|
Editoriale
Vinsarà l’amore?
No ne xe gnancora passà el magon par i fati terìbili de morte, che ga colpìo l’Europa in sti ultimi tenpi. Da st’altra parte del mondo ga risposto la pi grande prova de stima e de amore che la storia possa ricordare.
Vinsarà l’amore o dovaremo fare i conti co l’angossa e la minacia del male?
 | (foto Corriere della Sera)
|
Eco na domanda che xe ben farse ogni tanto e soratuto oncò, davanti a sti ciari de luna che ne dà l’inpression de no prométare gnente de bon. Ghe xe el tentativo de far nàssare on “disordine globale”: vinsarà el rispeto, la libertà, la giustizia e l’amore? O dovaremo rassegnarse a rivìvare on tenpo tavernoso e turbio?
Sicome semo tuti so la stessa barca, dovemo rèndarse conto de quelo che sta sucedendo. Xe pur vero che la cossienza xe come le gatarìssole: ghe xe chi le teme e chi nò, ma proprio ’desso che semo drio comemorare i 100 ani da la Grande Guera e i 70 da la fine de la Seconda Guera Mondiale, ghe xe pi bisogno de darghe bado a sti segnài de nervosismo.
No semo solamente so la stessa barca, a semo anca te ’l stesso mare: el Mediteraneo. Dopo secoli de comerci e dopo le lote de le potenze europee par otegnere on posto al sole, colonizando Africa e Asia, sfrutando le so risorse naturali, forse xe rivà el momento (magari xe za da on tòco che ’l ga tacà) de pagare i intaressi.
L’imigrazion verso el Nord-Europa (Francia, Gran Bretagna, Germania, Svezia e anca Italia), in corso fin dal dopoguera e aumentà in sti ultimi ani, xe la prova che se ga roersà el saco. In ogni nazion, no ghe xe pi na raza, on popolo, na lingua, na religion, ma tante raze insieme, tanti popoli insieme, tante lingue e tante religion insieme.
La nostra socetà xe deventà senpre pi multietnica, multiculturale e multireligiosa. Questo conportarìa l’incontro de popoli con culture, tradizion e religion difarenti, con diverse vision del mondo e diversi valori. Da na parte el sarìa on “arrichimento”, da n’altra el pole èssare ocasion de scontro. Eco alora regole nove da rispetare e da far rispetare, par favorire na pacifica convivenza, a base de dialogo, rispeto reciproco e giustizia sociale.
Tute robe difìcili da otegnere, spece se se ga on’idea sbalià del significato de libertà, conpresa la libertà de parola e de stanpa. “Posso scrivere tutto, devo scrivere tutto”: questa xe la pura manifestazion de on delirio de aroganza e de ignoranza.
Quindi, dopo avere solidarizà co i vignetisti e i polizioti, copà dal fanatismo religioso, sarà necessario riflètare se esiste anca la libertà e el dirito de no èssare ofesi, gnanca da on giornale ateo come “Charlie Hebdo”!
’Desso me vien in mente la frase latina de Publio Virgilio Marone: “Omnia vincit amor et nos cedamus amori” (“L’amore vince tutto e noi abbandoniamoci all’amore”, Bucoliche X, 69).
Se volemo salvare la nostra socetà e el mondo, pensemo che no ghe sia alternativa: dovemo sèliare de èssare onesti e lìberi, con l’amore e col rispeto de i diriti de i altri.
Tolemo pure nota de i 2 milioni de persone che l’11 de genaro passà ga marcià insieme a Parigi contro el terorismo, ma no stemo desmentegarse de i 7 milioni de cristiani che el 18 de genaro a Manila (Filippine) ga scoltà la Messa, ga pregà e manifestà fede e amore, davanti a Papa Francesco.
La storia xe anca questo, soratuto questo: “Omnia vincit amor”.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Vinsarà l’amore?
No ne xe gnancora passà el magon par i fati terìbili de morte, che ga colpìo l’Europa in sti ultimi tenpi. Da st’altra parte del mondo ga risposto la pi grande prova de stima e de amore che la storia possa ricordare.
Vinsarà l’amore o dovaremo fare i conti co l’angossa e la minacia del male?
de Mario Sileno Klein
|
