotto
|
