| de Lucia Cozzolino Masotto |
|
Da Verona
Un museo par Nino Pozzo
A trent’ani da la so sconparsa
 | | Ani ’50. Nino Pozzo con Tony Bogoni; sul fondo, el logo del Teatro Mondo Piccino. |
“Brutta carognassa spussolentoria! Brutta faccia da cicolatin purgativo!” se sentiva sigar apena el sipario el vegnéa tirà indrìo. Un tendon tirà da una parte a l’altra de la corte, tegnù sù da una soga par destèndar le robe, poche careghe sconpagnade e scominsiava el grande spetàcolo del Mondo Piccino. I butini lo aspetava come le prime sirese de stagion e i meteva da parte la mancia par poderse pagar el bilieto. Se aspetava i Buratini de Nino come se aspetava la procession del Santo o el carneval.
Quando l’arivava tuta la maraja, anca i grandoni su i quìndese-sédese ani, sganciava i diese franchi che ocoreva par védar i buratini.
A Nino Pozzo non ghe piaseva farse védar, el voleva restar, insieme con el so socio Toni Bogoni, l’elemento magico, invisibile, che faseva móvar le robe e le faseva parlar. Ghera butini che riussiva a andar drio al tendon par védar come faséa a móvarse principi, draghi e principesse che contava la so storia, intanto che una musica senpre piassè forte e svelta la ghe dava el pathos a la sèna, con un gramofono che vegneva fato partir al momento giusto e faséa saltar in piè tuta la platea che tifava par l’eroe. Nino el faséa finta de non védarli par non criarghe.
Del resto i buratini faseva parte de i divertimenti più antichi: i ghera a la corte de i re, ma anca ne i anbienti più poveri se podeva far vìvar qualsiasi roba e darghe un’anima a una stropa o a una patata, faséndole móvar e contar le storie, da i paladini de Orlando a quele de le pene del porocan schissado soto i piè del prepotente de turno.
Fin a qualche tenpo fà el buratin l’è sta visto come un spetàcolo sensa valor e sensa inpegno, ma non l’è così: l’à stigado la fantasia e l’estro de butini che magari dopo i è deventati de i grandi artisti.
Ma tornemo al punto: da trent’ani non ghè più con noialtri el grande Nino Pozzo. Dal 1920 al 1948 l’era stado anca ator ne le filodramatiche, tanto che ne la prima stagion del Teatro Romano del 1948 l’aveva interpretà La Passion, fasendo la parte de Cristo. I lo voleva a Roma, ma lu l’aveva preferido star a Verona. A far spetàcolo de buratini l’aveva scominsiado del 1923, catando sù l’eredità del grande Francesco Campogalliani de Mantova, fasendo sù con cartapesta, colori e tocheti de stofa i so buratini. Più avanti anca i scultori Dido Avanzi e Umberto Brunelli aveva scolpido in legno tanti so buratini, creando de i tipi particolari come Fasolino e Sandrone, che parlava con acento bolognese. Raramente el faseva spetàcolo drento i cinemini de tersa vision de le parochie; de solito lu l’era in piassa, ne i slarghi de le strade dove vegneva grandi e picenini. Se non gh’era careghe in bisogno i se sentava par tera. La publicità se la faseva tacando via i volantini su i muri, perché alora se podeva farlo sensa ciapar multe e sensa che i paroni de casa ostregasse. Con el so socio Toni Bogoni el girava par tuta la cità e la provincia.
Apena vegnudi fora da la tragedia de la seconda guera mondial, con le macerie che ancora incornisava la cità, la gente gaveva voja de passarse via; la TV non l’era gnancora in tute le case e al cine se ghe andava sì e no una volta a la setimana. I buratini i passava come un divertimento de ripiego, perché, come al solito, a quel che se ga non se ghe bada. I mostri stava incantadi a védar quela roba fata sù in economia, che deventava viva, che pareva magica. I sighi i vegneva fora da soli quando che el diavolo butava fogo da la boca.
Un Museo? Ghe n’è za più de uno par i buratini, ma par el buratinaio no. Così Verona la sta pensando de far un Museo proprio par Nino Pozzo, nato a Verona in Piassa Cittadella el 7 febrar 1901 e morto l’11 genar 1983.
Marco Campedelli, che à continuà el lavoro del grande Nino, se sta dando da far perché el so maestro gabia un momento de ricordo. Ne la so eredità ghè tantissimi fondali pituradi da Nino, ma anca da pitori come Mario Flangini e da altri; ghè anca più de tresento buratini che deventava vivi soto le so mane e con la so voçe con canovassi indove el canbiava i discorsi de continuo; tra i tanti ghera anca I Promessi Sposi. Ma Sandrone e Fagiolino i era i più amadi, i mostrava la vita del porocan, pien de fame e de strasse, senpre in çerca de salvarse da l’ingiustissia.
Pararìa che enti publici e privati i fosse ben disposti a riconóssar el merito de questo umile artigiano, anca par farghe onor a i tanti che lavora in silensio, con poche sodisfassioni economiche e che nissuni ghe dise gnanca grassie.
Come me piasarìa che el porton de ’sto museo el fosse come el so teatrin, co i tendoni tegnudi da cordoni de seda da le parte e el sipario zo, che se alsa quando la gente la entra nel so Mondo Piccino par tornar bocia par un poco.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Valori e regole
Se pole creare, stabilire e rispetare le regole senza avere valori? E se pole avere valori senza la conossenza e el rispeto de le regole? El mondo, la socetà, la vita civile gai bisogno de valori o de regole?
de Mario Klein
Da Belun
Na storia del dì d’ancói
de Luigina Tavi
Da Thiene (VI)
El casotelo
Un posto màgico dove, via dal mondo, me popà, ’passionà de osèi e de cacia, passava el so tenpo lìbaro
de Bepin Daecarbonare
Da Verona
Un museo par Nino Pozzo
A trent’ani da la so sconparsa
de Lucia Cozzolino Masotto
|
