|
Editoriale
Se no nasse fiòi…
Na socetà che sa vardare avanti, la ga da preocuparse se la vede che no nasse fiòi… o se gh’in nasse massa pochi: serve individuare le cause e métarghe rimedio, senò la xe destinà a fare la fine del poro sugaman…
 | | Al de là de quelo che se vede ne la pàgina dopo de questa (la n. 4) con l’anuncio de putini che xe nati, fin che tanti de sti letini qua resta vodi… ghe xe da preocuparse. |
Tra i tanti falimenti de la socetà italiana del periodo de crisi economica de sti ultimi ani, quelo segnalà da l’ISTAT, poco tenpo fà, el xe uno de i pi seri e deludenti. Nel 2013 se xe registrà, par la quinta volta de seguito dal 2009, el mìnimo storico de le nàssite nel nostro Paese: apena 514mila. Finora el fenomeno jera stà conpensà da le nàssite de i imigrati che metéa al mondo piassè fiòi de noaltri. Basta vardare le scole dove el nùmaro de putèi de origine straniera o fiòi de imigrati de seconda generazion el xe senpre pi alto. O mèjo el jera pi alto, parché ’desso i ga messo on freno anca lori.
Dire che se trata de on fato preocupante no xe esagerato. Semo de fronte a on ciaro segnale de sfiducia in tuto e par tuto, par no parlare de paura del futuro. I zóvani che se sposa i ga tanti de chei problemi da afrontare che l’idea de métare al mondo on fiolo la vien rimandà se non adiritura scartà. Non par gnente l’età media de le done che partorisse la xe passà a quasi 32 ani de età.
Pesa sicuramente pi de tuto el laoro che ghe xe e no ghe xe, e, se ’l ghe xe, el xe “precario” (anca dopo 25 ani, come nel caso de na zerta insegnante che conosso mi); catare casa in afito a on prezo ragionévole xe come pescare na perla so ’l fondo del mare… Ma quelo che preòcupa de pi le copie zóvani xe la mancanza de sicureza; no le vede bone prospetive a l’orizonte che se mostra pien de nuvoloni neri, de promesse e provedimenti che ghe fa bao a le necessità del presente.
Fin a qualche ano fà, anzi qualche diesina de ani fà, el corajo vegnéa premià, le idée se podéa realizarle, i progeti faséa strada, ma ormai tuto questo xe drio deventare on ricordo. Cussì se catemo co on Paese senpre pi vecio, co milioni de pensionati senpre piassè poareti e generazion de zóvani che subisse pi de tuti le conseguenze de na crisi che, tra parole, promesse politiche, tanto fumo e poco ’rosto, se xe incancrenìa al punto da far malare la speranza e l’otimismo.
Se la situazion la xe questa, bisogna assolutamente darghe on tajo, bisogna canbiare strada. Anca se no semo pi canpioni del mondo nel calcio, ghemo na storia, na religion e na tradizion che el mondo ne invidia. Naturalmente, i primi che ga da reagire par canbiare le robe semo noaltri: la politica, l’industria, la cultura le ga da dare el bon esenpio, parché se possa tornare a pensare positivo. E soratuto quei che ga fato i schei in maniera disonesta o poco ciara, i ga da sentirse in colpa e riparare al dano ch’i ga fato. Na volta tanto, i fati contarìa pi de le carte e de le parole!
Solo cussì se pol tornare a créssare: de vita e anca de nùmaro. Solo co sto necessario canbiamento de “rotta”, podemo tornare a darghe fiducia a le fameje e, pian pian, tornare a far nàssare putèi, visto anca che, noni a disposizion, ghe n’è che basta!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Se no nasse fiòi…
Na socetà che sa vardare avanti, la ga da preocuparse se la vede che no nasse fiòi… o se gh’in nasse massa pochi: serve individuare le cause e métarghe rimedio, senò la xe destinà a fare la fine del poro sugaman…
de Mario Sileno Klein
Da Vicenza
Na bala passà in pressia
de Ines Scarparolo
|
