|
Vita vissùa
L’ostarìa “Da Gamba”
 | | Insoma so chel banco ghe jera ogni bendedìo… |
No sò come, ma in sto ultimo periodo a go scrito su raquante ostarìe, e sì che no so’ stà mai un gran cliente de bar e ostarìe, de solito me fermo solo có go bisogno de calcossa: un cafè, un goto de aqua, un gelato o un bisogno urgente. In te sti casi me fermo su un bar, senò tiro ’vanti fin casa.
No parlemo po’ de le ostarìe: me pare me gheva senpre insegnà de stare lontan da chei anbienti, parché se inparava solo parolasse e biasteme. Có me so’ trovà a laorare ne la lavanderìa de l’Ospedale, jero invità spesso a ’ndare “Da Gamba”, na ostarìa ’pena fora dal cancelo de drìo, rente a l’Obitorio. Davanti a l’ostarìa ghe jera anca el massèo, cussì el jera frequentà anca da i massarioti e da i macelai che i ’ndava drento par conbinare vendite e aquisti: i beveva na onbreta de vin e i se strenseva le man par confermare i contrati fati.
Gamba, el jera un omon grando e robusto, el gheva un vosson che ’l se faseva sentire a sento metri de distansa, un modo de fare deciso e a volte anca sbocalon: no ghe mancava mai la parolassa condìa co’ qualche inprecassion al seguito. Anca so mojere e i fiòi no i jera tanto rafinài e co la massima fassilità i te mandava a chel paese, par no dire in chel posto da dove te ghè visto la luce par la prima volta. A na serta ora rivava anca la sorela de Gamba, na bela signora, ma anca ela, có la verseva la boca, la te faseva cascare i brassi par l’espression tut’altro che delicata e par l’acoliensa poco familiare: se sentiva che la vigneva da la stessa fameja… La se faseva giustissia da sola: quando i clienti pagava co carte da sinque o diesemila ’ire, pronta, la le faseva sparire dentro al canale del pèto, sensa farse védare da so fradèo.
A chei tenpi, có jèrimo al laoro, no ghe jera i distributori automatici che ghe xe ’desso; ghe jera solo quelo del cafè e miga te podevi bévare sete-oto cafè al dì, cussì ghévino vudo el permesso de ’ndare “Da Gamba” par magnarse un panin o qualche sponceto, bévarse ’na onbreta par rónpare el digiuno, visto che se faseva tuta ’na tirada.
Davanti l’ostarìa ghe jera el massèo, cussì a Gamba no ghe mancava la possibilità de pareciare raquanti sonpeti de mas-cio, qualche coeghin, del figà e core de vedèo, tripa e tante altre specialità. A la matina, có te ’ndavi a tore el cafè, i profumi che se sentiva i jera l’anuncio de quelo che la mojere de Gamba jera drio cusinare in te ’l fogo, cussì el deventava un passa parola, e a l’ora giusta se podeva gustare la specialità de la giornada. El dì che i faseva i sonpeti de mas-cio, Gamba el te presentava su un piato un sanpeto intiero: prima te magnavi la polpa co la coega, dopo te ciuciavi i osseti, lecàndote anca i déi che se tacava fra de lori.
Naltro giorno jera la volta de i coeghini: ’na feta de pan fresco crocante o ’na feta de polenta brustolà co’ sora na bela feta de coeghin, el faseva apena in tenpo de métarghe el stussicadente par tigner ferma la feta che l’andava via come la neve al sole. E quando che i pareciava le tripe?!... Anca quele, servìe su un piatèo, raquante fetèe de pan e via, e a la fine te dimandavi senpre ’na ultima fetèa de pan par tirar sù el poceto.
Al mèrcore e al vènare, fritura mista e anca là: sepoine, sardèe, ganbareti, tòtani… a richiesta, e a la sera folpi da riso lessài, bei caldi da butar zo a scotadéo. Sora al bancon no mancava mai na bela vantiera de sardèe in saòre, cussì se podeva rónpare el digiuno co un bel panin tajà a meso e drento dó sardèe co la so bela siola che sgiossava su le man el toceto del conso; me ricordava le tante sene fate có jero via militare. Senpre sora al bancon ghe jera de le vaschete piene de siolete in agrodolse, aciughe rodolàe co dentro el capareto, mèsi ovi duri: el tuto par tentarte e bévarghe drìo raquanti goti de vin spinài da i rubineti dorài, in meso al bancon.
Par chi voleva, a mesodì, Gamba el faseva anca da magnare tute specialità de casa: roba genuìna, come se dise ’desso, a chilometro zero; infati par de drìo el gheva un tòco de orto che el ghe produseva ogni bendedìo. Gamba el gheva anca la passion par i funghi e, sicome ’torno a l’obitorio, drento al canpo del massèo e drìo la strada ghe jera na mèsa foresta de vece piope, col canbio de la luna, el se levava sù de bonora e co’ la scala el tirava zo ’na paca de pioparèi. I pi grandi li meteva su un goto pien de aqua sora al bancon in bela mostra par farghe rabia a i amatori che no podeva far altro che conplimentarse par la racolta.
Xe da dire che, oltre a la solita clientèa fornìa dal massèo e da l’ospedale, tante volte ’ndava a tirarse sù anca chi vigneva a far visita a i morti a l’obitorio: i se fermava da Gamba par rasserenarse o canbiar ordine de idèe, dopo la visita al caro estinto. Co ’l tenpo el massèo ga canbià sede, Gamba ga coerto l’orto co ’na tetoja, trasformando el tuto in te ’na pisserìa par far laorare i fiòi: poco sucesso! Cussì un bel dì el ga deciso de vèndare tuto e gòdarse la pension anca lu.
Có passo da chele parte, a me vien in mente Gamba, la so fameja e tuta la zente che se fermava in ostarìa par un sponcion e ’na onbra senpre fresca.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Come gheto passà l’istà?
La prima domanda che vien a boca, ’pena che se incontra calchedun, la xe propio questa. E la risposta che de sicuro no tarda a rivare xe: “Cossa vòto che te diga… la go passà come tuti: calda e suta, co le so rogne, i so ciari de luna. Comunque la xe passà!”
de Mario Sileno Klein
Da Verona
El teremoto del 1117
de Wanda Girardi Castellani e Mirco Castellani
|
