Da Maran Lagunare (UD)

Intuissiòn profonda

Smete de pianze
El sultan el manda a ciamà el barbier parché el ghe taja i cavì, e ’l ghe fassa la barba. Finìo el so lavor el barbier ’l ghe sporzi el specio al sultano posta che ’l se veda. El sultano ’l se varda ntel specio e subito el scumissia pianze. Nasrudin, che ’l gera là presente, el se miti pianze anca elo. I piansi duti dó par un bel tòco. Po’ el sultano el smiti, mentre Nasrudin el continua ncora.
“Nasrudin” ghe fa el sultano, “me son messo a pianze parché ntel specio me son visto cussì bruto. Ma ti, ti parché te pianzi e no te rivi a fermate?”
“Sior benedeto, se ve vardò na sola volta ntel specio e ve se metùo subito a pianze; cossa dovarìssimo fa nantre, che ve vedemo duti i zurni.”


Giustà un sbalio
A Nasrudin ghe servi un ducumento legal, ma ogni volta el giudice, gnanca che ’l fussi a vive in Italia, lo rimanda indrìo, diséndoghe de tornà el zorno dopo. I amici i ghe spiega che ’l giudice el xe un omo avido, e che no ’l fa gnente sensa un regal. Nasrudin, capìo come che camina le robe, el zorno dopo el se presenta dal giudice con un scoloto de miel. El giudice el ciò el miel e ’l ghe dà subito a Nasrudin el ducumento che ghe serviva. La sera, el giudice el verzi el scoloto e ’l se nacorzi che drento xe sol un déo de miel, e soto duto fango. Rabioso, ma no podendo dì la veritàe, el ghe órdena a na guardia:
“Va’ là de Nasrudin e dighe che sul ducumento xe un sbalio, che ’l me lo porta indrìo parché go de corègelo.”
La guardia la va da Nasrudin e… duto calmo el rispundi:
“Dighe al giudice che ’l ducumento el xe a posto. Che ’l sbalio el xe sul miel, ma che ’l pol corègelo anca sol.”


Adesso no go più fame
Cascò in miseria, dopo zurni che no ’l magneva, disperò Nasrudin el se rivolgi al Signor:
“O Dio misericordioso, dame de magnà o ciome con ti, che preferisso murì pitosto de stà sensa magnà.”
Proprio in quel mentre se staca na piera de indelto e, cascando, lo sfiora mancàndolo par un pèl.
“Grassie, grassie, Signor” disi Nasrudin, “’desso no go più fame.”


Parché qua xe più lusiòr
Un el vidi Nasrudin in disnociòn drio sbisigà, ndà insercà de qualchi cossa soto un lanpiòn.
“Co’ te ga perso” el ghe disi.
“Go perso le ciave de casa” rispundi Nasrudin.
“E ndove te le ga perse?”
“In fondo là” rispundi Nasrudin, pontando el déo ntel scuro.
“E alora, se te le ga perse là, parché te le sirchi qua?”
“Parché qua xe più lusiòr.”


El polastro e i sui vistiti
Nasrudin el ga na famassa. No ’vendo gnente de magnà el va in un casal e robò un polastro e, scanpò untan, lo copa, lo spiuma e dopo cusinò lo magna duto… Dopo cinque minuti passa na guardia de là e vedendo el grumeto de piume la ghe disi:
“Nasrudin, co’ te ga cunbinò, cossa xe quele piume?”
“Gnente” rispundi elo. “El polastro ’l xe ndò a nuà e mi son drio faghe la guardia a i so vistiti.”


La porta
Un zorno la mare de Nasrudin lo ciama e la ghe disi:
“Fio, go de ndà fora un àtimo. Sta’ tacò a la porta e vidi de no fa entrà nessun.” Dopo mèsa ora riva là so barba che ’l ghe domanda:
“Nasrudin, xe in casa to mare?”
“No, la xe ndada fora un momentin.”
“Alora va’ in serca de ela e dighe che son vignùo a trovala.”
Ubidiente, sganciada la porta e metùa su le spale Nasrudin el va in serca de so mare. Ela, ’pena che lo vidi:
“Stupido!” la ghe fa malamente, “co’ te fa qua?”
“El barba, to fradel el ga dito che te digo che ’l xe vignùo a trovate.”
“E parché te ga portò la porta con ti?”
“Parché te xe stada ti a dime de no stacame de ela.”

[torna sopra]