|
Da Adria (RO)
Le do sorele
 | | Na siora pitosto tonda cofà la Tordela del Corier d’i Pìculi… |
Quando che mi a le go conussù jera poco più che bocia. Do bele signorine: una un fià passadela, st’altra raquanto più zóvene. Le staseva proprio in riviera co i balcun che dava sul canale, cussì tute le volte ch’a gh’jera na qualche manifestassion, come la galegiante o i foghi, nantri, mi, mi sorela e mi mama ch’la jera amiga de l’Iride, la più vecia, a se pudìvino gòdare el spetàcolo da un posto previligiato.
Ste do sorele le staseva in casa co so mama, na siora pitosto tonda cofà la Tordela del Corier d’i Pìculi, senpre ben tegnù e con na qualche pretesa de siorota. Anca le fiole, no digo che le ghesse la spussa soto el naso, parchè le jera de quele che se butava co tuti, che le dava confidenza fassilmente, insuma de quele che stava co la zente e per un pasto de ciàcole le se fermava fassilmente co la parona e co la serva, co la professoressa e co la bidela, co l’inpiegata e co la mujere del spassin, ma no le ’ndava fora de casa se no le jera cincinà sù come se deve: n’inciprià, un fià de rosseto, ma no massa par no èsser ciapà par una de quele, vestì, se non de lusso, almanco fati de bona stofa e de mèjo fatura (le jera lore stesse bone da ago, filo e fòrbese!); gnanca p’r andare a tore i fuminanti dal tabacaro lì arente o un eto de conserva dal casulin a pochi passi no le se sarìa messe na còtola un fià strofagnà o ’n golfin ’pena ’pena fruà. Insuma, sensa pretese, ma senpre co la so dignità.
Se le riceveva un qualche invito, le staseva ben atente con chi che le se conpagnava e no le vardava tanto a i schei quanto a la considerassion, al stile a la signorilità del personagio. Propio do personsine a posto. Unico difeto: no le gaveva né moroso e manco ancora marì. Par la verità l’Iride un moroso la gh’l’eva avù da ragasseta: uno del paese vissin, quando che tuta la fameja staseva a Belonbra. Però sto chì el faseva el belinbusto co tute e con una in particolare un fià de più. Quando che l’Iride l’è vegnù a saverlo – chissà parchè ghè senpre na bonànema che s’intaressa de i fati d’i altri e puntualmente la va a riferire a la persona che manco duvrìa savere! – l’à afrontà el dongiovani da strapasso su la piassa de Paposse un dì de festa, subito dopo messa granda, e la ga frantumà el so onbrelin a fiuri su chela testa sbusa, mandando in fumo la relassion, meténdose in atesa de tenpi più favorévoli.
Passando le stajon, anca la Jaele l’à scuminsià a averghe un cagneto ch’a ghe teneva drio. El jera un foresto da via e cussì mama Argele l’à scuminsià a informarse su sto tissio: la s’à messo in contato co na so amiga del posto, la s’à intaressà dal pàroco e l’è stà contenta nel savere che ’l jera un ragasso a posto, soto tuti i punti de vista: fameja, moralità e mestiere. I du i à scuminsià a frequentarse, pareva che i ’ndesse d’amore e d’acordo, ma com’ela come n’ela, int’un fià par l’altro è ’ndà tuto a carte quarantoto. Pare – pare, parchè la verità no la s’à mai savesta giusta – che sto ragasso, tuto serio e a posto, el ghesse qualche pretesa amorosa un cincinin massa spinta, almanco par chi tenpi, e ela pitosto de molarghe un punto l’à preferì lassarlo ’ndare pa’l so destin.
Dopo raquante primavere e altretanti istà anca par la più vecia è rivà el sole su le so finestre. La jera ormai su la quarantina passadela quando che un vedovo de Crespin l’à scuminsià a intaressarse de ela. Dopo i primi incontri, l’è passà diretamete a l’ataco, parlàndoghe de matrimonio. Lu de soranome i ghe diseva “galeto”, sia pa ’l caràtere pitosto deciso e birichin, sia per la so tendenza a córerghe drio a tute le còtole del paese e anche a quele foreste; ela invesse, quando che la staseva in paese, ma in Adria ninsun lo saveva, de nomenaja la faseva “polastra”, apunto de la rassa d’i polastriti. Cussì quando lu el ga fato la bela proposta, ela, con na trovata de spìrito, la ga risposto: “Benon: ti galo e mi polastra, l’afare l’è bel e fato.” E i à fato, come inte le fole, nosse conposse co i sorzi pelà, cùntemela ti, che mi te l’ò cuntà.
Restava la Jaele, un fià manco vistosa de so sorela, na s-cianta più riservà, na mamoleta in onbra. Ma è saltà fora anca par ela chi ch’à s-ciarà l’onbra e ga portà el sole inte ’l so canton. Jera un dotorin, tuto belo tirà, sensa mai un pelo fora posto, persona ch’a ne gh’jera ninte da dire, ma anca lu omo fato, pronto par responsabilità de fameja. L’è stà cussì che na volta conossù i s’à catà spesso e ben e, dopo averghe ben pensà par più de qualche ano, tanto da èsser deventà una de chele copie de morosi eterni, anca luri i s’à maridà. E te li vedevi senpre insieme, luri du, ch’i pareva i “fidanzatini di Peynet” anca dopo el matrimonio. Passà i ani, i è restà vedove tute do, e le s’à invià solitarie sul “viale del tramonto”.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Salvemo la speranza!
Eco on invito che vale par tuto quelo che riguarda la vita in generale,
conpresa Quatro Ciàcoe che la sta in piè par na scomessa: fin che ghe sarà
uno che scrive in dialeto vèneto, e uno che lèze, faremo i salti del simioto
par contentare l’uno e l’altro: anca questo se ciama speranza!
de Mario Klein
Coando jera buteleto
La vita de la me Contrà
Feste, laori e usanze de ieri ne la Contrà Cazzè de Bonavigo
de Giovanni Mastella
Da Thiene (VI)
El me primo bolario
Custode de tanti pìcoli tesori che te fa conòssare el mondo e le persone e, soratuto, viajare co la fantasìa in posti da sogno
de Bepin Daecarbonare
|
