| arbinà da Franca Isolan Ramazzotto |
|
Robe de na olta
Le onge col luto
A i me tempi le scole le comiziava verso i primi oto giorni de Otobre e mi gavéa scomizià la seconda classe elementare. Me mama, se no la naséa laorare, la me mandava a scola neta come
on poejo, senò ghe pensava me nona o me zia a métarme in órdene anca la busta. ’Na matina bonora, piovéa che Dio la mandava, ma a l’ora de scola ghèra calà ’ìa e tra le ultime nùgole ghèra spuntà on bel soleto. Par la strada che l’èra de tera e de giara ghèra restà de le poce bele longhe e in parte de la strada a rìsigo del fosso e de la cuneta ghèra restà del paltan che, caminando, se se sprofondava fin a i zenoci. I buteleti, nando a scola, i se cavava le scarpe e i se godéa spocegare co i piè drento le poce, bagnàndose le gambe; par fortuna i buteleti de alora i portava le braghe curte, al massimo de inverno, ci podéa i le portava a la zoava. Prima de métarse in fila par nar drento a scola, i se sugava i piè con le man e cussìta le ghe restava sporche, ma tute le matine i ghi javéa sporche. Mi chela stessa matina gavéa in piè i zocoleti de legno che i èra fati come le sgiàvare, ma senza calcagno e, caminando rìsigo al fosso, me li go impaltanà. No savendo cossa fare, prima de métarme in fila davanti la scola, go tolto on ciufeto de erba e me li go netà.
Che no l’avesse mai fato: me go sporcà le man e no digo le onge! Fazzoliti de carta no ghe ne esistéa gnancora e me go lavà le man in te ’na pocia. Intanto me ’vicino a la scola e la bidela Lina, de soranome Brusca, la ga sonà la campanela e come tuti i buteleti so’ nà in tel me banco che l’èra el secondo. La maestra che la se ciamava Elda Brigo che la staséa a Albaredo d’Adige la jèra ’na maestra forte, energica e precisa in tuto. Tute le matine dopo la preghiera, la passava banco par banco col baston par vardarne le man. In te l’aula jèrino ’na trentina tra buteleti e butelete, forse qualchedun de pi e chela matina gavéino tuti le man onte e ela la s’avéa tanto maravejà, parché anca mi gavéa le man sporche. La m’à dito: “Isolan, tu con le mani sporche e con il lutto sulle unghie? Per casa oltre il compito delle tabelline devi scrivere per domani, venti volte ‘Niente lutto sulle unghie!’” Tuti i buteleti i s’à messo rìdare. “E voi che ridete non siete di meno; scrivete: ‘Prima di andare a scuola devo lavarmi le mani!’” Jè deventà tuti seri de colpo, anca parché la frase l’èra pi longa e pi le man le jèra onte piassè olte i dovéa scrìvare el penso. Quando so’ nà casa da scola me mama la m’à vardà el quaderno e... la me le ga misurà in te le ganasse. So’ stà in casa tuto el dopodisnà par scrìvare vinti olte chela frase e le tabeline, invezze i buteleti de la me classe i èra tuti fora a zugare tranquili e contenti. El giorno drìo jèro l’unica che gavéa fato tuto e chialtri gnente, cossì la maestra la ga fato scrìvare sol quaderno che ’l giorno dopo i dovéa nar scola ’compagnà da on genitore.
A olte penso a i me ricordi de cose sucesse in te on àtimo e me pare impossibile che i dura tuta ’na vita.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Scrite su i muri de la cesa…
El fenomeno del vandalismo, presente soratuto ne i grossi centri e ne le sità, ’desso el colpisse anca i nostri pìcoli paesi, provocando maraveja, rabia, indignazion par i dani provocà dal bisogno insulso de “illegalità” de na smanegà de teste mate.
de Mario Sileno Klein
Da Vicenza
Poeti e amicissia a Le Vescovane
de Ines Scarparolo
|
