Da Verona

El teremoto del 1117

Veduta de fine ’800 de l’Arena de Verona, in parte distruta nel teremoto del 1117.

In primo piano quela che vien ciamà l’Ala de l’Arena.

L’Arena l’è el simbolo de Verona. La so “Ala” bianca la le rende unica tra tuti i anfiteatri che i antichi Romani i à lassà in giro par l’Europa. Ma no l’è sempre stà così: ne i so primi mile ani de vita l’Arena la se presentava tuta rivestì de marmo… par la precision del “rosso ammonitico veronese” che ancora ’desso se cava da i monti de la Lessinia. La storia che ve contarò l’è de come l’Arena l’à perso el so vestito.
El giorno 3 Genar del 1117 faséa fredo a Verona. Un fredo bisso! Anca se i era le prime ore del dopodisnar, la çità l’era soto la neve da ore e la poca legna restà ne le case no la bastava a scaldarle. In più durante la note ghera stà ’na violenta scossa de teremoto che l’avéa butà zo qualche muro e ’na bona parte de camini. La gente che imbacucà caminava par le strade, la vedéa ’na Verona diversa da quela che conossemo adesso: le case de solito i era basse, a un piano, intieramente de legno o de sassi de l’Àdese ligà con la malta. El querto l’era de paja o de scàndole, con da ’na parte el camin de matoni… belo alto par evitar che le sdinse del fogolar le tacasse fogo in giro.
Tra le pòre case medioevali spuntava su le tori de i siori (uno de i pochi documenti de l’epoca el ghe ne conta quaranta) e varie cese. A serar l’ansa de l’Àdese coréa le mure: quele antiche de l’imperatore Gallieno e quele più recenti del re Teodorico. ’Pena fora da le mure ghera l’Arena, che con i so trenta e passa metri de altessa l’era forsi la costrussion più alta e imponente del tuta la çità. Essendo però da secoli che no se ghe faséa spetàcoli, par i veronesi del tenpo l’era ormai solo un posto riparà dove tegnerghe marcà o semplicemente andar a starghe de casa in mancansa de mèjo. Ne le mure se verseva anca le antiche “porte” romane: grande, fate ben e de piera bianca come l’Arena.
Profitando de la luce del giorno, la gente la stava ancora çercando de taconar i disastri causà da l’ultimo teremoto quando la tera l’à tacà a tremar de novo. Ma stavolta l’era più forte de quel de la note prima… Molto più forte. Paréa che no el dovesse finir più.
Così prima è scominçià a cascar zo le case e dopo anca le cese… proprio su la gente che dentro ne le cese l’era scapà a çercar rifugio. Finché un boato tremendo l’à superà tuti i altri: de s-cianto quasi tuta la cinta esterna de l’Arena l’era ’ndà zo, lassando solo un mossegoto che anca se el continuava a dindolar come ’na bandiera, el restava miracolosamente in piè. Dopo un tempo interminabile, el teren de Verona el s’à fermà. E dopo, in mezo al paltan de neve missià a pólvar e calsinassi è scominçià a spuntar fora la gente: gente che se çercava, gente che se trovava, gente che pianseva.
Se càlcola che el teremoto del 1117 el sia stà el più forte in tuta la storia de la Pianura Padana. Più forte de quel del Friuli del 1976, el ga ’vù el so epicentro a Ronco, a 26 km da la nostra çità, e da lì le so onde sismiche le à causà cròli da Venessia a Pavia, da Belun a Bologna… lassando soto le macerie probabilmente più de 30.000 morti.
Verona, la çità più colpì, l’à perso in un solo giorno bona parte de la so storia alto-medioevale: de cese, case e tori de periodo prima del mile passà el teremoto no è restà quasi gnente. Ma nel genar del 1117 el problema no l’era çerto i edifici storici, ma el fredo. Par fortuna almanco l’impediva che a la distrussion se zontasse anca ’n’epidemia de tifo o de colera: se podéa pensar prima a i vivi che a i morti.
Così fin da subito è scominçià la ricostrussion, frenetica, facilità da la montagna de piere pronte e ben squadrà che se trovava inmucià intorno a i piè de l’Arena.
Un secolo dopo ’sti eventi Verona l’era tornà più bèla de prima: era inissià intanto el periodo de la signoria Scaligera e in çità se costruiva a la grande. El stile l’era quel romanico: praticamente tute le cese de la çità (a partir da San Zen) i è stà ricostruì in quei ani, alternando piera da tajo e matoni, con qualche sbrissiadina nel gotico quando l’è stà el momento. L’Arena, anca se la s’à trovà sensa el so bel rivestimento bianco, l’è sopravissù! Forsi par el fato che par cavarghe le piere no ghera bisogno de smontarla, la s’à evità la fine che à fato i altri anfiteatri romani, so fradèi… pensemo a quel de Roma, quei de Pola o de Arles… sensa parlar de quel de Lucca dove de l’anfiteatro è restà solo el ricordo ne la forma de ’na piassa. Comunque la cinta esterna de l’Arena no l’è mia sparì… l’è sparsa in giro par Verona!
Fasìghe caso, girando par el centro, a quante case che le ga incorporà ne i muri de le bele piere de “rosso ammonitico veronese”.

[torna sopra]