Da Lendinara (RO)

Un fià de Veneto inte le rizete de l’Artusi

Pellegrino Artusi, scritore, gastronomo e critico leterario italian.

Ieri sgironzolando pa’ Rovigo, go trovà longo el Corso del Popolo ’na bela manifestazion, indove soto a de le tende, xe stà messo in mostra de i prodoti polesani. Se tratava de reclamizare robe da magnare o turistiche che più de 32 paesi de la provincia de Rovigo meteva a dispozion de la zente. Se podeva assajare o conprare verdure, vin, salami, formaji, pan biscoto, dolzi e tanto altro, stasendo sentà comodi a de le tole. Rivà a la tenda del Comune de Polesella, go visto sora un banco, ’na bela scartà de risoto e, dopo averlo sajà, go volesto savere da quale rizeta xe stà trato sta delizia. I coghi adeti a tratare co la zente i me ga risposto che, lezendo un libro de Pellegrino Artusi, i ga trovà qualcossa che parlava de cusina e de Polesella. “Eco qua” i me ga dito. “Védito, su sto fojeto ghe sta scrito che l’Artusi xe passà in Polesine.”
Dovì savere, cara zente, che l’Artursi xe conossù soratuto pa’ el so libro de rizete: “La scienza in cucina e l’arte di mangiar bene”. Otozento maniere de far da magnare rancurà in giro pa’ l’Italia, tradizion rejonali del so tenpo e anche de quele antighe.
El nostro scritore el xe nato a Forlimpopoli nel 1820; so pare botegaro de casoin, lo ga fato studiare e al momento justo lo ga ciamà a laorare co lu. Desgrazia vole che, la banda del Passatore la se ga fermà da chei posti, fasendo man bassa de quelo che la ga trovà, roinando fameje intiere. Tra ste fameje ghe xe anca quela de l’Artusi. Cussì, Pellegrino, da prinzipio el va a stare a Firenze, fasendo schei a palà intel comercio e, solo nel 1870 el scuminzia a scrìvare, fasendo studi filologici e de storia leteraria.

Libro di Pellegrino Artusi.

El dise, el nostro toscan, che la zente del Veneto, no la conosse, se pole dire, altra minestra che el riso, e però i lo cusina ben e in tante maniere. Nantra volta el conta che: < La ga tajà un polastro, tirando via la testa e le zate, po’ lo ga messo in padela, quando el desfrito de lardo, ajo e prezémolo el gaveva ciapà el colore, la ga zontà dopo un tòco de buro, condìo co sale e pévaro, e quando el polastro se ga rosolà lo ga passà in pegnata piena de aqua de bojo, po’ la ghe ga messo el riso, e prima de tirarlo fora dal fogo, la ghe ga dà gusto co un bon pugno de parmigian. Bisognava vèdare che gran piato de riso ne xe stà messo davanti; ma lo ghemo magnà tuto, parchè el doveva servire da primo e secondo.
’Desso, pa’ restare a i risi de la parona de Polesella, xe ben dire che invece del lardon, se no xe bonissimo e de quelo roseo, a pole servire la carne masenà fina, el sugo de pomidoro, o la conserva, no ghe sta male e parchè el riso el liga ben co el polastro, no el deve èssare massa coto, e gnanca brodoloso.>>
Ieri a Rovigo, sarà stà parchè gera verso sera, o parchè gavevo fame e, no ve conto ’na busìa, a go trovà cussì boni sti risi, ca ghe ne garìa magnà ’na pegnata, come ga fato l’Artusi e el so conpagno.

[torna sopra]