|
Editoriale
Cossa se dise?...
Eco in sta domanda uno de i primi insegnamenti de la mama o del popà al putin, quando na persona ghe dava on bon-bon, on ciucio o on regalin, parché l’inparesse a dire “grazie”, a mostrarse riconossente verso chi ghe gavéa fato sta gentileza.
“Ace…” jera la risposta sugerìa e inparà da la creatura, anca se no la jera gnancora in grado de distìnguare con precision: mama - tata - papa - caca - popà - brun-brun… e ace.
Durante el so svilupo el pìcolo prima l’inpara a ripètere “i suoni” e molto dopo a usarli par farse capire, anca se le parole no le vien gnancora doparà in modo giusto, parché, pa ’l momento, ghe basta la mimica, i gesti e soratuto el pianto…
Ma la mama, soratuto la mama, la lo guida pianpianelo so la strada del parlare e giustamente la ghe insegna a créssare nel modo miliore e soratuto saver dire “grazie” anca da grando.
Solo che tante volte tuto sto lavoro educativo de la mama el risulta inùtile, se el valore del “grazie” al giorno d’oncò el xe ne nà a farse frìzare!
Ma, a cossa xe che uno el dovarìa dire grazie?
A tuto, a qualunque roba: a la vita, a la salute, al giorno, a la note, a l’aria, al sole, a la piova, al vento, a i fiori, a le piante, a le montagne, al mare, a le bestie, al can, al gato, al cavalo, a la vaca, a la galina, al merlo, al canarin, al conejeto da conpagnia… A tuti: a le persone che ne dà on servizio, a la cassiera del supermercato, al postin, a l’autista del bus o del tran, al fornaro, al botegaro, al becaro, al scarparo, al dotore, a l’infermiera, al farmacista, a la tosa che ne taja le onge de i piè, a l’omo che porta via le scoaze, al toso che ne inpina la casseta de la posta co la publicità… che de le volte la serve anca quela…
Grazie a i amici, a la fameja, a i fiòi, a i neodi, a i problemi che ne mete a la prova e ne rende pi forti, a le soferenze che ne fa sbassare la cresta, a la croce che dovemo portare comunque.
Dire grazie a Dio, parché el ne ga fato òmani e done, pitosto che bestie o on tòco de piera. E sto grazie el deventa el riconossimento de l’origine e de la nostra destinazion, acetando quelo che ’l Signore ga disegnà par la nostra vita.
Dire grazie a i angeli, “spiriti de luce” che con on grazie i se precipita a garantirne on suplemento de assicurazion contro i incidenti del percorso tereno. On grazie a le anime de i nostri morti che, anca stando distante, no i se separarà mai da noaltri, senténdose ligà da la nostra riconossenza.
Forse no pensemo abastanza a quanto ben pol fare on grazie, dito col cuore e non solo par educazion; on grazie fa ben a chi lo dise parché el porta via chel fià de egoismo che fa pensare che tuto ne xe dovù; e po’ el fa ben a chi riceve, co la parola grazie, l’energìa travolgente de on gesto balsamico de l’anima che sa conbàtare l’insensibilità e, talvolta, la maleducazion.
Métarse a svilupare on stile de vita che tiene conto de la gratitudine che ghe dovemo al resto del mondo… xe probàbile che questo ne ’juta anca a vìnzare la crisi e de sicuro a miliorare el mondo.
Miràcolo del “grazie”!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Cossa se dise?...
Eco in sta domanda uno de i primi insegnamenti de la mama o del popà al putin, quando na persona ghe dava on bon-bon, on ciucio o on regalin, parché l’inparesse a dire “grazie”, a mostrarse riconossente verso chi ghe gavéa fato sta gentileza.
de Mario Klein
Da Belun
El Sacrario Militare de Milovice
de Luigina Tavi
|
