Da Vicenza

Poeti e amicissia a Le Vescovane

Ne le dó foto, Grupi de Poeti in visita a la ceseta de S. Rocco.

Altro gènare de poesia quelo de la torta de pomi al “Canfin”…

Gninte de pi bèo podéa spetarse el s’ciapo de Poeti rivà, el 14 de aprìe, a far filò a “Le Vescovane” de Longare: on incatejarse pressioso de ciàcole de amicissia e on spanir de versi poetici, ga fato inmagare anca i ligaóri sconti fra i baruscari che fa da soasa tut’atorno a i Berici. Vien da pensare che in chéa matina splèndida, basà dal sole soto on celo che riciama el Tiepolo, se gabia desmissià fora parfina i antichi Pelegrini che, co tabaro e capasanta, mossi da na Fede s’ceta, rancava ani che fu so la pontara che porta a l’Eremo de S. Rocco, protetore de pelegrini e apestà.
Grassie al dr. Ernesto Gallo, che ga fato vèrzare la ceseta propio par niantri, se ga vudo la possibilità de amirare anca l’altare co ’l Santo che tien fra ’e man el baston co la suca par l’aqua e che mostra, so ’n galon, na piaga, a testimoniansa che la peste malegnassa la gavéa tólto de mira anca elo. Rente ghe xe on can co na ciopa de pan in boca pa ’l Santo (a i apestà, difati, no podéa ’ndar rente le persone). Sto bijou de ceseta, tirà sù prima ’ncora del 1583, la xe stà destinà da prinsipio a èssar refujo e lógo par métar calcossa soto i denti, propio a i pelegrini de Tera Santa in viajo par Venessia. La vien verta ’ncora ’desso ma solo par le Messe de Nadàe e Pascoa e par la Festa de la Sunta (15 agosto) e de S. Rocco (16 agosto).
Dal bon ecessionàe sta idea de visitare l’Eremo, anca se se ga dovudo, visto el nùmaro (52!) divìdare i Poeti in do grupi; prima l’uno, soto la guida del dr. Gallo e dopo l’altro, co capo comitiva el scritore, storico e poeta de i Berici, sior Reginaldo Dal Lago, ga possudo cussì vèdare a l’interno la ceseta, scoltando la storia de sto fantàstico lógo.
Presto xe rivà le òndeze e mesa, tenpo de métarse a tavoin par dedicarse a la Poesia in Estemporanea; za tuto jera stà predisposto ’te la Villa Rende Savoia, altra storica costrussion indove dal ’400 ga dimorà nobili Venessiani e Vescovi. La costrussion originaria, na tore da cacia a smerli, gera utilisà da i siorassi de ’lora sia par sparar da de le feritoie a i pori oseleti che capitava a tiro, sia par deféndarse da i nemissi in caso de guera. I smerli de ’a tore xe stà coverti, passando i ani, da i cupi, fin a formare el teto. ’Tel 1800 i paroni ga pensà ben de tirar sù, ’torno la tore, na gran casa, deventà pi ’n là residensa estiva de la fameja. La casa xe stà po’ conpletà co l’organisassion de na bela azienda agrìcola co tanto de stala, de tésa, de posso par l’aqua, de rimessa par le carosse.
Tornando a la Poesia, ’tel giardin ’vanti de l’Agriturismo, na poetessa amica ga sortejà (fra do tìtoli) quelo che gavarìa dà l’inpronta a la poesia da scrìvare e paréa propio che ’l Pelegrin S. Rocco ghe gavesse messo le man, tanto el tema xe risultà in armonia co storia e paesajo: “Sulle orme del passato”.
Za se gavéa consegnà foji protocolo tinbrà e pene biro a i trentanove Poeti che se ga messo a l’òpara de paca, coasi che rento el core no ghe fusse stà altro che versi za pronti a spanire, regalàndoghe al bianco de ’a carta armonia, belessa, originaità. Chealtri ospiti intanto, se la godeva on mondo a ciapar el sole ’tel giardin o a snasar co gusto i profumini che vegnéa fóra da le cusine, pronti a indovinar quala erbeta ghe gavarìa dà pi gusto al piato.
Ve digo sùito che i Poeti de i altri Circoli vèneti jera ben 22; i faséa parte del Gruppo Poeti Città di Chioggia, Presidente l’amica Guidina Borella Lando; de “L’Airone” de Bovolone (VR), rapresentà da la Presidente e carissima amica Nadia Zanini e da so marìo Giancarlo; dal Cenàcolo de Poesia Diaetale “Berto Barbarani” de Verona, rapresentà da la poetessa de le “radesèle”, Anna Maria Lavarini, bravissima a far nàssare emossion co i so versi in diaèto; ’nantro bel grupeto jera quelo de i “Amissi de ’a Poesia de le Aque Slosse”, co la Giova Bonato capogrupo e infine, ùltimo ma no serto par la sinpatia e la gran bravura, el Rajoto de “El Graspo” de Thiene, Mariano Guzzonato.
Pressapóco a on bòto, tute le poesie jera stà riconsegnà e, slargando on fià la cintura, se ga gustà on menù da lecarse i bafi, da l’antipasto a base de erbete, salado e parsuto par finire co la torta de pomi al “Canfin” (vardèla ben ’te la foto...).
Tra na portata e l’altra, se ga scominsià scoltare le poesie, partindo da i amissi de i Cìrcoi foresti. ’Assè che ve lo diga: le jera tute una pi bela de l’altra ma, sicome no se ga fato tenpo sentirle tute, se podarà rilèsarsele co calma a fine majo, quando sarà pronti i libreti stanpà. Anca se a maincóre, gera intanto rivà l’ora de saludarse, i oci lustri e ’l cor contento: a ravédarse, tusi, e ’vanti senpre, co l’amicissia e la poesia!

[torna sopra]