Anbiente

El Parco del Sile

Longo na riva del Sile, se vede de ’e carcasse de veci burci…

Scheletro de burcio conservà dentro ’a bassa marea del fiume…

Sti resti i riesse ancora a dar vita parché, ànare e na numerosa fauna va ancora a far nidi dentro e sora i legni restài, come a ricordarne che tuto ricomincia. (foto A. Mondin)

Da bocia partivo da Venessia in bicicleta e ’ndavo fin a Treviso. Me fermavo davanti a ’e vile venete sul Teraio e, in una in particoeare, restavo incantà a vardaghe i calicantus che i profumava tanto da atirarme come na ape sul fior.
Giri indimenticàbii fin a Piassa de i Signori e su ’e mure venessiane, e ’e quatro porte antiche de ’a cità senpre tiràe sù da ’a Serenissima.
Soeamente a eà fine de i me vinti ani però go conosssùo ’a Alsaia del Sile e sta parte del so atuàe parco. Na scoperta bea, visto che dopo na vita ghe vado ancora spesso.
Se pol partire da tanti punti, ma mi parto da el Ponte de ’a Goba a Treviso e se pol ’ndar par ’a restera a pìe, in bicicleta e in barca.
El fiume el xe na poesia come scrita dal Petrarca. El score veoce ma, no massa e el ricorda anca ’a musica de Vivaldi e el verde de l’aqua de i canài de Venessia.
Pien de ànare, cigni, e altri osèi, el xe sior anca de pessi che vissin a ’e rive i se vede ’pena soto l’aqua e tra ’e alghe.
Un posto beo dove passarghe del tenpo a conóssar ’a natura e anca a vardar calcossa de unico. Caminando su na passerèa che ’a traversa in longo na riva del Sile, se vede de ’e carcasse de veci burci che na volta i trasportava merce longo ’e rive del fiume.
I xe là conservài par ricordarne un tenpo difìssie ma, secondo mi, no massa difìssie come queo de ’desso.
El burcio el gera na barca da lavoro che qualche volta el deventava anca ’a casa del barcaro e de ’a so fameja.
No i xe più costruìi da tanti ani, par questo i scheletri conservài dentro ’a bassa marea del fiume i xe na fonte de informassion inportante e i ne ricorda ’a vita fluviàe su ’e nostre tere.
Longo ’e rive del corso de aqua ghe xe ancora ’e bite dove i barconi i atracava. Ma bisogna védar de persona sti resti che i riesse ancora a dar vita parché, ànare e na numerosa fauna va ancora a far nidi dentro e sora i legni restài, come a ricordarne che tuto ricomincia.
’A grandessa de sti mezi da trasporto ’a xe notévoe e farli ’ndar no doveva èssar fàssie. Come doveva èssar difìssie anca ’a vita de ’e fameje che ghe viveva dentro. Però nel Veneto ’a vita su i fiumi ’a xe stada inportante e ’a fa parte de ’a nostra cultura.
Mi, in mezo a sti resti inponenti, riesso a védar ’e anguane perché anca se ’e se màschera ben, a ’e persone che crede ne ’e fàvoe, no ’e pol scónderse mai.
Cussì verso ’a foce del fiume interno de ’a me vita, vivo ’a vista de sto àngoeo de Treviso che ’a me juta a èssar più sereno ne ’a prospetiva che tuto sto fracasso del mondo de sti giorni, el passa un poco più distante da mi quando che son qua.
No sò par quanto tempo sarà possìbie mantegner ’a conservassion de i burci che stando in mezo a l’aqua, sogeti a ’e maree, al sol, al vento, a eà neve e al giasso i continua a conbàtar par farse amirar da i poeti che va a védarli.
In ogni caso mi no i desmentegarò mai par tanti motivi, non ultimo queo che partirò su uno de eori par i me viagi inportanti e unici.

[torna sopra]