|
Da i Coli Euganei
Le me prime votassion
 | | Quante firme, gente, scheda par scheda, fin che ga scumissià a rivare i primi votanti. |
No la xe na novità quea che el tenpo core, core in pressa, “el va come on siton”, diséa la Marta, na siora sinpàtica che stava de casa da le parte de Cittadella. Mi, in te on primo momento, pensava che sto siton el fusse na spece de saeta, o mejo na “saetta”, causà dal tenporàe, invesse go scoperto pì tardi che siton el gera el nome in dialeto che i ghe dava in chel paese a le libelule, che invesse par noantri i sarìa stà i paejuni.
Le libelule! Quanta dolcessa go senpre provà mi, fin dal tenpo de l’asilo, a vardarle zolare in facia al sole, corendo velocemente, tajando el celeste de l’aria.
Mi però in sto momento gera partìa co nantra intension. Voleva parlarve de votassion e de la prima volta che son ’ndà a votare, tanti ani fà. Eco el parché de sto longo preànbolo prima de entrare in tema. No go de serto intension de far politica, par carità. Solo voea ricordare le emossion de chel tenpo, davanti a sta roba inportante. Me popà gavéa senpre fato el scrutatore, ma in chel’ano gera vegnù fora de i novi regolamenti e, non podendo pi ’ndarghe lu, eco che mi gavéa ciapà el so posto. Alora me popà me vardava sodisfato come se sto incàrico, sbrissià da le so man a le mie, el fusse proprio na bea roba. Anca parché a la fine de i tre dì se ciapava na bea brancadèa de solditi.
A pi de na persona alora mi go scumissià a insegnarghe le regole, in modo speciàe a tante persone ansiane, inpressionà par sto avenimento. Eco alora la racomandassion de sarare ben la scheda, senò no la sarìa stà pi valida. No bisognava farghe nessuna macia, né scrìvarghe drento nome e cognome (come qualcun invesse dopo gavarìa fato). Parfin el prete in cesa se gavéa racomandà de non métarse el rosseto, in te chel’ocasion, parché lecando la cola de la scheda par sararla, se ghe restava el rosso lì tacà, la sarìa stà invalidà.
Pi de na persona me fermava par strada, par domandarme spiegassion, e mi ghe spiegava co tanta contentessa. Forse parché la me prima passion sarìa stà quea de deventare maestra, come la me maestra de le elmentari, che la se ciamava Jole Mion e la me voleva tanto ben. Ma no gera riussìa a deventarghe. E mi in chei momenti me sentìa proprio na specie de maestrina che ghe spiegava le robe a i so tusiti.
E finalmente xe rivà el dì de le votassion. Se gavéa verto el segio, de matina presto, e cussì la gente, finìa la Messa prima, podeva fermarse sensa fare nantro giro. Col me majon novo, regalà da me sorèa Maria e on bel fioco che ligava i me caviji, eco che so’ partìa par el segio. Quante firme, gente, scheda par scheda, fin che ga scumissià a rivare i primi votanti. Na fila de anziani, vegnù fora da la prima Messa. Qualcuna gera confusa e qualche altra decisa la me vardava in te i oci disendo: “No se pol mia parlare, vero? E se sbalio?” E mi a incorajarla pi che altro co na ocià che voéa dirghe: “Fa’ come che te go insegnà.”
Tuto el paese, a s-ciapi, on pochi a la volta, xe rivà lì, davanti al segio. E ve assicuro che ghe ne gera pochi de sicuri, tranquili, la magior parte i gera emossionà e ghe tremava le man anca a quei che in altre ocasion pareva che i spacasse el mondo. Par mi la gera proprio na esperienza nova e bea. Védarme sfilare lì davanti tuti i paesani, anca quei che no se vedéa quasi mai vegner zo dal monte Vendevolo (el nostro cole), parché i faséa vita pitosto casalinga.
Curioso xe stà chel momento che xe vegnù basso dal Col del Venda, a grupi, i militari de l’Aviassion, che gavéa proprio là in sima le caserme. Mi gavéa sostituìo el segretario che ’l gera ’ndà a casa a magnar qualcossa, e cussì me tocava a mi trascrìvare i dati su i documenti. Ghin gera da tante parte: Veneto, Lombardia, Campania… Eco, sti ultimi i se indovinava da i nomi e da le vie, che i vegneva da lì: i Salvatore, i Antonino, ecc… Uno me diseva Via Paradiso, st’altro Contrà de l’Inferno… e mi alsava i oci par védare se sti tusi schersava. E luri me rispodéa: “Nò, nò, Signorina, vada avanti, sono vie vere”, zontàndoghe qualche soriseto a mo’ de sinpatìa. Sì, chei tosati anca sensa tante paròe, i gavéa portà na ondà de giovinessa drento al nostro segio eletorale. E par mi che gavéa scrito tanto e volentieri la gera stà na bea roba.
Cό rivava qualche mama col toseto picenin che ’l se metéa a criare, eco che i me lo metéa in brasso a mi, la pi adata. E mi me faséa in quatro par sbrassolarlo, lì drento l’aula, mostràndoghe tuti i manifesti colorati, tacà i muri lì ’torno. Ma no ghe gera nessun sìnbolo de partito che fasesse rìdare sti tusiti, fin che la mama votava in cabina. Luri i se tasentava solo cό rivava la mama e la se lo strenseva in brasso. Quéo el gera el posto giusto, anca secondo mi.
Serto che da alora, del tenpo, ghi ne xe passà tanto, e anca par tante volte dopo go fato la scrutatrice. Ma ve assicuro che la prima volta la xe stà na esperiensa proprio bea e inportante. Anca parché védare la gente del me paese, uno par uno, tuti emossionà, lì che i domandava la matita, atinti po’ a dàrtela indrìo parché la gera pressiosa, beh!, la xe stà na roba divertente che no sarìa capità ancora, parché dopo la gente gavarìa fato na abitudine. E xe stà proprio cussì.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
“Basta cultura dell’egoismo”
Sarà inpossìbile desmentegare quelo che ghemo visto e sentìo dire da Papa Francesco, durante el viajo in Brasile, quando el xe ’ndà a visitare la favela de Varginha: on grande insegnamento, na lezion de umanità.
de Mario Klein
Da San Bonifacio (VR)
L’orto drio casa
Ma semo sicuri che convien fàrselo?... S’a l’è par far ginàstica e risparmiar, co i schèi che se spende a coltivar l’orto, se podarìa iscrìvarse a ’na palestra co i fiochi…
de Enzo Coltro
|
