|
Da Vicenza
Na bala passà in pressia
 | | Torna casa drito. No sia mai dito che te te fermi da l’osto a far note co chéi balènghi de i to amissi… |
Le case ’te la corte vegnéa ris-ciarà da le prime spenelade rosa de l’aurora. La Nani ’ncora la dormiva e, soridendo tel sòno, la sognava le caresse slandrone del moroso; la ’Melia la spessegava in cusina, pareciando ’n fià de pastassuta da métarghe ’te la gamela al so omo e elo, vardàndola co tenaressa, el sercava bièrbo de slongare le man par strènzarla ’ncora na volta fra i brassi.
“Ciò, ’cramèn, gheto altro da pensare stamatina? Scòltame mi, invesse! Stasera vien qua Toni... Moràbito. Sì, quéo de le Ponpe Funebri, te lo sè che ’l fa la naja a Sacile... Beh, el ga vudo na licensa-premio e da quéo che go capìo el vegnarà manifestarte la so intension de farghe l’amore ‘uficialmente’ a la tosa... ’Ara che ’l vien in divisa da oficiàe, fane far bela figura, sèto... Torna casa drito. No sia mai dito che te te fermi da l’osto a far note co chéi balènghi de i to amissi, boni solo a svodare i quarti e co na brosa so ’l colo alta do déi!”
“Siòra sì, parona!” E Pino, che ’l ghe voléa on ben can a la so dona, dopo ’ver tribolà on giorno intièro so le inpalcadure, soto ’n sòe che scortegava la pèle, vegnù sera, pien de bona volontà, el ga ciapà la strada de casa, imajinando za la so vita sensa (jera ora!) le pramure e i sbèchi de una de le so dó fèmene. ’Pena fato el canton parò, el se ga sentìo ’dosso na strachessa, on malstare, tanto che i pìe se ga intrabucà par so conto, fasèndolo finir drito filato rento Batisaldo. Là, Pomi, Benito e Ciocheta, i sorava la sèn co na carafeta de crinto, spetàndolo inpassienti par farghe fare el quarto a brìscola.
“Tusi, stasera no posso star che dó minuti, ’pena pa’ rinfrancarme le ganbe. Vien senare casa mia propio el Toni Moràbito, l'altoatesin, quéo che da mesi deventa stralocio par la Nani. I lo ga mandà par l’ùltima licensa prima de finir la naja e se vede che ’l ga na pressa boja de portàrsela via, la me creatura.”
“Osto, bel osto, inpièname on goto, porta na damigiana par far festa tuta la stimana!” E Pino, rancurà da tuta la conpagnìa, el ga batù el fante fin che l’osto no ga libarà la tola da i goti vodi e, fasendo balar le ciave, el li ga ’postrofà co ste seche parole: “Xe ora de ’ndare a slafèn. ’Note, cristiani: a doman!”
Uno a la volta i amissi se ga alsà da tola; Pino el jera ece omo... El ga saludà tuti co ’a vosse on fià inpastà e, ficàndose le man (che paréa ’vere ’l tremajo) ’te le scarsele, co la so anda senpre pi de trivelon el ga sercà de orizontarse verso casa. “Come che l’è ridoto, poro can – ga fato l’osto, scorlando la testa – daromài el ga el sugo de visèla al posto del sangue... Chissà cossa che lo speta da le do rubèsteghe che 'l Padreterno ghe ga dà par penitensa... Le ghe farà passar la bala in pressia, ghe scometo...”
Nissun pol savere quanti pensieri de filosofia esistensiale xe passà in pochi metri de strada par la mente de Pino; a la fine, dopo ’ver mirà par on’ùltima volta el celo cussì slusente, inbrilantà de stele, el se ga deciso a métar la ciave ’tel scroco. Orpo... vuto védare che la so dona la ghe gavéa canbià la seradura, tanto par farlo danare? “’Melia, ’Melia!!” el ga scominsià sgolarse ma, da drìo i veri de la fenestra in cusina che dava so la corte, gnanca on segno de vita... “’Melia, amore mio!!” e da insima, on lesièro smòvare de ’a coltrina... Par on tenpo che ga parso na eternità, el porocristo el xe restà lì, a rumegare co ciave e scroco, co ’n sangioto slandron che lo sidiava... Intanto se ga fato so ’a porta Toni, co na facia da s-ciafi che no ve digo, i caveji driti e inpomatà a la Hitler-via, alto e inamidà ’te ’a so divisa da oficiàe, che la paréa quasi nova de balin, tanto la jera neta e stirà...
Pino el lo ga vardà sito, dal basso in alto, dindolando le ciave come on macaco; chealtro, co ’n soriseto da desprìsio, el lo ga brincà par el croatin e ’l lo ga menà dessora, gnanca el gavesse vudo fra ’e man on buratin.
“Mi, a dirla s-ceta... la ’Melia me speta... la Nani... El me meta zo, e sùito, cramèn!”
“Certo, Signor Pino, ma, prima di presentarci alle sue Signore, penso sia opportuno che Lei si rinfreschi un poco. Che ne dice?”
E Pino, porocan, demoralisà e sensa pi voja de dar batalia, el se ga ’assà métare a forsa soto on geto de aqua freda patoca, nudo come on verme, sconfito...
El bàgola tuto, el sbòlsega e de tanto in tanto el tira zo qualche saraca ma... la so ’Melia no riva, la lo ga sbandonà!
Finìo tuto, Toni el ghe juta rivestirse co ’n bel soriso e, come se gninte fusse stà, el lo spòncia ridendo:
“Papà, la sua ’Melia e la bella Nani, ci aspettano. Su, entriamo in casa!”
Muso duro e bareta fracà, invergognàndose anca on poco, Pino el ghe va drìo.
Inte on canton la tosa cusisse la dota, la alsa ’pena i oci dal laòro e par che la voja brusarlo; la ’Melia invesse, sbasìa in facia e co na làgrema che ’ncora ghe bala so ’a massela, la ghe slonga i brassi come na brava sposa inamorà: “Pino, caro, te ’o sè che xe stà pa ’l to ben, vero? Toni el me lo ga ’ssicurà che ’l savéa elo come fare, parché la to bala se sorasse in pressia!”
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Se no nasse fiòi…
Na socetà che sa vardare avanti, la ga da preocuparse se la vede che no nasse fiòi… o se gh’in nasse massa pochi: serve individuare le cause e métarghe rimedio, senò la xe destinà a fare la fine del poro sugaman…
de Mario Sileno Klein
Da Vicenza
Na bala passà in pressia
de Ines Scarparolo
|
