Da la Marca

El ritorno de Pinochio

L’ano passà, in ocasion del sentotrentésimo aniversario de la publicassion in volume de “Le avventure di Pinocchio” del Collodi, l’Associassion Nassional de i Alpini de Treviso ne la so sede al Portello Sile la ga messo in piè par un mese bon la mostra “C’era una volta... Una storia sempre attuale” dedicada al pi celebre buratin del mondo.
La rassegna la jera divisa in tre setori: “La bottega di Geppetto”, “Giochi e giocattoli pinocchieschi”, “Pagine al vento”.
La prima session la riproduseva co fedeltà in ogni particolar ’na botega de marangon de i tenpi andài, co tuti i so arnesi e dimostrassion de le fasi de costrussion de un buricinel de legno come che jera apunto Pinochio. Par i putèi intaressài e anca par scolaresche se ofriva la possibilità de partecipar a de i vèri laboratori de zogatolerìa ne i fine setimana, portàndose casa i buratini prodoti ne le esercitassion.
La seconda session, la pi inportante da un punto de vista etnografico, la presentava ’na racolta originalissima de zogàtoli, soramòbili, ricordini, ogeti de uso pratico, “misirizzi”, “gadget” e articoli vari, tuti ispirài a la figura de Pinocchio, a le so disaventure e a i so conpagni de strada partorìi da la fantasia colodiana.
Tra le robe in esposission figurava le robe pi svariàe, dal teatrin de i buratini a i cavastròpoli, da i fermacarte a i paraspìfari, da i tenperamatite a i suri de bossa, da le pene stilo al mobilio de le càmare da putèi, da i calamai a i spartiti musicali, da i massi de carte da zogo a i portapene, da le onbre cinesi a i dóndoli.
I zogàtoli pi amirài xe stai sicuramente quei che formava ’na serie de Pinochi in varie pose ma tuti realizài co canoti de soturco intajài da i contadini nel corso de i filò che se tegneva ne i longhi inverni de un tenpo no massa distante.
La tersa session la jera riservada a l’editoria co òpere a stanpa col sogeto esclusivo o principal de Pinochio, da le prime edission co le ilustrassion de Mazzanti a quele moderne de Cavazzano, da quele de Mussino a quele de Jacovitti.
Jera rapresentàe anca le tradussion in lingua straniera, dal francese al moldavo e ’na bacheca intiera la presentava parfin le pi note version de la fiaba ne i diversi vernàcoli italiani, prima tra tute la tradussion in padovan de Silvano Belloni.
No mancava po’ le cartoline ilustràe, i ex libris, le locandine de spetàcoli teatrali o cinematografici, le figurine, i quaderni de scuola e i diari studenteschi.
La mostra la xe stada verta par pi de un mese e la ga avùo un sucesso incredibile, sia de stanpa che de pùblico, da i putèi de le elementari a i noni che spesso li conpagnava in visita e tornava a i dì de la so infansia co tanta comossion. A gran richiesta xe stà quindi deciso de trasformarla in mostra itinerante e par almanco tuto ’sto ano la continuarà a girar in longo e in largo par i paesi de la Marca trevisana.

[torna sopra]