Da Vicenza

La Candelora

La “Candelora” o Festa de le Candele che le rapresenta Gesù “Luce e Vita”.

Andrea Mantegna (1431-1506), La Presentazione al Tempio (1460), tempera su tavola, cm 67 x 86 (Staatliche Museen, Berlino).

Giotto, Presentazione di Gesù al Tempio, afresco de la Cappella degli Scrovegni, Padova.

Có jero tosa, a sentìo parlare de na “purificassion” che gavéa da far le sposete có le deventava mame par la prima ’olta: par ben coaranta dì (tanto le durava le robe de le fémene dopo de ’ver conprà) le gavéa da star distante da la cesa parché no le jera “pure”...
I veci ne contava diritura che la sposa, ani che fu, no la dovéa ris’ciar de métare gnanca on passo ’te la cesa, ma la stava ferma so ’a porta fin che ’l prete no ’ndava torla par portarla rento.
A mi, la me paréa na ingiustissia bela e bona. Ma come, za se gavéa rancurà el toseto ’te la pansa par nove mesi e dopo se ’o gavéa messo al mondo, e no la jera serto stà na passejada, cossa se gavéa mai da “purificare”? Manco màe che, co i ani, sta usansa la xe stà messa da parte, almanco ’te la nostra Liturgia.
Conta el Vangelo che anca la Madona la ga obedìo a sta prescrission, vossuda da la Leje Ebraica e, solo coaranta dì dopo de ’ver messo al mondo el so Gesù, la lo ga portà al Tenpio insieme a Bepi, par purificarse, poderlo degnamente consacrare a Dio e farlo conóssare a tuta la comunità.
Niantri cristiani ricordemo i coaranta dì dopo el Nadàe al dó de febraro, co la “Candelora” o Festa de le Candele che le rapresenta Gesù “Luce e Vita” par tuto el mondo. Me ricordo che da toseta me vegnéa dà na candeleta che co tanta comossion a tegnéo inpissà fra le man: la gavarìa portà casa e anca a la me fameja no sarìa mancà la luse del Signore. Ghe jera chi, a la benedission de le candele, el portava par so conto on cero grando, tuto decorà. Pol darse che ’l pensasse de far bèa figura, ma sia el cero che ’a candeleta servìa pa ’l stesso fine: far sì che Cristo co ’a so luse s'ciarasse de Vita la casa. La candeleta jera ciamà anca serióla e la vegnéa picà rente ’l leto; la se inpissava tute le volte che ’l tenpo tanburava, có ghe jera na fémena che partoriva e ’ncora se ’l prete ’ndaséa portarghe i oji santi a on malà messo màe.
On tenpo el mese de febraro jera considerà l'ùltimo de l'ano, quelo che ghe dava el benrivà a na stajon nova, la Primavera. Februus jera na divinità de i inferi e Februa jera ciamà la festa de la purificassion de i vivi e de l’espiassion de le colpe de i morti. La vegnéa selebrà 'te la seconda metà de febraro, par coesto sto mese vien considerà, ’ndandoghe drìo al rito pagano, el mese de la purificassion e, in onore de Giunone Februa (o “purificatrice”), i februales romani i coreva par la sità co de le torce, dopo de ’ver ’vudo la vìsita de le àneme de i morti.
Ghe xe na straje de proverbi che se riferisse propio a sto mese (deventà el secondo de l'ano), che xe sìnbolo de nova stajon e nova vita: “El dì de la serióla, un caro pa’ bestiola” che vol dire che, rivà a sto dì, se ga da far ben el conto del fen restà in tesa, par far sì che ghin sia bastansa da dàrghine on tanto a ogni bestia.
El proverbio che me vien inamente co fassilità, parché doparà anca da i mìi, el se riferisse al tenpo: “Da la Candelora de l'inverno semo fora, ma se piove o tira vento, de l'inverno semo drento.”
So ’l bel libro che me xe stà regalà tenpo indrìo: La casa e le tradizioni popolari, curà dal prof. Manlio Cortelazzo, par Neri Pozza Editore (1998), a go catà sta sinpàtica zonta: “Se fa solo solicelo, ghin’è un altro mesarèlo.”

[torna sopra]