Da Thiene (VI)

Erbe salvàdeghe... bone da magnare
Contro i magnari senpre più "sofisticà" ne dà na man la Natura co i so prodoti "spontanei". Serchemo de no intossegare anca quei!

Ortiga

Panetèi

Senpre più “problematica” deventa ancò la risposta par chi, sentàndose a tola par consumare anca un sènplisse pasto el se domanda: “Saralo un magnare genuìn? Che ’l sia stà tratà co sostanse danose, che pol farte vignere un càncaro?...” Interogativi motivà che lassa senpre più dubioso l'omo de ancò, che no ’l ga da èssare acusà de regression se ’l studia de tornare par quanto possìbile a la natura, co n'alimentassion manco "sofisticà", che ghe daga più garansìe par la propia salute. El solo fato de interessarse e de ’ndare in serca de le erbe, xe za na medessina, e no da poco. La distension, l’aria sana e l’evasion, i xe fatori inportanti, insostituìbili ne l’esistensa de l’èssare uman; sensa contare che la sodisfassion de èssarse procura calcossa de genuìn conpleta el "condimento" del piato, anca el più rùstego de erbe de canpo. Se xe più atirà, sensa dubio, da un fenocio polposo, da na gigantesca carota, che da sola fa pasto, da séini bianchi carnosi e tènari... Ma tute ste belesse gonfià, fruto de un conplicà mecanismo industriàe, dal luame "chimico" a la sèra inpregnà de "anti-parassitari", a l'artificiàe sistema de conservassion te i grandi magasini, no podemo de serto paragonarle a un bon piato de Ortighe, de Silene o de Radicio salvàdego! Xe fora discussion che el vantajo xe de sicuro de ste ùltime. Dopo sto “doveroso” preànbolo, passemo a mensonare qualcheduna de le erbe de largo consumo che in sto periodo, inissio de la primavera, podemo rancurare co tranquilità sensa ris-ciare de tor sù quele tòsseghe.
El pissacan (Taraxacum officinale, Web.). Xe sicuramente l’erba salvàdega più conossuda e rancurà; la cresse drio le strade, te i canpi, in te i fossi, e, come dise ’l so nome, te la cati a... ogni pissada de can. Ghin xe de tante rasse e le foje pol ’vere forme difarente, ma tuti boni da magnare. Bisogna ’ver tanta passiensa a rancurarli e stare de gobòn par ore pa inpienar la sporta, e no la xe finìa qua, parché ghe vole un mucio de tenpo anca par curarli. Toéndoli su, stemo ’tenti a no butare i bòcoli ténari e nutrienti. No xe prudente fàrgheli magnare a i putèi de sera parché podarìa scaparghe la “pipì" in leto: i xe sconsilià par quei che ga la pression bassa, racomandà invesse par quei che la ga alta e a chi sofre de cativa digestion. Òtimo come insalata co i uvi e missià a altre erbe.
L’ortiga (Urtica dioica, L.). Gesto de ignoransa quando se scorla la suca in segno de comiserassion par chi se “ciba” de sta pianta. Giudichemo l’ortiga come erba infestante te i loghi più inpensà, e, par zonta, senpre vissin le case, scondendo na insidia co i so pili che, tocàndoli, te fa vignere i tavaroni e na gran spissa. Da ’e nostre parte vive n’altra rassa de ortiga, la Urtica urens (L.), più ciara e da ’e foje più tonde a difarensa de ’a dioica, che le xe fate a lancia, la ga un colore verde scuro e la pol rivare a più de un metro de altessa, a confronto de la urens de ’pena 50 sentìmetri. La dioica, più difusa e de conseguensa più doparà, la contien clorofila, fero e azoto, un ricostituente naturale par anèmici, e anca un "baluardo" de difesa pa i sani, in particolare contro l’influensa. Se rancura le sime tènare co do-tre pari de foje, doparando pòlice e ìndice, sensa paura de ortigade. Speciale par minestre, insieme co altre verdure de canpo. Bona anca lessa, consà co ojo, sale e formajo.
I panetèi (Valerianella olitoria, L. Pollich). Un tenpo i se catava in te i canpi coltivà a fromento o a sorgo e i cresséa spontanei sensa "concimi chimici", i gera più nutrienti e gustosi de quei ca cronpemo al marcà o da i frutaroli a i giorni nostri sensa savere cossa i ga doparà par farli vignere cossi grandi e bei. Serchémoli ancora in te i canpi "sani", i cresse sul finire de l’inverno, ma se pole rancurarli anca più ’vanti, in primavera, ansi in sto periodo i ga tante sostanse nutrienti che la piantina acùmula tel sforso de ’a formassion del fiore e de ’a semensa. Come insalata i xe forse i più conossudi, i va condìi al momento de magnarli.
I bruscàndoli (Humulus Lupulus, L.). Quante volte gavarì visto groeji incatijà e intorcolà ’torno i pali de ’a luce o “invadenti” siese e cespuli drio le strade de canpagna! Se trata, quasi senpre del "lupolo" che in te un ano, ranpegàndose ’torno a tuto queo che ’l cata pol rivare a la longhessa de più metri. El porta graspi de fiori "maschili" e femenili, sti ùltimi, i più vistosi, a setenbre i se trasforma in fiochi deti coni, e tignerli de ocio e ricordarse ’l posto xe assicurà na ’bondante racolta de bruscàndoli in primavera (marso-aprile). Xe fàssile, alora, distìnguare i tènari buti che spunta da la rajsa "perenne". Anca quando i geti passa el metro de altessa i xe utiisàbili, ma solo le ponte, par la longhessa de na spana. Se pole rancurarli tranquilamente sensa danegiare la pianta, parché da l’ùltimo gropo restà al de soto de ’a rotura, spuntarà presto ’n altro buto e se podarà fare un secondo racolto, anca se più scarso del primo. El vien consumà in diverse maniere: cusinà come i sparase, te le minestre o minestroni co altre verdure. Speciale se tratà in tuto come i spinassi. Ghin sarìa tante altre erbe salvàdeghe bone da magnare che meritarìa de èssare mensonà, ma manca... el spassio: contenteve alora de quele descrite sora, più fàssili da catare e riconòssare, ma soratuto tanto bone.

Da Nutrirsi al naturale con erbe selvatiche, Ediz. Paoline, 1977.

[torna sopra]