Da San Stefano de Zimela (VR)

Naja: el canpo estivo

La càmara da leto multipla.

La distribuzion de el rancio.

La sala da pranzo.

L’alpino Asterio C. mentreché el lava la so gaveta.

Co’ la sospension de la leva obligatoria, anca la naja la xe deventà un relito de el passato, roba de na ’olta, come la defunta civiltà contadina. Proprio par questo a me piasarìa ricordàrghene calche storia, parché tuto no vaga in desmentegon.
In te i me disdoto mesi de vita militare (1960/1961) a go fato du canpi estivi, uno da alievo uficiale a Ascoli Piceno e uno da alpin a Pieve di Cadore. Le xe sta dó esperienze dure e difìzili, ma che ricordo senpre volentieri parché a go inparà tante robe.
In chele ocasion a ghemo ’vù anca noantri l’emozion de avere un albergo co’ tante stele, aqua corente e aria condizionà. La jera però ’na roba un pochetin difarente da ’desso, parché le stele le jera quele de el celo, quando che a no ’l jera mia nùvolo, l’aqua corente la jera quela de i torenti o senò quela che ne passava soto la tenda quando che a piovéa chediolamandava, e l’aria la jera condizionà fresca o calda a seconda de el tenpo che faséa.
Le regine de el canpo le jera le tende, tute fate a règola d’arte e che le ghe dava ospitalità a siè soldà co’ i so zaini. Se nava in leto vestìi, el materasso el jera fato co’ de la paja o de le frasche mòrbie de pin, el cussin co’ la giuba fata sù e se se cuerzéa co’ la cuertina de lana che gavéino in dotazion.
Ogni soldà el gavéa un telo tenda (che el servéa anca da mantelina quando che a piovéa), du tubi de aluminio a incastro, de i picheti e de le cordele. In pochi minuti, laorando insieme secondo le istruzion, la tenda la jera bela che montà. Bastava solo farghe ’torno via un scoriólo par l’aqua se piovéa e la càmara de l’albergo a tante stele la jera bela che pronta.
La “sala da pranzo” la jera a selta de ciaschedun: ’na zoca de ’n àlbaro, un sasso ’na s-cianta lissio, un tronco de un pin scaezzà da la bufera i bastava par sentarse… ma anca in piè, se ocoréa…
Invezze de servizzi de porcelana a ghe jera la gaveta par el rancio e el gavetin par bere. La gaveta la se sconponéa in dó parte e quela pi granda la jera par la pastasuta e el cuèrciolo par el secondo. El pan te lo tegnéi in man. Gnente tovaje o tovajói, ma solo tanto apetito e in corpo vint’ani e tre punture che te podéi magnare anca el velen che a no te moréi mia.
Le gavete le gavéa un difeto: le jera fate de aluminio e no ghe jera mia i detersivi che ghe xe ’desso. Par lavarle se naséa in te ’l torente e le se rassava ben ben co’ la sabia, co’ l’erba o co’ la tera e dopo le se rasentava co’ l’aqua corente. Co’ sto sistema a jera fadiga a tórghe tuto el grasso da l’aluminio che ’l jera anca poroso e cussita a ghe restava senpre tacà un póco de onto che co’ el caldo el naséa un póco da male e ’lora quando che la sera te ghe cavài el cuèrciolo par dopararle a vegnèa fora un odore che a el te faséa voltare ’ìa. Ma a disinfetare tuto a ghe jera la fame maurà in te un giorno de marcia e cussita tuto naséa ben instesso!

[torna sopra]