|
Editoriale
Valori e regole
Se pole creare, stabilire e rispetare le regole senza avere valori? E se pole avere valori senza la conossenza e el rispeto de le regole? El mondo, la socetà, la vita civile gai bisogno de valori o de regole?
 | | Mario, resta senpre là in ataco e, me racomando: nervi a posto! |
Tanto par capirse subito, no intendemo parlare de robe difìssili par rinfrescarse on poco, dàndose… de le arie, visto el caldo estivo, ma ghe ne parlemo parché tuti i giorni, anzi tuti i momenti dovemo fare i conti sia con i valori che con le regole, sia che se vaga in posta a pagare na boleta, e sia che se vaga a sentarse so na panchina a l’onbra te on parco pùblico. Senpre ghemo a che fare con argomenti che zola alti e che vien tratà, studià, analizà da la sienza sociale e da la filosofia.
Ma, restando co i piè e tuto el resto par tera, disemo che, in tuto quelo che femo, a semo ’jutà da na spece de bùssola che ne dise quale che xe le robe pi inportanti par nialtri. Questi xe i valori, che ghemo da inparare a osservare, conóssare e rispetare. Se uno sente che xe inportante la libertà, l’onestà, la sincerità, la salute… el farà de tuto par avere na vita lìbera, onesta, sincera e in salute.
Naturalmente, la vita la xe una sola e no la se ripete, e alora anca i valori i xe fruto de na selta inportante; ghe sarà chi ghe darà inportanza a la fameja, chi al lavoro, chi a la cariera, chi a l’amicizia, a la solidarietà, al volontariato… Ognuno xe lìbero de sèliere cossa ga valore par elo.
Se però, in base a la propia selta, uno no ’l mete in pràtica concretamente el rispeto de quei valori, vol dire che el xe fora strada: o el canbia valori o l’aceta de rispetare le regole. Se uno vole realizare el valore de la cariera, insieme a quelo de la fameja e de le amicizie, el mete massa carne sol fogo e el ris-cia de dover contentarse de magnare salata senza conpanàdego.
Questo dimostra che i valori no i xe calcossa de “astratto”, de ideale e basta. Par questo xe nessario fare de le selte inteligenti so i propi valori e xe indispensabile seguire le regole par quei che se vole vìvare e far vìvare, a l’interno de la realtà sociale, in armonia con le tradizion, i costumi, la religion, la cultura e la storia.
Parlando de valori, oncò, ocore anca parlare de na “rivoluzione silenziosa” che ga canbià e orientà la scala de i valori de la nostra socetà industrializà. Dal dopoguera a i giorni nostri, dove conta la realizassion personale e la qualità della vita, a parte la situazion de sti ultimi ani, la ricerca de valori la xe indirizà verso altri orizonti: libertà piena, cultura par tuti, ugualianza fra i sessi e diriti fondamentali de l’individuo.
Dito tra noaltri, atualmente ghe xe na caterva de valori personali e na gran confusion de regole che le pare senpre pi fate su misura. Semo tuti d’acordo che la vita la xe un gran valore, ma se un automobilista el guida la màchina senza rispetare i limiti de velocità, el rosso de i semafori, la precedenza a i pedoni su le strissie o a le altre màchine su le rotatorie, che principio galo de la vita?
Oncò ghe xe la tendenza a mal soportare le regole, parché le xe inposte; manca l’educazion al rispeto de le regole, forse parché no le vien ’bastanza insegnà.
Al contrario, esenpi positivi ghe ne xe fin che se vòle. Pensemo a come Papa Francesco el ghe insegna de conportarse a i zóvani. In altro canpo, ciapemo Cesare Prandelli, CT de la nazionale de calcio, che ’l xe inpegnà a trasmétarghe a i zóvani l’inportanza de valori, come el rispeto, la fameja, l’onestà… a conferma che non solo el calcio, ma la vita civile ga senpre bisogno de valori e de regole.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Valori e regole
Se pole creare, stabilire e rispetare le regole senza avere valori? E se pole avere valori senza la conossenza e el rispeto de le regole? El mondo, la socetà, la vita civile gai bisogno de valori o de regole?
de Mario Klein
Da Belun
Na storia del dì d’ancói
de Luigina Tavi
Da Thiene (VI)
El casotelo
Un posto màgico dove, via dal mondo, me popà, ’passionà de osèi e de cacia, passava el so tenpo lìbaro
de Bepin Daecarbonare
Da Verona
Un museo par Nino Pozzo
A trent’ani da la so sconparsa
de Lucia Cozzolino Masotto
|
