Da Belun

Na storia del dì d’ancói

Ultima foto de Papà e Mama assieme (me Papà l’é mort al 29 marzo 1972 e me Mama al 21 aprile del 1995).

Ere stata de matina bonora te l’ort a trapiantar piantine, po’ an mestier tira l’altro tant che a le nóve e mèda, có rive magnarme calcosséta... i sona a la porta... “Vae mi” me fa me sorela. Chico al ghe core drio o mèjo davanti, tant l’é curioso, e sente Maria che la ghe diss a qualchedun: “Buongiorno, rive subito, vae a controlar che al cancel al sìe ben serà, che al can no scanpe fora in strada.” Ma quel, Chico al cagnet, de solito pien de festa par tuti (sto can da guardia!) no al degna manco de n’ociada “do tizi”, ’n òn e na fémena de mèda età, che i gnen ’vanti. Entra prima lu, e drio me sorela... I se presenta subito: “Siamo dell’Enel e dobbiamo rendere 50 euro, pagati in più.” “Strano” ò dit subito forte mi, “dói de l’Enel che laora al sabo matina?” Ere già rivada a capir chi che i era e ghe ò dit a me sorela, parlàndoghe co i oci: “Ò parlà bel che massa, lasson che i parle lori e... andònghe drio...” Alora l’òn al diss che al deve controlar al contator; me sorela la fa na ranpa de scale, disendo: “Al contator l’é qua” e st’altro al ghe va drio, intant la fémena la riva in cusina, la slonga al portafolio, a quaderno, sora la tola, e, da ’n pachet de bilieti simili, la tira fora dosento euro, disendo: “C’è un problema, non ho i 50 euro da darle, ma lei me ne dà 150 e io le do i 200 e siamo a posto.” Che dir, quel che me balza te la testa... Nò! Me ere ripromessa de no dir gnent... ma calcossa dovée pur dir, cossì: “Oh cielo, mi adess no ò i 150 euro, si e nò ne ò 20 e stamatina avon propio in programa de andar fin a la Posta a torse qualche schèo.”
E intant eco rivar in cusina l’òn e me sorela, al va so st’altra stanza, co porta senpre verta, dison al tinelo, sala da laoro, da letura, studio... de la television... da tut... L’òn al varda su le lanpadine, tre per èsser precisi e al diss: “Avrei bisogno di girare tutte le stanze per contare le lampadine.”
Sì, me ere ripromessa de no parlar... de andarghe drio... ma sta “uscita” par mi l’é stata al colmo, dison “na ofesa bela e bona”: anziane va ben... e “quasi vece”, ma insemenide nò! Cossì ò subito dit: “Ma no serve che al vae a contar le lanpadine, in tut ghe n’avon 53” Cinquantatre? Ghe n’avée dit massa, senz’altro de sora se pol aver anca an gran lanpadario. Dubi, domande entro la testa in rivoluzion, però de colpo me son dita: “Luigina diss subito calcoss’altro... te sé ofesa!!!” e ò dit forte e ciaro: “Sentì, a sto punto me ’vé rot le b... Andé via da la nostra casa e andé in m...!” E quei i é ’ndati a la porta. Maria, me sorela, ghe à vèrt, co Chico drio silenzioso... e i é ’ndati senza agiunger gnent.
Al bel l’é che me sorela spess e volentieri la me diss: “Ma no dir parolace!” parché sì son facile a passar da la “poesia” a la “prosa”...; có l’à serà la porta, l’à tirà an vero sospiro de solievo e la me à dit: “BRAVA!”
Ela, par poc no la pianzéa, mi me son trovada che me treméa fin la panza e pensée: “ma al numero 53, sparà cossì sicuro, da dove m’elo vegnest?” Al 1953 (o 53), l’an de al me matrimonio, come a dirme co al pensier, che le persone che ghe von volest “tant ben” le resta senpre co noi, logicamente a darne na man có ’von bisogno.
Po’ senz’altro quei dói, che vardàndoli avée calcolà “non pericolosi”, no se sa mai, tuti pol rivar a èsserlo... al fato l’é che ò sentì al bisogno de far calcossa, telefonar a qualchedun, contar... Polizia, Carabinieri?
E chi elo che se ricorda anca sol mèdo numero... Se ’véa la Radio de Belluno e avon telefonà a lori... L’é come che sie s-ciopà na bonba... Eco a sera, par television: la nostra casa, là, dói-tre olte in mostra, cossì vegnesta ben “bella” che Papà e Mama i se avarìe comosso... E no ve dighe le racomandazion... “No bisogna mai vèrzer a chi no se conosse...” e altro, anca: “Ma parché no ghe ’vé dat na padela sora la testa...” e noi, par tuti “pore colpevoli” là a rispónder: “Noi ghe ’von vèrt, fati vegner entro la porta e riaconpagnadi a la porta gentilmente co parole dialetali e, anca se non da ste parti, al dialeto i lo à capì ben!”
Staolta co la voja che avée par Quatro Ciàcoe par al mese de lujo 2013 de contar na storia de ani fà, ò contà na storia capitada qua, entro casa al 10 de lujo 2012; casa che, vardando da le finestre, abraze anca le me montagne.

La nostra casa.

MONTAGNE

Scolture vive
piturade te ’l celo
che nebia e nuvole
querze co ’n velo
che la neve
vestisse de sposa.

Nude!
Che ’l sol
colorisse de rosa.
Montagne del me Belun,
avé an tut
che inamora:
crode... prà... bosch...
gran festa de fior...
de aque al cantar...
de bestiole selvàreghe
an continuo andar...
trói...
anca poch conossesti,
che mena a ponte spize,
che ancora sa contar
de l’aqua del Mar!

[torna sopra]