Da Belun

El Sacrario Militare de Milovice

1917. La fameja de Giacomo Fistarol.

Come te ’n quadro a mosaico, Barbara, pi de tut armada de gran amor e iutada dal conputer, la sta zercando e metendo assieme: ani, giorni... “momenti de la vita” de so bisnono Giacomo Fistarol, disperso ne la Guera Mondiale 1915-1918. E Barbara la vien a saver che dal 24 Febraio 1918 al riposa nel Cimitero de Guera de Milovice (Republica Ceca), assieme a altri sventurati de nove nazion, e precisamente ne la Fossa comune 69/32... Cossì, in conpagnìa de so fiol Fabio Paganini, an bocia grando quasi pi de ela, la parte assieme a i Alpini de la Sezione de Belun e Sezione de Conegliano par partecipar a la Comemorazion che ogni an a novenbre se ripete, e che sti Alpini i ritorna lassù da ben quìndese ani.
Comemorazion co momenti davero sugestivi, in particolare quando la Banda de l’Esercito Ceco sona le note del “Piave” e l’Ino de Mameli e i nostri Alpini intona l’ino nazionale ceco in italian.
Alora Barbara la partecipa e la ringrazia i Alpini co sta létera che riporte (an tochetin!):

3-11-2012. Barbara De Menech con el fiol Fabio su la sepoltura del bisnono Giacomo Fistarol.

“... Grazie a Voi il nostro desiderio si è avverato. Ciò che ho provato in quel momento non è facile da descrivere, l’emozione è stata così forte che non sono riuscita a trattenere le lacrime, sia per la gioa di averlo finalmente ritrovato, sia il pensiero di tutte le sofferenze provate dai nostri Soldati, rinchiusi contro la loro volontà in un campo di concentramento in terra straniera, lontani da tutto e da tutti, sopportando il freddo, fame , malattie, sporcizia... Grazie, grazie di tutto, cari amici alpini.”
E, tornada a casa, Barbara l’à contà e ricontà ogni particolare de sta so esperienza piena de emozioni, no solo al Papà, Agostino De Menech, Alpino de la Sezione de Agordo, a Mama Carla, ma anca a noi “nevode” de sto zio disperso.
La storia de la fameja l’è questa: Giacomo Fistarol nel 1911 al se sposa co la sorela de me Papà, Tavi Luigia Angela e, ancora in quel’an i emigra a zercar laoro a Tizovec (Ungheria). Có scopia la guera i torna a Belun, nel dicenbre 1917, sto zio Giacomo al vien richiamà al 131° Regimento (Fanteria) e, da quel momento non se sa pi gnente… e, zia Angelina la se trova vedova co quatro fiói: Maria (deventada mama del me secondo cugin, Agostino De Menech e nona de Barbara), Rodolfo, Ginevra e Emma. Tanta la speranza de vederlo tornar... e gnente de novo anca cercàndolo tra i Caduti del Grappa, Redipuglia,Oslavia... Un’unica cartolina (un tesoro) con “Mille baci a tutta la famiglia” e la firma “tuo marito Fistarol Giacomo” per chiudere con un “Addio” che lassava “presagire il suo tragico destino”...
Da la lontana Milovice eco che Barbara la vien a saver che al nome del bisnono l’é riportà anca ne la Porta de la Casa de Mussói dove l’é incisi nomi e nomi de Caduti de la Prima Guera Mondiale e proprio nel viale che da la strada nazionale porta al cimitero de Prade (Belun – cimitero citadin) nel viale co cipressi, una de le lapidi, an zentener senpre a ricordo de sti Caduti de la guera, l’é proprio de Giacomo Fistarol, “sto nostro caro”...
Grazie, Barbara, anca par sta scoperta che me dà modo de méter an fior, a sto “zio disperso e ritrovato”.

3-11-2012. I Alpini de la Sezion ANA de Belun col so làbaro, i rende omagio a Giacomo Fistarol.

[torna sopra]