|
Da Arzergrande (PD)
Trentasiè ani co ’e persone giuste
So trentasiè ani de lavoro dentro eà stessa dita, co i stessi paroni, go avùo modo de conóssare tante persone. Persone che, par capacità pi o manco bona, i xe sta là, tanto o poco tenpo. De diverse etnìe, jera beo stare insieme, coesìstare, colaborare. No ’l xe stà, comunque, un percorso fàssie. Có gavemo inizià, jérimo in tre e se faseva el lavoro so poco spazio. Lavoro de falegnameria che ’l consisteva nel fare de i contenitori tipo gabie, casse, paéte. Un lavoro entusiasmante par mi che go senpre amà i lavori manuài e cossì, un poco a eà volta, go inparà a fare de tuto.
Se doparava machinari de chei tenpi e tanto martèo e ciodi. Jérimo tre persone afiatà, senza invidie reciproche e co tanta voja de jutarse. Nove ore al dì ’e jera eà norma, ma anca dieze, ùndeze e tuto el sabo e qualche volta anca eà doménega matina… lavoro ghe ne jera tanto. Pian pian se semo modernizà, co altri machinari e co pistòe, de tuti i tipi, a aria conpressa. Xe aumentà el personàe e xe canbià i capanoni, ma el posto jera senpre poco. I datori de lavoro i jera senpre i stessi e i gaveva un védare senpre un passo davanti, nel senso che i ga senpre savùo gestire ben eà situazion. Un passo a eà volta i xe deventà ’na potenza.
Go gestìo par tanto tenpo un reparto de chel lavoro e so’ stà senpre considerà, anca parché go senpre sercà de éssarghe, co tanti sacrifici e fadighe. Go colaborà co tante persone che no jera italiane e go senpre avùo un bon raporto. Quando che so’ ’ndà in pension, qualcuno de jori me ga abrassà e ’ito: “Sei stato per me un maestro anche di vita.” Gnente xe stà pi gratificante e questo ga confermà eà me opinion riguardo al fato che, a sto mondo, xe senpre giusto conportarse ben co tuti. ’Desso i operai i xe ’na otantina circa e nonostante tuto, el lavoro ghe xe.
De quei trentasiè ani go un bel ricordo e anca se xe passà cinque ani dal me congedo, co pi de qualcuno chel bel legame no ’l se ga mai siolto. Un pensiero particolare va a chi che so sti ani ne ga ’assà.
’E me paròe so sto caro mensìe de Quatro Ciàcoe ’e voe éssare un tributo a eà amicissia, a eà fradeanza, a eà toeranza, par dire che eà coesistenza xe possìbie, pur co tante diversità. Anca se el mio el jera un anbiente de lavoro, el poe de sicuro rispeciarse so l’anbiente sociàe e come so ’l lavoro, anca so eà vita de tuti i dì ghe voe rispeto e voja de vegnerse incontro.
A eà fine de tuto sto discorso go da dire che me ritegno ’na persona fortunà parché sti trentasiè ani passà a eà Transpak no i xe stà soeo trentasiè ani de fadighe, de sacrifici, de corse, ma i xe stà, anca e sora de tuto, trentasiè ani passài co de ’e bèe persone… vorìa quasi dire, co ’e persone giuste.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Vinsarà l’amore?
No ne xe gnancora passà el magon par i fati terìbili de morte, che ga colpìo l’Europa in sti ultimi tenpi. Da st’altra parte del mondo ga risposto la pi grande prova de stima e de amore che la storia possa ricordare.
Vinsarà l’amore o dovaremo fare i conti co l’angossa e la minacia del male?
de Mario Sileno Klein
|
