|
Da la Marca
Erica Boschiero
Erica Boschiero xe la vose pi pura e rapresentativa de le nove leve del canto popolar nostran che tien in vita la tradission inaugurada ne i ani ’60 dal Canzoniere Popolare Veneto.
Belunese de origine la se ga trasferìo da cea co la so fameja ne la Bassa Trevisana, a Casale sul Sile, dove che la abita ancora. Nata co la musica nel cuor la ga senpre sentìo ’na gran passion par el canto che la ga portada a esibirse come solista za da putela nel coro parochial e in seguito la ga studià co inpegno, specializàndose in piano e chitara e dedicàndose anca a la conposission. La ga scrito varie canson in lingua italiana, realizando el CD “Dietro ogni crepa di muro” e faséndose apressar in tanti concorsi su e zo par l’Italia.
Dal so incontro co Gianni Secco xe nato l’intaresse par el mondo de le fiabe, de le creature fantastiche come el massariol, le fade, le anguane, i mestieri de ’na volta, l’emigrassion e le storie de tante done sensa vose de la Bassa. Erica la ga çercà de darghe vose proprio a ’ste realtà desmentegàe, a storie e vicende mai contàe, subito dopo de aver passà tuta ’na sera a scoltar so nona che ghe spiegava come che jera i inverni de i so tenpi, co i piroloti de giasso sul querto par mesi, co le legne da rancurar fora par i canpi par scaldarse, co le pore bestiole selvàdeghe che rivava a entrar fin ne le abitassion par scanparghe al gelo, co fadighe continue ne la vita quotidiana.
Da alora la ga aprofondìo le so ricerche sul dialeto e la leteratura oral, co le storie de vita vissùa, le cante, le preghiere, le espression vernàcole; la ga messo in musica varie poesie e la ga colaborà co musicisti e scritori, come Leo Miglioranza e Sandro Buzzati. Col cantautor Gualtiero Bertelli la ga portà in giro par el Veneto el spetàcolo “Italie” che par mezo de le canson conta la storia del nostro Paese da i ani ’60 al dì de unquò. Erica la ga fato varie “dirette” co RAINEWS24 e RAI2, esibéndose anca par el Ministero dei Beni Culturali a Roma co l'’associassion “Ambasciatori in musica”.
La ga partecipà a raquanti concorsi, vinçendo tra l’altro el premio “Botteghe d’autore” e dividendo co la cantautrice Elsa Martini e Pilar el terso posto al concorso “Suona la musica” a Faenza, musicando el poemeto “Come chi mira in ciel fisso le stelle” de la poetessa padovana Barbara Stampa.
Erica, che porta la so musica anca fora de le sale concerto, cantando in mezo a la zente, in parochie, oratori, centri sociali e parfin in veci fabricati industriali come le fornase, la ga ’na vose ciara e cristalina che rende al mèjo le so canson, tute originali e gradevoli, melodiche e ritmiche al tenpo stesso, co testi de gran spessor poetico ispirài a la vita vera, quela de la zente normal de le nostre comunità, come “Anita” ospite de ’na casa de cura padovana o el pretin de canpagna messo in dificoltà da un incontro co ’na dona disinvolta nel so giro de benedission a le case. Erica la ga un vero talento natural e ’na gran predisposission al contato co la zente, prestando la so vose a manifestassion culturali e assistensiali; par ela no ghe xe nessuna distansa fra arte e vita e soratuto par questo la se merita tuto el sucesso che da ani el so pùblico ghe dimostra in tuti i posti dove che la va.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Salvemo la speranza!
Eco on invito che vale par tuto quelo che riguarda la vita in generale,
conpresa Quatro Ciàcoe che la sta in piè par na scomessa: fin che ghe sarà
uno che scrive in dialeto vèneto, e uno che lèze, faremo i salti del simioto
par contentare l’uno e l’altro: anca questo se ciama speranza!
de Mario Klein
Coando jera buteleto
La vita de la me Contrà
Feste, laori e usanze de ieri ne la Contrà Cazzè de Bonavigo
de Giovanni Mastella
Da Thiene (VI)
El me primo bolario
Custode de tanti pìcoli tesori che te fa conòssare el mondo e le persone e, soratuto, viajare co la fantasìa in posti da sogno
de Bepin Daecarbonare
|
