|
Editoriale
“Basta cultura dell’egoismo”
Sarà inpossìbile desmentegare quelo che ghemo visto e sentìo dire da Papa Francesco, durante el viajo in Brasile, quando el xe ’ndà a visitare la favela de Varginha: on grande insegnamento, na lezion de umanità.
 | | Par la visita del Papa, on fià de ritoco a la favela, ma in realtà se trata de “ammassi di materiali recuperati in discarica, pezzi di legno, di cartone, di lamiera, di plastica... assemblati con un certo ordine a formare dei cubicoli dove le persone possono almeno tentare di ripararsi dal sole torrido dell'estate e dalle torrenziali piogge tropicali dell'inverno.” (foto e parte de na létera de Ilaria Menini dal Brasile) |
“Si può sempre aggiungere acqua ai fagioli” ga dito Papa Francesco, el 25 de lujo scorso, durante la so visita a la favela de Varginha, a la periferìa de Rio de Janeiro. El lo ga dito nel posto giusto, in mezo a zente senza gnente, ma che ga on cuore generoso: dove che magna… – magna, se fa par dire: la xe na parola grossa par sti posti – dove che se scalda el stómego zinque persone co na fasulada, zontando aqua, se pol contentàrghene diese…
Da la baracòpoli, incastrà tra na strada traficà e na rafinerìa de petrolio, tirà sù setantatri ani fà, on canpo de batalia ’pena bonificà dal controlo de la polizia; da sto bruto posto xe stà forte el messagio lancià dal Papa a tuta la Cesa e al mondo: “Nessuno può restare indifferente davanti alle disuguaglianze nel mondo!”
Comosso da l’acolienza, dal calore e da la voja de vìvare de sta pora zente, Papa Francesco el ga messo in risalto la generosità e la solidarietà che viene da le persone pi sènplici e el se xe rivolto “a chi possiede più risorse, alle autorità pubbliche e a tutti gli uomini di buona volontà impegnati per la giustizia sociale”, diséndoghe: “non stancatevi di lavorare per un mondo più giusto e solidale!”
Na sverdelà tra copa e colo par tuti: cristiani e non cristiani, credenti, atei o indifarenti: no xe pi el tenpo de la carità “pelosa”, fata par intaresse o par dirse: “mi son a posto”: xe l’ora de la carità fraterna.
Se el Papa el ga parlà a i poareti veri, a quei che no ga da magnare e da vestire, che no ga on coerto dove ripararse la note, xe parché no xe pi possìbile ignorare le scandalose difarenze tra omo e omo. Forse, rispolvarare el messagio cristian de la solidarietà, vol dire dare inizio a na necessaria rivoluzion sociale, non violenta, par el ben de tuti.
Me rendo conto che ghe vorìa on Papa Francesco in ogni sità, quartiere, paese. Ma el ghe vorìa in visita almanco na volta la setimana, par ricordarne da dove vegnemo, dove semo direti e che de quelo che ghemo oncò, doman no se portaremo via gnente. Eco dove nasse el dovere de la solidarietà e de l’aiutare el “prossimo tuo”.
Non tanti ani fà, anca noantri zente veneta conossévino da vizin la miseria nera, la fame, la mancanza de qualsiasi svànpolo: “dove magna tri, magna siè” e la porta de casa jera senpre verta par ricévare anca el foresto. “Poarin… el vègna ’vanti… galo fredo? galo magnà?... màgnelo on bocon co noialtri?... dài el se senta a tola che ghe stemo tuti…”
Xe rivà el svilupo, el laoro, on zerto benèssare fato ’ncora de rinunce e de sacrifici… xe canbià la musica e, on poco a la volta, semo canbià anca nialtri. Ghemo pensà a la nostra fameja, a la nostra convivenza, a la nostra educazion, a la scola, a la salute, al benèssare integrale de la nostra persona. Pur conservando on poca de fede (!), xe canbià el cuore umano. E xe nata quela che oncò vien ciamà “cultura dell’egoismo e dell’individualismo”.
No ghemo fato tuto da soli: ghemo seguìo le regole de la nostra società che ne ga portà massa avanti, massa oltre… verso on mondo senpre manco “abitabile”.
Eco ’lora che xe on ben che sto “novo” Francesco sia vegnù a condanare la cultura de l’egoismo, proponendo la cultura de la solidarietà: “Si può sempre aggiungere acqua ai fagioli.”
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
“Basta cultura dell’egoismo”
Sarà inpossìbile desmentegare quelo che ghemo visto e sentìo dire da Papa Francesco, durante el viajo in Brasile, quando el xe ’ndà a visitare la favela de Varginha: on grande insegnamento, na lezion de umanità.
de Mario Klein
Da San Bonifacio (VR)
L’orto drio casa
Ma semo sicuri che convien fàrselo?... S’a l’è par far ginàstica e risparmiar, co i schèi che se spende a coltivar l’orto, se podarìa iscrìvarse a ’na palestra co i fiochi…
de Enzo Coltro
|
