|
Da Arzergrande (PD)
Pesse de fiume
 | | Eco na bela raìna (Cyprinus carpio) |
“Parécia el mastéo” ghe diseva me popà a me mama quando che ’l partìa par ’ndare a pescare e questo xe senpre stà de bon auspicio. El mastéo jera un contenitore de fero, ma el podeva éssare anca de plastica o de legno e el podeva contegnere circa ’na trentina de litri de aqua, so sto caso, par métare el pesse che me popà el gavarìa portà a casa.
E no ’l xe mai restà vodo, el mastéo, parché no ’l xe mai tornà a man vode. Minimo i jera senpre tre, quatro chìi de pesse de diverse sorte. Pessegati, sengarini, tenche, raìne, smirasóe, co’ eà poenta brustoeà che boni che i jera.
Me mama gheva el cònpito de prepararli; benedeta fémena, quanto che eà ga lavorà; anca so sti casi eà se faseva in quatro e oncora oncò no sò come che eà fasesse. Se penso che tante spose moderne se lamenta par el poco che ’e ga da fare, me vien ’e fumanée, ma questo sarìa ’n altro discorso…
Disevo che me popà el jera un pescadore proveto e el saveva ben riconòssare ogni tipo de pesse. Da i stratoni so eà rete che el stendéa ne l’aqua el saveva capire, senza védarlo, che pesse che se gheva ciapà. A sto proposito me vien in mente de un dì che xe passà de qua un pessaro col so furgonzin e ’l ghe voeva véndare a me popà de ’e raìne. “Te si cascà mae” el ghe ga risposto, “quei xe rumatera, no raìne.”
Qua, a casa, a quei tenpi, se poe dire che de pesse de fiume ghe ’n’emo magnà tanto. Eòra no ghe jera el frizer e quando che ’l ghe ne portava a casa tanto el tegneva queo che bastava par un paro de dì e el resto, o lo regaeàva a i vissini o lo moeàva, oncora vivo, qua intorno, dentro i fossi ne i quai de aqua ghe ne jera senpre.
Che bel ricordo che conservo de me popà pescadore e del gusto del pesse che ’l portava a casa. Nonostante el ghe fusse sol menù dó, tre volte eà setimana, no eò go mai magnà ’na volta malvoentiera. Al dì de oncò, co’ conpro el pesse al marcà, me vien in mente ste robe qua.
’Desso, de tenche, pessegati e altri tipi che ghe jera ’na volta te ghe ne vedi pochi su i banchi. De pesse de fiume ghe ne esiste poco ormai parché el xe stà anientà da pessi pi grandi butài dentro da i òmani ne i fiumi par chissà quàeo motivo, cossì come i gànbari killer che ga distruto tute ’e rane che ’e gaveva el cònpito de regoeare l’equilibrio naturàe de sti bei posti. ’E stesse rane e diversi tipi de pesse de fiume xe deventà ’na rarità. Eà setimana scorsa xe passà da casa mia un pessaro e el me ga proposto de ’e raìne… Ghe go fato un soriso e ghe go risposto: “Dame un chìo de sarde”…
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Al servizio de i altri…
Cossa voralo dire sto discorso: “èssare al servizio de i altri”? Saralo on mestiere novo? na profession vegnù fora da poco? na roba ch’i s’à inventà par conbàtare la disocupazion? Sì! In parte xe vèro tuto quanto: se lo femo, ghe ne goadagnemo tuti!
de Mario Sileno Klein
Da Verona
“Che fai tu, luna, in ciel?”
Te pòl èssar in mèso al deserto o in ponta a l’Himalaya… ma solo alsando i oci verso el cel te te rendi conto che semo tuti quanti strucadi su ’sta “picia” blu che rùgola ne l’infinito!
de Mirco Castellani
Anbiente
El Parco del Sile
de Armando Mondin
|
