|
Da Maran Lagunare (UD)
La “filosofia” de Nasruddin
 | | Qualsiasi roba che feva Nasruddin, luri lo copieva, i feva duto conpagno de elo. |
Parché semo qua
Caminando ntel scuro pa na strada deserta, Nasruddin el vidi un grumo de soldài che i curi verso de elo. La so inmaginassiòn la ga scumissiò a lavorà: el se vedeva prisonier; vindùo come stiavo o, se la ghe ndeva ben, reclutò nt’un esercito. El scumissia a core e dopo scavalcò el mureto de un simiterio, vista na busa verta, el se ga distirò drento. Sti òmini che no i gera soldài ma viasaduri onesti, insospetì del so stranbo conportamento, lo segui e co lo trova distirò che ’l tremeva de paura i ghe disi: “Co’ te fa drento sta tonba? Te vemo visto scanpà… Forsi podemo jutate?”
“Sol el fato che podè fame na domanda, no vol dì che esisti na risposta tanto senplice” disi Nasruddin, resosse conto de la situassiòn. “Duto dipindi da come che valtre vedè le robe. Parché se volè savelo: son distirò qua par colpa vostra e valtre se qua par causa mia.”
El tonto
Un filosofo che ’l veva concordò n’intervista con Nasruddin par parlà con elo, el va a trovalo a casa sua. Nasruddin no ’l gera in casa. Duto rabioso el filosofo, ciolto un tòco de gesso, el scrivi su la porta de Nasruddin: “Stupido, idiota.”
Co Nasruddin el torna, leto quel che ’l veva scrito el va de corsa a casa de elo. “Me gero desmentegò” el ghe disi, “che vivi de vignì a trovame. Ghe domando scusa pa no esse stò in casa. Me xe tornò inamente del nostro apuntamento sol co go visto scrito el so nome nte la porta de casa mia.”
I seguaci
Nasruddin el gera rivò in piassa con un grumo de seguaci che, qualsiasi roba che ’l feva, luri lo copieva. El smoveva le man in aria, el salteva sigando “hu-hu-hu come i indiani e luri i feva duto conpagno de elo. Un mercante amigo de Nasruddin, lo ferma e el ghe domanda: “Co te sta fasendo, parché sta zente la te imita?”
“Son diventò par luri un maestro spirtual” rispundi Nasruddin, “li stago jutando a trovà la strada!” Curioso l’amigo el ghe domanda: “Ma come te fa a savè co la ga trovada?”
“Sta qua xe la parte più fàssile” rispundi Nasruddin. “Ogni matina li conto, quìi che me ga lassò vol dì che i la ga trovada.”
Trovà la morosa col feral
Na sera el pare de Nasruddin el vidi na luse drento la stala; ndò là a vede, el trova so fio duto ben vistìo. “Co’ te fa qua, cussi bel ganbiò, col feral inpissò?” el ghe domanda. “Vago a ciamà me morosa, pupà” rispundi Nasruddin.
“Go vesto modo de ndà col scuro par i buschi a la to età, invitando to mare la prima volta” disi el pare, “e son ndò senpre sensa el feral.” “Lo sò” ghe disi Nasruddin, “ma te ga visto co’ che te ga ciolto, pupà!”
El zorno prima
Nasruddin el va vissin al zòvene che ’l steva pa maridasse e strenzèndoghe la man el ghe disi “Amigo, congratulassiòn: sto qua xe el mèjo zorno de la to vita.” “Ma varda che me marido doman” ghe rispundi el futuro sposo. “Lo sò” disi Nasruddin. “Xe par questo che digo… che questo xe el mèjo zorno.”
L’omo più sior del paese
L’omo più sior del paese el gera morto. La matina dopo al funeral, nantro sior, vecio e avaro el ghe fa a Nasruddin: “Me domando trope palanche che ’l varà lassò ndando de oltra?” Nasruddin el se miti a ride e el ghe rispundi: “Fin l’ultima palanca, sior, duto quel che ’l veva.”
Rasonamento dedutivo
“Nasruddin, tropi ani te ga?” ghe domanda un amigo. “Son tre ani più zòvene de me fradel” el rispundi. “Come te fa a savelo?” “Go rasonò” fa Nasruddin. “Ano passò me fradel el ghe diseva a la zente che ’l veva do ani più de mi. Xe passò un ano e alora, desso el xe tre ani più vecio de mi.”
Sostituì el me musso
Passài tre zurni, Nasruddin el gera ncora drio pianse el so musso morto. “Te pianzi più par elo, pignanca co gera morta la to mujèr” ghe fa un amigo del paese. Nasruddin el se volta e el ghe rispundi: “Se ve inamente, co vevo perso me mujèr, duti in paese me divi corajo, disendo che ne varissi trovada nantra. E desso, finora, nessun me ga oferto de sustituì el me musso.”
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
“Basta cultura dell’egoismo”
Sarà inpossìbile desmentegare quelo che ghemo visto e sentìo dire da Papa Francesco, durante el viajo in Brasile, quando el xe ’ndà a visitare la favela de Varginha: on grande insegnamento, na lezion de umanità.
de Mario Klein
Da San Bonifacio (VR)
L’orto drio casa
Ma semo sicuri che convien fàrselo?... S’a l’è par far ginàstica e risparmiar, co i schèi che se spende a coltivar l’orto, se podarìa iscrìvarse a ’na palestra co i fiochi…
de Enzo Coltro
|
