Da la Bassa Veronese

La FIDAS l’à catà casa

I labari de le Sezioni FIDAS del Basso Veronese; a sinistra, el presidente Gardino Favalli e Massimiliano Bonifacio.

Come ogni ano, el 29 setenbre passà, s’à tegnù l’incontro de la FIDAS (Federazione Italiana Associazione Donatori di Sangue), sezion de San Piero de Morubio.
Sta bela realtà de volontariato l’à za conpìo 39 ani de atività e i iscritti i se sta preparando a festejar, l’ano che vien, el 40° de fondazion. L’è on grupo de persone ben nutrìo, formà da novantazinque elementi, tuti donatori inpegnè a 360 gradi, con presidente Gardino Favalli, vice presidente Massimo Guerra e segretario-economo Giuseppe Rebonato. On bel contributo in fato de umanità e generosità: in media le done le fa do donazioni a l’ano e i òmeni quatro.
Quelo de st’ano l’è stà on incontro speciale, parché a San Pietro di Morubio è stà inaugurà la nova Sede FIDAS.

Tajo del nastro co ’l sindaco, Giorgio Malaspina, el presidente provinciale Fidas, Massimiliano Bonifacio e el presidente de la sezion, Gardino Favalli.

L’à catà posto in un bel locale messo a disposizion gratuitamente dal Comune, ne la “Casa del cocio”, presso la sede municipale de “Villa Gobetti”.
Dopo la Messa solene de ringraziamento, celebrà dal paroco don Michele Fiore, a la presenza anca de vari conponenti de tute le sezion del Basso Veronese, è stà reso omagio a i donatori sconparsi, al monumento dedicà a lori.
Po’, dopo l’inaugurazion, “sciolte le righe”, come de tradizion, i soci i s’à catà tuti co i pié soto la tola e, tra boni boconi, canti e loterìa, è finìa la festa, co’ l’inpegno de tuti a proseguire in belezza co le donazion par el ben de ci ga bisogno de sangue e de plasma.
L’è senpre poco dirghe grazie a sti zóeni e manco zóeni de età, de mente e de cor che ga el mèrito de rèndare pi serena e vivìbile la vita a tante altre persone.

El momento che vien descoerta la targa: da destra, el presidente Gardino Favalli e el segretario Giuseppe Rebonato.

La Casa del cocio, tacà a Vila Gobetti.

[torna sopra]