“La Sguaratà” - Ciàcole adriote

Biétole

Entrata al zucherificio de Bottrighe.

In tel mese de Novenbre, fin a dopo la metà de i ani Sinquanta del secolo scorso, a se conpletava la canpagna de le biétole in t’i zucherifici de la provincia. La gera na mana del Signore. Più de na diesina de zucherifici ca coverzeva el teritorio de alto, medio e basso Polesine. Ocupà sentenara de persone in te le fàbriche e un gran indoto creà da agricoltori, operai ca sunava sù le biétole da i canpi, caretieri e trasportadori che, con mezi diversi, portava a le fàbriche e a le piarde (centri de racolta sparsi in tel teritorio) la materia prima.
El gera un gran fervore de movimenti ca durava tre o quatro mesi, spesso prolungà da le piove ca ne permeteva de tirare fora le biétole da la tera. Sto periodo de lavoro inpeniva un poco le scarsele e iutava le fameie a portare avanti la baraca perché, de serto, in Polesine no s’à mai cuntà gran industrie e trovare lavoro gera un terno al loto, proprio come adesso!
Le strade gera tanto intasà da i mezi agricoli e i lavoratori, anca tanti studenti come mi, doveva stare atenti perché el mezo de locomossion gera la splendida bicicleta ca ne consumava, de serto, benzina ma che la gera senpre esposta a tanponamenti da i mezi agricoli ca portava le biétole. Me poro nono, che el faseva la canpagna al zucherificio de Cavanella Po, el se faseva la strada da Adria al zucherificio anca quatro volte al giorno. Mi, più fortunà, a ragiungeva el stabilimento de Bottrighe con la me bicicletina cla meritava un monumento ela sola. Le biétole, rivà in fàbrica, le vegneva scaricà, lavà e avià a la produssion del sùcaro, dopo che a ghin gera stà cavà un sacheto per mandarlo in sala tare e sala chimica per stabilire quanto sùcaro che le podeva fornire.

Su le strade ghe gera sti cariti de biétole…

Ò fato la “canpagna” sacarifera per sinque ani, pagàndome i studi e dando na man a la fameia. Quando, po’, ca so ’ndà a lavorare in banca, finì i me studi, ò scoperto che a gheva fortunatamente anca mucià i me contributi pensionistici per un ano de lavoro e, questo, gera un gran ben perché i se sarìa zuntà a quei che avarìa mucià lavorando. Se sa che a ghe voleva quaranta ani de contribussion e almanco sessanta de età per otegnere la sospirata pension, a meno che ne se fusse stà parlamentari! In tale caso bastava solo qualche ano e el basta anca adesso perché i nostri onorevoli (se fa per dire e co rispeto parlando) no i ga tenpo per modificare le legi…
Ben, ’ndemo avanti, dizendo che el belo del tuto gera la gran socializassion ca avegneva fra zóveni e veci e fra operai, studenti e “studiati” perché diplomati e laureati conpletava el portafolio, spesso, co sta màndola. No ghe gera piova o nebie ca tegnesse. Se ’ndava al zucherificio ogni giorno, chi a tenpo continuato de oto ore e chi matina e pomerigio. Le fàbriche lavorava a ciclo continuo anca a la note. Mi a gera inpiegato per l’ANB (Associassion Nassionale Bieticultori) e a doveva controlare i inpiegati del zucherificio, fasendo i me raporti perché no se valutasse massa poco le biétole, pagando manco i agricoltori.
Tuto somà se gera na gran fameia e a ghe gera qualche catà da dire solo per… finta! Ma i ani è passà. I grandi zucherieri à conprà i pìcoli (la concorensa) e, pian pianin, i à fato serare tute le fàbriche de sùcaro polesane. Ne ghe n’è restà una gnanca per sbalio e gnanca per sbalio è restà qualchedun de i tanti posti de lavoro che le canpagne sacarifere portava in te sta tera che la ga senpre avù voci deboli e picoline per sostegnerla, fata ecession per qualchedun che no l’à canpà abastansa per portare avanti le nostre necessità. Oh… è ciaro che, al posto de i zucherifici, no è vegnù nissuna altra fàbrica in sostitussion. No l’è vegnù alora, né la vien adesso!

[torna sopra]