|
Ricordi de guera, in veronese
Varda che te caschi…
 | I gavéa fato un cesso par piano, tacà ’ia de fora da i muri (come questo, in alto a sinistra ne la foto).
|
A Santa Matia, su i monti sora Verona, ghéra un palasson, ’desso i ghe diréa condominio, ma alora i ghe diséa “camilion”, indove ghe staséa na diesina de fameje. Quando i l’avéa fato sù a quei tempi, no i gavéa fato i cessi parché par i bisogni de note i doparava i bocài, meténdoli dopo in te ’l bufeto (magari snasando tuta note la spussa), e i le udava a la matina in te un luamar che ghéra de drìo a la casa, e de giorno par i bisogni in te un cesso de frasche, sempre impiantà sul luamar.
Ma sucedéa che qualchedun invesse de portar la roba in te la busa del luamar, el le butava zo da la finestra. Meti che de inverno l’éra manco mal, ma de istà se pol solo pensar cossa ghéra. L’è andà avanti cossita par tanti ani fin che, dopo tante barufe, i paroni i s’à decisi de far i cessi. I ghe n’avéa fato far uno par piano, tachè ’ia de fora da i muri. (Se ghe ne vede ancora anca se no i serve pi su qualche casa vecia de Verona). I tubi i andaséa a fenir in te na busa tuta sarà, co solo un buso de sora sarà co na piera.
Na olta o dó a l’ano bisognava udarla se no se voléa che la andesse de sora. I tirava ’ia la piera e co un secio tacà a un mànego longo i tirava fora la roba e i andaséa a udarla par i campi. Par noantri buteleti, védar ’sti mesteri, se godéimo curiosar, ma i ne mandava ’ia parché i gavéa paura che se sporchéssimo o anca che ghe andéssimo drento co tute le conseguenze.
Ghéra squasi fenìo quela olta, ghéra ancora poca roba, sì e nò vinti schei. Me mama la ne dise: “Fago nantro giro e dopo saremo la busa, me raccomando no stè vicinarve e, se vien qualchedun, parélo ’ia. E ti che te si el pi grando staghe atento a to fradel Marieto, te sé che l’è vivo. Me raccomando!” No la fa gnanca tempo a nar ’ia che el buteleto el scominsia a titar de i sassi, vissinàndose sempre piassè par centrar el buso.
“Vien ’ia che no te sbrissi che ghè tuto mojo!” Nò, ’desso el vol vardarghe drento, e difati el sbrissia e zo in tel pocio. El sigava ajuto, ajuto, tuto sporco de fogna che me digo che el ghe n’à anca beùo. Ciamo ajuto, ma no ghè gnessun che me sente. Cossa fago? Go paura de andar drento anca mi, ma ò visto el secio col baston e ghe l’ò slongà zo. Piansendo el s’à tacà. “Sta’ fermo che ’desso riva la mama” (no s’éra mia bon mi de tirarlo sù).
Come la riva e no la vede pi el buteleto, l’à imaginà quel che l’éra sucesso, la scominsià a sigar ajuto anca éla. “Bruto sassin, s’à nega to fradel! Maria Santissima giùteme. Marieto, Marieto…”
“Son qua, mama, dài tìreme sù” el ghe dise sbossegando. La vede el baston e co fadiga la le tira fora tuto sporco e smerdà. La voléa basarlo ma… prima l’è andà a lavarlo. Ma no l’è mia fenìa cossita. L’è andà a tor na stropa de sanguenel, la ga cavà le foje e la n’à dato tante de quele stropejè su le gambe, ma tante che ghè restà le vissighe par na stimana. I l’à fato ancora quel laoro, ma noantri la ne sarava in casa. Però ghéra un finestrin che daséa sul dedrìo e ò fato fadiga fin che no l’è deventà pi grando a starghe atento che no el se spingolesse par vardar cossa i faséa.
“Varda che te caschi!” Sì, alà… Par fortuna no ghè mai sucesso pi gnente de bruto e l’è ancora al mondo!
da È rivà i Mericani
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Vinsarà l’amore?
No ne xe gnancora passà el magon par i fati terìbili de morte, che ga colpìo l’Europa in sti ultimi tenpi. Da st’altra parte del mondo ga risposto la pi grande prova de stima e de amore che la storia possa ricordare.
Vinsarà l’amore o dovaremo fare i conti co l’angossa e la minacia del male?
de Mario Sileno Klein
|
