Da Vicenza

Farse bèi a Primavera

La mastèa par la lissia e par el bagno.

Lavabo con cain, broca e porta-sugamani da siùri

Tòchi de saon fato in casa.

Anca se st’ano el tenpo ne ga regalà sbiansi de Primavera parfina rente Nadàe, tuti ga capìo che no jera altro che on torne de sòja: la Verta la sarìa riva al momento justo, insieme al s'ciolar mato de i oseleti inamorà, a ’e primolete incolorìe de sole, a l’erbeta fresca e molesina, al sbatociar de le canpane par festejar Gesù.
Aprìe xe rivà e za le tose le pensa a farse ’ncor pi bele par brincar le ociade remenghe de coalche bel tosato e, parché no?, par zolar ’ncora pi ’n alto co sogni inpiturà de struchi e basi.
Ani indrìo, la jente de canpagna e quela de sità, no ’vendo massa dimestichessa col lavarse e canbiarse, rivando ’a bela stajon, la pensava ben de farghe ’l bojo a le strasse portà tuto l’inverno che, daromài, le gavéa on profumin che te cavava el fià.
Bison parò dàrghine ato a i nostri veci: aqua e riscaldamento in casa no ghin gera e ’l fredo bisso de l’inverno te faséa bagolar al solo pensiero de cavarse zo. Se se lavava soto solo prima de maridarse o de ’ndare dal dotore, doparando na mastèla indove se butava aqua scaldà maman so ’l fogo. Có la stajon se faséa tepidina, se inpienava de aqua na bassinèa e se ’a meteva fora in corte; col calor del sole la se stenprava, tanto da poderse dar na lavada a i pìe on fià da cristiani; man e facia parò i se lavava ogni matina so ’l seciaro. Sora el seciaro se picava co na s-ciona i seci par tor l’aqua e la caza, on menestro de rame par travasarla da i seci a la bassina o balsina.
Le fameje manco poarète, le gavéa in càmara on trepìe co ’n cain de fero smaltà, na broca soto par vodarghe l’aqua e lavarse la musagna, el colo, i brassi. El trepìe gavéa parfina el porta-sugamani.
Gninte saón parfumà in chel tenpo, el costava on deghèjo anca se ’l jera stà fato conóssare fin dal secolo XII; i poarèti se ’o faséa in casa: ’te on calièro beo largo vegnéa fato bójare del grasso animàe (anca ossi) insieme a na pari quantità de lissivia de soda caustica. Dopo de ’ver bojìo pa’ on tòco, la pastèa che ghin vegneva fora la jera messa rento de i stanpi e fata sorare. Imajnève parò che rassa de odorin ca gavéa la pèle dopo de èssarse rassà par ben co chea maraveja...
Le zovanete, fata par ben la toilet, le voéva parer senpre pi bele e sensa difeti de sorta, in maniera che i tusi le vardasse co amirassion. Par far sì che la testa la fusse bela in òrdene, le doparava pètene e mojeche da caveji, meténdose de i nastrini colorà che faséa s-cioco. Le tosatele le se tegnéa i caveji on fià longheti o i se ’i postava in drèsse, girà ’torno ’a testa coasi a darghe la forma de on gnareto. Le done pi ’vanti co l’età le portava invesse el cocon, o la cocognèla. El pètene co i denti larghi el jera ciamà pètene ciaro, quelo pi picinin, fato de osso duro e co i denti ben fissi, el jera invesse dito petenèla e doparà anca par cavar via i ovi de i peòci che na volta se catava spesso so ’a testa de pìcoli e grandi. Par conbàtarli, se doparava robe a base de erbe: so l’Altopian de Asiago se se lavava i caveji co ’n decoto derivà da l’erba peocina; ’te la Val de Cianpo se se onzeva la testa co del petrolio; nel Canal del Brenta se frissionava la parte co ’n decoto de tabaco, in altri posti ’ncora co na lossion fata col pévare.
E cossa mai se consiliava a i tosatèli che voeva far crèssar la barba? I veci i li toéa de soja, insegnàndoghe a métarse so ’e massèle del schito de pào...
No stè métarve rìdare parché a mi, che da tosa paréa ca fusse passà par la piòna de San Giusepe, el nono me consiliava de spalmarme so ’e tetine na bea man de buro chè, de lì a poco, le sarìa cressù!!
Pochi jera i parfumi doparà, a parte quelo de violeta, otegnù da la distilassion de la raisa del gadólo. Par le man ruspie invesse, se faséa bójar de l’ojo e dopo se ghe zontava on fià de cera de le ave: no ghe jera gninte de mèjo par farle tornar lissie e molesine, tanto che le nostre none le doparava sto inpasto tute le sere prima de métarse in leto.
Par la pulissia de ’a boca, no serviva tanti angagni: se se passava fra on dente e l’altro de ’e pajete de grena e, par netarli ben e farli vegner pi bianchi, a se ghe russava sora de ’e foje de salvia o se magnava on bel pomo. I òmani, pi selvàdeghi de niantre, i mastegava invesse ’a rasa de i péssi, che la gavéa n’assion anca balsàmica e disinfetante.
Bon, no digo altro. A penso parò che, se da on canto la pulissia del corpo la jera on fià trascurà, da chealtro, magnando robe naturài e, soratuto, no ’vendo tanto da métare ’tel stómego, pochi gavéa problemi de peso e, a dirla s’ceta, questo jera on ben.

[torna sopra]