| de Franca Isolan Ramazzotto |
|
Tempi a confronto
L’oto marzo
 | | I òmeni i te spiociava come te fussi… na poco de bon. |
Ormai da tempo, l’8 Marzo l’è la Festa de la dona. ’Na olta no ghèra festa, ma so i paeseti de campagna, a le done, i òmeni i ghe faséa la Festa, parché, secondo lori, le done no le valéa gnente. Epure, i èra nati tuti da la panza de ’na dona, ma... ’pena vegnù fora da chel finestrin, za la dona la gavéa el destin segnà in tuto e par tuto; no se podéa gnanca métar fora el naso senza el permesso de l’omo. I òmeni invezze, i podéa fare coél che i voléa, nare indo’ i voléa lori, tore in giro le morose par dopo piantarle lì, nare a l’ostarìa, parfin i cessi vespasiani fati aposta par lori.
E le done?... Gnente de gnente: o fàrsela ’dosso o s-ciopare, e coesto fin a i ultimi de i ani ’70, almanco là a Presina... Se se catàino par strada e ne vegnéa on mal de panza, no podéino gnanca nare in ostarìa a béere ’na s-cianta de velen parché za i diséa che te si ’na troja senza èssarghe.
No ghèra divertimenti, e se a la domìnica ’na butela la voléa fare on giro in bicicleta con le so amiche fin in centro paese de Albaredo d’Adige par védare on poco de movimento, se la gavéa fradéi, uno a turno, el le ’compagnava; se la butela l’èra fiola sola come mi, ghe tocava passàre le domìniche in casa par farse la dota o pezzare le braghe par i familiari che naséa laorare i campi, o sentarse fòra a vardar ci passava, che in alora, là a Presina, no ghèra rigiro: passava ’na persona ogni vatelacàta. Se i te vedéa da tìti sola in te nantro paese, ghèra za fòra le ciàcole... e te jeri batezà... troja!
’Na matina in scomizio de la primavera del 2013, nando zo da le scale del ponte so la parte de Legnago, so ’l muro difronte le scale go visto ’sta sciita: “TROIA A CHI LEGGE”. Me go sentìa ofesa, anca parché nessuni l’à scancelà!!! Ci l’à scrita, o ’l ghe vive in mezo o ’l ga ricevù ’na bruta educazion da genitori che ghe dà sempre reson, che ride a ogni marachela senza darghe mai coalche stramuson... almanco coando i se lo merita. Chela frase l’avarà leta anca so mama, so sorele, le so amiche. E ’lora?... Coésta l’è ’na violenza psicologica! E pensare che se desfemo par ’sti scalmanà, parché, anca se jè oncora zóeni, a ’sti ani i vorìa fare oncora pari e paroni come la vecia mentalità. Par fortuna le done le s’à descantà... ma no’ del tuto! Semo in primavera 2015, la frase, magari smarìa da la man del tempo, la se vede oncora. Mi, a chel tizio ghe rispondo: “PORCO A CHI HA SCRITTO!”
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Che vita xela senza na dona?
Xe quelo che ne ga dito on vecio prete che vive da solo, che se fa da magnare, che se lava le quatro straze che ’l sporca, ma che ghe toca métarse davanti al specio e dire na parola a vose alta par farse conpagnìa
de Mario Sileno Klein
Da Thiene (VI)
Erbe salvàdeghe... bone da magnare
Contro i magnari senpre più "sofisticà" ne dà na man la Natura co i so prodoti "spontanei". Serchemo de no intossegare anca quei!
de Renato Scarpi
Da Verona
Na rosaria “de nono Aldo”
de Wanda Girardi Castellani
|
