|
Editoriale
Come gheto passà l’istà?
La prima domanda che vien a boca, ’pena che se incontra calchedun, la xe propio questa. E la risposta che de sicuro no tarda a rivare xe: “Cossa vòto che te diga… la go passà come tuti: calda e suta, co le so rogne, i so ciari de luna. Comunque la xe passà!”
 | Cussì ricordaremo el prof. Paolo Tieto…
|
A dire la verità… l’istà no la sarìa gnancora finìa, parché setenbre el xe ’ncora istà, ma la pi parte de la stajon la xe passà.
La procession de i giorni de sti du mesi caldi la ga visto capitare de tuto: dal processo pa ’l scàndalo Mose, al referendum de Atene, da la morte de inprenditori che se còpa da la disperazion, al drama de i pròfughi migranti, bandonà al so destin par mancanza de organizassion… o de cuore.
Proprio sto ultimo el xe stà el “tormentone estivo” anca de le nostre cità e de i paesi veneti: la vergogna de no savere cossa fare par farghe fronte a mejari de migranti in zerca de on destin difarente. E dire che no ghe xe gnente de novo: da senpre i popoli se sposta, ’bandonando la miseria par córarghe drio al benèssare o par scapare da la guera. E sì che, soratuto nel nostro Veneto, savemo cossa vol dire “profughi”, avendo za afrontà el fenòmeno spece ne la prima guera mondiale e po’ ne la seconda, quando la zente scapava da le zone de pericolo, trasferéndose soratuto ne le canpagne, dove el bon cuore e el sentimento de l’acolienza jera alimentà dal credo de la carità cristiana.
Altri tenpi, altri òmeni, altri sentimenti. Oncò, anca nel nostro Veneto (oltre che nel Paese e in Europa), gran confusion, gran polèmiche e proteste. Con tuta probabilità, anca par colpa del colore de la pèle, come se sti poricristi vegnesse da on altro pianeta.
El ga el so da fare papa Francesco a córare in cao al mondo, predicando amore, acolienza, giustizia e libertà, intanto che la dignità umana la va a farse frìzare.
Davanti a tute ste situazion, forse la risposta pi giusta da dare, in merito a l’istà, la sarìa: “Comunque… par noantri che no la ghemo passà so on leto de ospedale, so on gomon te ’l “stretto di Sicilia”, so ’l marciapiè de na stazion feroviaria, so na tenda tirà sù drento a na caserma desmessa… par noantri la xe passà manco pezo. Insoma a se la ghemo cavà ’bastanza ben!”
Questo se ciama èssare onesti, parché difati ghe xe chi ga podesto inbriagarse de sole sora na sdrajo piantà so la sabia de Sotomarina o de Jesolo; ghe xe chi ga ciapà sono soto l’onbrelon tra le piere de la Croazia e ghè chi ga fato scorta de verde e de fresco tra i pini de le nostre montagne.
Al contrario, no xe rivà a conclùdare ben sti du mesi estivi, el nostro amico prof. PAOLO TIETO de Piove di Sacco, morto a 87 ani, a l’ospedale par malatìa, el 21 de agosto ’pena passà. El prof. Tieto, scritore, sagista, storico de l’arte e de leteratura, el ga tegnù viva la cultura del Piovese e del Veneto.
Semo in tanti a ricordare e rinpiànzare la so presenza autorevole in premi leterari, come presentatore de artisti in mostre de pitura o presentazion de libri. A la cerimonia de la “Mastèa d’Oro” de Campagnola de Brugine, se se incantava a scoltare con quanta passion e quanta conpetenza el meteva in risalto le figure de i personagi premià.
Paolo Tieto el ne lassa un patrimonio de studi e ricerche sul teritorio de la Sacìsica e de la Riviera del Brenta che sarà fadiga desmentegarlo in pressia: i so libri, la so conossenza i continuarà a parlarne del so amore per la storia, per l’arte e la cultura, parché no ’l jera solamente quelo che saveva e conosseva le robe, el gaveva anca el dono de saver trasmétarte… quelo che lu el saveva.
Cussì, anca sta partenza del prof. Paolo Tieto, ne fa dire ’ncora de pi el nostro grazie a Chi n’à fato rivare anca st’ano a sto mese de setenbre, co la speranza de conpletare l’istà e ’ndare oltre.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Come gheto passà l’istà?
La prima domanda che vien a boca, ’pena che se incontra calchedun, la xe propio questa. E la risposta che de sicuro no tarda a rivare xe: “Cossa vòto che te diga… la go passà come tuti: calda e suta, co le so rogne, i so ciari de luna. Comunque la xe passà!”
de Mario Sileno Klein
Da Verona
El teremoto del 1117
de Wanda Girardi Castellani e Mirco Castellani
|
