|
Da Verona
“Che fai tu, luna, in ciel?”
Te pòl èssar in mèso al deserto o in ponta a l’Himalaya… ma solo alsando i oci verso el cel te te rendi conto che semo tuti quanti strucadi su ’sta “picia” blu che rùgola ne l’infinito!
Così scominçia ’na celebre poesia de Giacomo Leopardi. Ve si mai domandà cosa la fa la Luna in cel? Probabilmente nò… epur de robe la ghe ne fa tante: par esenpio l’è stà par milioni e milioni de ani l’unica fonte de iluminassion durante la note. Tanto pressiosa l’è stà da rivar fin a sincronisar con la so luce el “ciclo” de le done… parché, par via de i predatori, l’era più conveniente inbastir i fiòi (e métarli al mondo) co’ la luna piena, pitosto che col scuro! Così, nel me primo articolo, ve parlo proprio de la Luna… no’ de quela che ghè nel posso ma quela che gavemo alta in cel.
La prima roba che se nota de la Luna l’è che la ne gira intorno, mostràndone senpre la stessa facia. No l’è mia ’na roba facile: provè a girar intorno a un tàolo senpre guardàndolo: vedarì che ve toca far girar i piè col ris-cio de scapussar! Alora parché el nostro satèlite el fa così? Come savì la Luna (con la so forsa de gravità) la “tira” la Tera… col bel risultato de far “alsar” el livel de i oceani. Ma se la Luna la riesse a solevar milioni de tonelate de aqua, qua su la Tera, cosa rièssela a far la Tera, tanto più grande, a la Luna?
Aqua da alsar, lì no ghe n’è… eco alora che la Luna la vien deformà, schissà e stirà par el longo in diression de la Tera: da ’na forma tonda la vien a ciapar ’na forma “a ovo”! Ciaro che se la gira, e la deformassion la resta senpre in diression de la Tera, la Luna la vien a èssar “schissà” in tute le diressioni, butando via un fraco de energia in calor e frenàndola proprio come i farìa i freni a disco su le rude de ’n automobile! Ma fin a quando se ridùsela la rotassion? Fin a quando la riva a mostrar sempre la stessa facia, parché, essendo così la deformassion deventà fissa, spreco de energia no ghe n’è più. L’è ormai da miliardi de ani che la Luna gira così! Da alora el nostro pianeta el ga fato anca da “scudo”: verso l’esterno la pòl èssar ciapà da le meteore, ma verso l’interno no… eventualmente se le ciapemo nojaltri. Eco parché la facia che vedemo l’è quasi lissia e quela “sconta”, dedrìo, l’è tuta buterà de crateri!
Ma tornamo a le maree. El “sforso” de alsar i nostri oceani a la Luna el ghe costa fadiga: cioè “energia”… Da dove le ciàpela? La le ciàpa da la so velocità de rivolussion intorno a la Tera… In altre parole la Luna la ralenta la so corsa! E ralentando, par mantegner l’equilibrio, la va un po’ più distante, continuando però a regolar la rotassion in modo da farne védar la stessa facia, parché a la Luna ghe convien. Anca ’sta facenda la va avanti da miliardi de ani: la Luna che se vedéa a l’inissio la ciapava tuto el cel e a l’epoca de i dinosauri l’era un fanal dopio de adesso. Però la Luna che vedeva i primi ominidi l’era come la nostra… nojaltri umani s’emo i “ultimi rivà” su la scala evolutiva. Però, visto che semo anca i più furbi, emo scominçià presto a capir che la Luna la canbia: da ’na stricoleta la cresse, note dopo note, fin a deventar bela tonda e ciara… par dopo métarse a calar, note dopo note, fin a tornar stricoleta e sparir del tuto. Dopo, el giro el se ripete de novo. Ogni quanto? Sempre ogni 29 giorni! E così tute le civiltà del mondo le à doparà la Luna come orolojo! Quante “lune”? No i era mia solo i “pelerossa” che misurava el tempo in “lune”… i le fa ancora adesso un miliardo de musulmani, le fa i Ebrei… l’à fato i Maya e l’à fato anca i romani! Parché la Luna l’è facile da védar: l’è ’n come ’n orolojo, belo lì nel cel! Ma quando se s’à acorti che tra el fredo e el caldo passa senpre 365 giorni, è vegnù conveniente misurar el tenpo anca in ani... magari conbinando i du sistemi de misura con qualche coression: parché l’ano de 365 giorni no el contien mia un nùmaro giusto de “cicli lunari” (de 29). Provè a far la division: un ano el contien 12 “lune” con avanso de 17 giorni... Ve si mai domandà parché i mesi i è “dódese”? Se arotondemo el ciclo lunare a 30 giorni (invesse che 29 che l’è anca un nùmaro scòmodo) vien fora 12x30 = 360 giorni e i “çinque” che vansa par rivar a 365 se pòl “spanpanarli” su i mesi... par esenpio slongàndoghene qualcheduno. L’è quel che faséa i Romani e l’è quel che femo anca nojaltri.
I Ebrei nel so calendario i 5 giorni che vansa i le recùpera ogni tanto e i Arabi no i le recùpera mai: così i mesi musulmani (par esenpio el Ramadan) i se sposta de stagion da un ano a l’altro. N’altra roba che fa la Luna i è le eclissi! Par pura coincidensa el so diametro in cel l’è quasi stesso de quel del Sol, tanto che quando la ghe passa davanti andasemo driti driti ne la so onbra! Par fortuna el so piano de orbita l’è un po’ spostà rispeto a l’Eclitica (quel de la Tera ’torno al Sol) e così a ogni giro la Luna la ghe passa o sora o soto! Ogni tanto par conbinassion la ghe passa giusto davanti… e alora ghè l’esclisse solare!
Fin da l’antichità i avéa capì ben el mecanismo, riussendo anca a prevédarle. Se invesse l’è la Luna che la passa ne l’ombra de la Tera se parla de eclisse “de luna”… dato però che la nostra ombra più che n’ombra l’è “n’ombrìa” (par via de l’atmosfera) la Luna no la sparisse mia ma la ciapa par un po’ ’na bela colorassion rossa… “rossa” parché el blu el s’à fermà tuto qua, a piturar el nostro cel.
Par conclùdar, ricordémose de quando, el 20 Lujo 1969, la Luna l’è deventà el primo (e finora, a parte la Tera, unico) corpo celeste dove l’omo l’à messo piè. Ci ghera no ’l podarà mai desmentegar l’emossion che s’à proà! Con Armstrong e Aldrin ghérimo tuti… “’Sto qua l’è un pìcolo passo par mi… ma l’è un grande passo par tuta l’umanità!”
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Al servizio de i altri…
Cossa voralo dire sto discorso: “èssare al servizio de i altri”? Saralo on mestiere novo? na profession vegnù fora da poco? na roba ch’i s’à inventà par conbàtare la disocupazion? Sì! In parte xe vèro tuto quanto: se lo femo, ghe ne goadagnemo tuti!
de Mario Sileno Klein
Da Verona
“Che fai tu, luna, in ciel?”
Te pòl èssar in mèso al deserto o in ponta a l’Himalaya… ma solo alsando i oci verso el cel te te rendi conto che semo tuti quanti strucadi su ’sta “picia” blu che rùgola ne l’infinito!
de Mirco Castellani
Anbiente
El Parco del Sile
de Armando Mondin
|
