Da Lendinara (RO)

E par zonta... un stramuson!

... la destinazion la me pareva de bon auspicio...

... dove el fiume el se incontra co ’l mare, atraverso brazi de tante forme...

A go ’ncora vivo el ricordo de chela giornata de fine istà, programà da tenpo, inte na isoleta quasi sperdù del favoloso Delta del Po, là zo in Basso Polesine. Al tenpo, sto teritorio no ’l gaveva la fama de ’desso e el so parco no ’l jera gnancora stà dichiarà patrimonio de l’Unesco, pur essendo aprezà da un zerto tipo de turismo. A jèrimo na conbrìcola de zinque amighi ca stàvino inte la stessa via, tra i quatòrdese e i disnove ani, e pa’ sta rason ne ga ’conpagnà na vizina de casa, na dona co’ la testa su le spale. Par uno de lori, mi a provavo qualcossa in più de ’na sènplice sinpatìa; e dunque la destinazion, un scano de sabia longo 8 chilometri, destirà da la boca del Po de Goro fin al Lido de Volano, ciamà “isola dell’amore” la me pareva de bon auspicio. Lì a ghe jera na locanda intel più puro stile del posto e se podeva (no’ me ricordo se a nolegio o cossa) torse i gomoni a remi. Lu el jera on bravo noadore e mi, al contrario, ironia de la sorte, a gavevo inparà ’pena ’pena a fare el morto.
La me vizina de casa, signora Anna, no’ la s’à gnanca messo el costume; dopo ’ver despiegà un telo de spugna su la spiagia selvagia e solitaria, co’ un ocio la lezeva e co’ chel’altro la ne tegneva controlà, tanto più che nessuno a se ga alontanà al punto da no’ èssare visto in distanza. El me “filarin” el voleva insegnarme a noare, ma quando che ’l ga visto che ghe voleva tanta pazienza e che forse a sarìa stà solo tenpo perso, el ga preferìo spìnzarse un fià al largo, da lu solo. Mi a so’ restà a pochi metri da la riva, caminando co l’aqua ca me rivava al colo. Francesco, Oscar e la Cinzia, inveze, i xe montà sul gomon e i se dava el canbio a remare, fasendo tanto de chel casoto che de più no’ se podeva. Lì, da mi mi sola, dopo un fià a me son stufà e quando ca go sentìo l’aqua rivarme in boca a go ciapà paura e me son girà verso la spiagia par tornare indrìo de chei pochi metri ca gavevo fato. Xe stà propio giràndome che no’ go più sentìo la tera soto i piè e qualcossa ca me tirava in avanti e dopo in zo, na forza ca no’ riussivo a contrastare e ca me ga fato stare, no’ sò quanti minuti ca pareva eterni, soto aqua senza riussire a respirare. A intervali, l’onda la me spinzeva in su, giusto el tenpo par urlare, e po’ da novo zo, butàndome inte la disperazion più nera. A poca distanza a vedevo la Cinzia che la urlava come na danà, tegnendo el remo par aria e no’ capivo parchè nessuno de chei tre cretini in seco sul gomon fusse vegnù in socorso (più tardi i me spiegarà che no’ se jera boni da tirarghe chel remo fòra da le man, parchè ciapà da na crisi isterica; ghè da crédarghe?). E lu? Più avanti, un bel tòco in là, co’ i brazi par aria, drìo negarse anca lu.
Ste sène a le vedevo quando ca vegnevo a gala, par pochi àtimi, insuficenti a ciapare fià par la sucessiva “apnea”. A jero sicura ca fusse rivà la fine, a gavevo scominzià a védare robe ca no’ esisteva e ca no’ digo parchè le me fa ’ncora un zerto che. Inte quei ca pensavo i fusse i me ultimi minuti, a go ’vù solo un pensiero: el dolore de me mama par la perdita; me diaspiaseva soratuto par ela, parchè, na volta ’ndà, mi no’ gavarìa più patìo ma ela sì. Inte un stato de semicossienza, a go sentìo un strussioto, na roba ca me vegneva incoste e, senza savere cossa, a me ghe so’ tacà co’ tute le me forze: el jera un barcon co’ dessora un omo ben tapà. ’Pena che el se ga chinà verso de mi a lo go ciapà par el colo, e proprio intel culmine de la felicità par el pericolo scanpà, a me xe rivà un stramuson ca me ga fato destacare dal me salvatore e tornare soto aqua. La xe stà ’na sensazion orìbile, pezo de quela de qualche àtimo prima, ’na crudeltà ca no’ jero bona de capire, no’ savendo che quelo el jera l’unico modo par no’ èssare trassinà inte la me stessa situazion. Ma subito dopo l’è tornà e, ’jutà da na corda, el ga fato la so bona azion, prestàndome tuti i socorsi del caso, tecniche manuali de respirazion conprese. Senza desmentegare le più elementari regole de cavalerìa, prima el m’à tirà sù mi, e dopo l’è ’ndà da chel’altro che, nonostante l’esperienza, el jera in dificoltà. Par fortuna che la signora Anna la jera ’ndà in zerca de aiuto. A me ga volesto tre giorni par resussitare... (scherzo, anca s’a xe vero ca so’ stà tre giorni senza vèrzar boca, né par parlare, né par magnare), co ’l brusore de un stramuson a tradimento.
E cussì a go savesto che l’amore l’è anca un’isola, pericolosa s’a no’ se sta atenti, dove el fiume el se incontra co ’l mare, atraverso brazi de tante forme, distese, dune, gorghi, buse, dove uno el podarìa sprofondare par senpre. Un paesagio da sogno, senpre pien de promesse.

[torna sopra]